O seketa ya ONU ngana António Guterres, mu kizuwa kya 4 ya mbeji ya Kasamanu ka 2022, o mukutanga o lelatódyu yalungu ni kuma kwamulunguluka, ya Painel Intergovernamental sobre Mudanças Climáticas, wambe:“ Etu twamuditela munjila yandatubhekela mavuwa ni lusolo. Jimbanza jamakota jene muboba ni menya. Lelu o kalolo kamudibandekesa kyavulu, m’ukulu ndenge. Kithembu kya nguzu. O kukamba o menya. Mazunda a idifwa ya yama ni mixi amujimuka. Kiki kinzoji mba kima kya kuzwela ngó. Kyene kyamuzwela o jingijiye kwila kyene kyandabhita mukonda dya ukexilu utwamukalakala ni mukengeji.”

 “O Jingijiye amutudimuna kwila mukonda dya kuma kwamulunguluka, kyandabhekela ibhidi ya kithembu kya nguzu ku jiparke joso ja 423, ku [Estados Unidos.] Mukonda o kithembu kyamuya ni kudibandekesa dingi. O ima yayibha yamubhita yedikala o mavuwa atanga o Bibidya: O muxitu ukwata tuya, kalemba, o kutema kwa mwanya, o kalunga kamuzala kyavulu ni kalolo kavulu.”—“Kalemba kadikota mu mbanza ya Yellowstone, kizunzumbya ya ima yandakwiza kupholo,” The New York Times, 15 ya kanake, ka 2022.

 O kwila o makaya atena kwabatula? Se kyene, nanyi utena kwabatula? Tutale ihi yamba o Bibidya.

 Bhukaxi ka Bibidya Nzambi wakanena “kubwikisa yó ene mu bwikisa o ixi.” (Dijingunwinu 11:18) O velusu yiyi ya Bibidya itulonga ima itatu:

1.  1. O athu ene mubwikisa ima yavulu mu ixi.

2.  2. O kibwikilu kya ixi kikyanda nangenena.

3.  3. Nzambi mwene wanda batula o maka alungu ni ixi, ko athu kana.

 O Bibidya yambe kwila “o ixi ya kalé, kyene ki yene kyene.” (Ndongixi 1:4) Kwandatunga jinga athu mu ixi.

•   “Ixi-phe i xalela ku athu yá ayuka, ene a i lundula, mwene mwa tunga, o thembu yâ ki ibhu.”—Jisálamu 37:29.

 O maka oso mu ixi andakwabatula.

•   “Ni kikangalakata ni ididi ya kukuta ya ká sangulukila kyenyiki; dinyana dya ká tana, anga ditulula kala diloza.”—Izaya 35:1.