O Jimbangi ja Jihova abhanga ikalakalu munzumbi, akwatekesa athu abhindama mu 200 ajixi ndenge. Maji 35 kyajixi ngó kyene mutena kubhanga o ikalakalu ni kitadi kyene musangela ojiphange mu ixi yâ. Mu kiki-phe, kyebhi ojiphange mujixi jamukwa kyene mutena kufuta o ibhindamu yâ?

 O Kibuka kya Utuminu, kitonginina o ikalakalu ni ibhindamu munzumbi ya Jimbangi ja Jihova kumundu woso. Mukusuluka axikama phala kumona kyebhi kyandangastala okitadi kyene musangela o athu. Se jiphange ku filiyale imoxi atambula kitadi kyatundu o ibhindamu yâ, okitadi kiki, kikala phala kukwatekesa ojiphange mujixi jengi katambula kitadi kyasoko. Abhanga kiki phala kukayela o phangu ya Jikidistá jadyanga akexile mukwatekesa akwa ‘mukudibhindumuna.’ (2 Kolindu 8:14) Ojikidistá akexile ni kyanzungule, exile mubhindumuna o ibhindamu ya yo kakexile ni kya soko.

 Kyebhi kyene mudivwa ojiphange jene mutambula okikwatekesu kya jiphange mujifiliyale jengi lelu? Mukifika ku ixi ya Tanzânia, owadyama wavulu, phala kudya angastala 1.330 kz (dolare jiyadi) mukizuwa ni kizuwa. Okitadi kyasangela kyabhana phala kuyudikanakyu Kididi kya Ubhezelu kya Kilunga Mafinga. Ojiphange ja kilunga asoneka: “Kyoso kyazubha kuyudika okididi kya ubhezelu, o athu adibandekesa dingi muyônge! Twasakidila mu ukexilu wakubhana wakilunga kya Jihova ni wajiphange jetu kumundu woso. Mukonda dyakiki, twala ni kididi kyayuka phala kubheza Jihova.”

 Sayi jiphange jetu ku ixi ya Sri Lanka kaxile ni kudya mukonda dya uhaxi wa COVID-19. Bhukaxi kajiphange jiji, kwexile phange Imara Fernando ni monê Enosh. Maji mukonda dya kitadi kyasangela ojiphange kujixi jengi, ene atambula okikwatekesu kyabhindamene. Mukusuluka, ene asoneka mukanda wambe: “Twasakidila kyavulu ojiphange atulondekesa henda mu ithangana yiyi yabhonzo. Twasanguluka kyavulu mukubhanga mbandu wamwiji yú. Twamusamba kwa Jihova phala mwene asuluke ni kukwatekesa ojiphange jetu mu izuwa yiyi, isukidilaku.”

 Ojiphange jetu amesena kyavulu kutukwatekesa ni ima yalanayu, kabasa kididi bhwa tungu. Mukifika, Enosh wabhange kakitutu kê kakubhakelamu kitadi mukonda mwene wamesena we kukwatekesa ojiphange abhindama. Phange ya muhatu Guadalupe Álvarez wala we ni ukexilu yú wakubhana. Mwene watungu ku ixi ya México, mumbandu mwatungu, o athu kene mutambula kitadi kyasoko, sayi yâ kene mwafuta mudisukilu dya mbeji. Maji nemwene kiki, mwene ukwatekesa ni ima yatena. Mwene wasoneka: “Ngisakidila kyavulu Jihova muhenda yê yakidi. Eme ngejiya kwila, okitadi kingisangela ni kitadi kisangela akwetu, kyandakwatekesa ojiphange abhindama.”

 Ojiphange kujifiliyale, ene mutumikisa kitadi phala ojiphange mujixi mwala ibhindamu, asanguluka kyavulu mukubhanga kiki. Mukifika phange Anthony Carvalho watokala ku Kibuka kya Filiyale ya Brasil, wambe: “Mumivu yavulu, okikalakalu ku ixi yetu kyabhindamene okikwatekesu kya jixi jengi.” “Mukonda dya kikalakalu kitwatambula, okikalakalu kyasanzumuka dingi. Kindala, owadyama ki uvulu dingi, twala we kya ni ujitu wakukwatekesa akwetu. Ojiphange jetu amona okikalakalu kyakuboka, kala kikalakalu kyamubhanga kumundu woso. Kuma maxibulu a Jezú, ene ejiya kwila, abhingi kukwatekesa mukikalakalu kiki.”

 Webhi o ukexilu wabeta okota wakukwatekesa ojiphange jetu abhindama? Kimukutumikisa kitadi mujifiliyale ja jixi jengi, maji mukusangela kitadi phala “okikalakalu kumundu woso.” Tutena kubhanga kiki, mukusangela kitadi mukakitutu kakala mukididi kya ubhezelu, mba mukuya musayite yetu mumbandu donate.pr418.com. Tusakidila kyavulu okitadi kyene musangela ojiphange.