Mu mivu yoso, jiphange javulu akunji a katunda atokala ku mundu woso ene mwa exana phala kubhanga o Xikola ya Ngiliyade ya Torre de Vigia, mu Centro Educacional da Torre de Vigia ku Patterson, Nova York. a Mu xikola yiyi, o maxibulu a alonga kyebhi kyatena kukumbidila kyambote o ikalakalu yâ mu kilunga kya Jihova. O milongi yoso yatambula mu xikola yiyi, yakwatekesa o jiphange jiji kuswinisa o Ilunga ni jifiliyale ku mundu woso.

 Mu kidi, Ngiliyade xikola ibhanga athu akwa jixi joso. Mu kifika, mu kibuka kya 147 a bhange o xikola yiyi ku muvu wa 2019, mwexile 56 a maxibulu atokalele mu 29 a jixi. O jiphange a exana phala kubhanga o Xikola ya Ngiliyade, asidivila kya mu maukexilu avulu a sidivisu ya katunda; mu kifika, amukwa asidivila ku betele, tufunga twa Ilunga, akunji a jixi jengi mba aboki a katunda.

 O jiphange adisokejeka thembu yavulu kudima ande dya kumateka o kizuwa kyadyanga kya xikola. Mu kifika, o Kibuka kya Kwenda Njila kyala ku Mbonge yetu (WHQ Travel) usumba o jipasaji ja kwenda ni kiphululu phala o jiphange a asolo phala o xikola yiyi. Phala o maxibulu abhange o xikola 147 ya Ngiliyade, o jipasaji ja kuya ni kuvutuka ya dixibulu dimoxi katokala ku Estados Unidos, phala kuya ku Patterson yatenesa $1,075 ajidolale mba (700.900 a jikwanza). O maxibulu atundile mu Ilhas Salomão akwatele iphululu iwana phala kubhixila ku Patterson, mu kusuluka akwatele dingi iphululu itatu phala kuvutuka ku mabhata mâ. O jinjila jakexile mubhanga ja tenesa 35.400 a jikilometulu! O jipasaji ja iphululu yiyi jitenesa $2,300 ajidolale mba (1.499.600 a jikwanza) phala dixibulu imoxi ngó. Phala kupopala kitadi, o Kibuka kya Kwenda Njila akalakala ni programa ya komputadolo phala kumona kwebhi kwa sosolola o jipelesu ja jiphasaji ja kwenda njila. Né mwene se abhingi kya phala kwa bhakela pasaji, o programa yiyi isuluka mu kutokwesa mu jisemana mba jimbeji phala kumona se asosola dingi o pelesu. O Kibuka kya Kwenda Njila usumba we jipasaji bhukaxi ja jibonu jene mutambula mukonda dya kwenda njila.

 Maxibulu avulu abhingi kukala ni disesa (visto) phala kubokona mu ixi ya Estados Unidos. Mukonda dya kiki, o Departamento Jurídico da Sede Mundial, ikwatekesa o maxibulu phala kukala ni madisesa yá. O jingastu ja madisesa (visto) ni ji Taxa jengi (lubhaku) itenesa $510 ajidolale mba (332.520 a jikwanza) phala dixibulu dimoxi.

 Mbote yebhi itukatula mu milongi yene mutambula o jiphange mu xikola yiyi? Hendra Gunawan, kafunga katungu ku Sudeste ya Asia, wamusidivila mu kilunga mwala dikaza dyabhange o Xikola ya Ngiliyade, wambe: “Mukulu mu kilunga kyetu ki mwexile aboki athembu yoso, maji kyoso o dikaza didi dyatundu mu Ngiliyade anga abhixila mu kilunga kyetu, o jiphange a aswinisa mu kumona o kuswina ni hanji ya kuboka ya dikaza didi, mu kusuluka sayi amoxi akituka aboki athembu yoso. Mu kusuluka, phange imoxi ya muhatu watokala mu kilunga kyetu, wabhange o Xikola ya Akunji a Utuminu!”

 Phange Sergio Panjaitan wamukalakala ku betele yala ku Sudeste ya Asia kumoxi ni jiphange abhange o Xikola ya Ngiliyade, mwene wambe: “O itendelesu ni milongi yatambula mu xikola yiyi, yexile dibesá phala ene, ni phala etu we. Ene adilongo ima yavulu! Maji muveji dya kudizangeleka ni ima yadilongo, ene alonga we akwa o ima yadilongo. Mu kubhanga kiki, ene adiswinisa mu nzumbi.”

 Kyebhi kyafuta o jingastu joso ja xikola yiyi? Bhukaxi ka kitadi a kisangela phala o kikalakalu ku mundu woso, sayi bhabha akisangela mu maukexilu utusangu mu sayite donate.pr418.com. Twamisakidila mu kitadi ki mwene musangela ni muxima woso, phala kukwatekesa o xikola yiyi a ibhanga ku athu atokala mu jiso joso.