Ku mundu woso, athu avulu amudituna kudya xitu.

•   “O athu adituna kudya xitu kaxikina kwila o athu ajibha o yama phala idya, mba phala kubhanga nayu izwatu mba phala kubhanga nayu kima kyengi.”—The Vegan Society.

 Ene kene mubanza ngo ku mwenyu wa yama kana, maji axinganeka wa mu kuwabha kwa dyembu, kukala ni sawidi yambote, akamukwa adituna kudya xitu mukonda dya ngeleja yâ.

•   “O muthu udituna kudya xitu, kadifu ni muthu yo usola o makudya andadya ni yo kandadya. Mukonda o muthu udituna kudya xitu kifwa ukala ni kixikanu kya dikota, umesena kwila athu oso mu ngongo kyene kyatokala o kubhanga, kudituna kudya xitu phala kulanga o yama.”—Britannica Academic.

 O kwila o kudituna kudya xitu, kwene kwandalanga o ixi? Ihi Izwela o Bibidya?

 O Bibidya ilondekesa kwila, phala o mubhangi wetu, Jihova Nzambi, a o athu ala dingi ni valolo yama ndenge, yene yamba we kwila mwene watubhana o kutena kwa kulanga o yama. (Dimatekenu 1:27, 28) Sayi kithangana Nzambi wabhana ufolo ku athu phala kudya xitu. (Dimatekenu 9:3) Maji Nzambi ka wabhela o ukexilu wa kujibha o yama mu kingoho mba kwa bhanga kyaibha.—Jisabhu 12:10.

 Kala kizwela o Bibidya, o muthu mwene wejiya se udya xitu mba kana. b Kikale se twasolo kudya xitu mba kana ki twa tokala kubanza kwila twabeta kota mukukala ni valolo ku mesu a Nzambi. (1 Kolindu 8:8) Mu maka alungu ni kudya, ki twa tokala kuzwela kyaibhi yalungu ni ima isola akwetu.—Loma 14:3.

 O Bibidya ilonga kwila o ima itusola kiyene yandatena kubatula o maka mu ngongo. Ima yavulu yaibha yene mubhita ku mundu, yamubhita mukonda dya maka alungu ni jinguvulu mba maka alungu ni kitadi, seku muthu utena kuzubha o ima yiyi. O Bibidya yamba kiki:

•   “O kya bhengalala, kya bhengalala kya mwene, kene ku ki yukisa dingi.”—Ndongixi 1:15.

 O Mubhangi wetu wanda zubha o maka oso aibha. O Bibidya itumbula kifika kyalungu ni yoso yanda bhanga Nzambi.

•   “Kyazubha kubhita o ima yiyi, ngamono dyulu dya ubhe ni ixi ya ubhe, o dyulu dyo’kulu ni ixi yokulu ki ya kexile-ku dingi, o musanza wa kalunga ki wexile-ku dingi.”—Dijingunwinu 21:1.

 Nzambi wanda bhinganesa o jinguvulu jamundu, mba wandakatula “o dyulu dyo’kulu,” yu wandatabhu “dyulu dya ubhe,” ó Utuminu we wa dyulu. O Utuminu we wanda katula o “ixi yokulu,” kifwa wanda bhwikisa yo abhukumuka, o Utuminu we wandatumina o “ixi ya ubhe,” mba yo axikina kubelesela Nzambi ni kusanguluka kwoso.

 Mu Utuminu ngo wa Nzambi o athu andatena kutunga kumoxi ni yama ni kulanga kyambote o ixi.—Izaya 11:6-9.