Divulu Dya Dyanga Dya Jisobha 1:1-53
1 Sobha Davidi wakukile kya kyavulu. Sumbala akexile mu mufuta ni mibeletolo né kiki wakexile hanji mu kwívwa mbambi.
2 Mukiki-phe, o jiselevende jê a mwambela: “Twanda sota kilumba muzeletete phala ngana yami, o sobha. Mwene wanda kala musaki wé. Wanda zeka jinga bhu jihata jé phala kwivwe dingi mbambi, ngana yami.”
3 Kyenyiki, asoto kilumba kyawabha mu ixi yoso ya Izalayele, ya asange Abisaki mukwa Suneme, a mwambata kwa sobha.
4 O kilumba kyawabhele kyavulu o pholo. Wakituka musaki wê, wakexile mu mulanga maji o sobha kazeka-nê.
5 Adoniya mon’a Hajiti wexile mudizangeleka, mu kwamba: “Eme nganda kala ngi sobha!” Mwene watumu kuyudika dikalu phala mwene ni mayala endela mu jikabalu ni makwinyi atanu a mayala phala kulenga bhu pholo yê.
6 Maji tat’ê nuka wa mubazelele,* mu kwamba: “Mukonda dyahi wa mubhanga o kima kiki?” Mwene we wa wabhele kyavulu o pholo, mwéne wakayela kwa Abisalone mu ku muvwala.
7 Adoniya wazwela ni Jowabe mon’â Zeluya ni mukunji Abiyatale, ene anga a mukwatekesa.
8 Maji-phe o mukunji Zadoke ni Benaya mon’a Joyada ni polofeta Natane ni Ximeyi ni Leyí ni mazonda a Davidi, kakwatekesa Adoniya.
9 Mukusuka-ku, Adoniya wabhakula jimbudi ni jingombe ni tungombe twanete bhu mbandu a ditadi dya Zowelete bhwa zukamene ni Ene-Lojele. Mwene wexana o jiphange jê joso, o twana twa sobha ni mayala oso a Judá, o jiselevende ja sobha.
10 Maji mwene kexana polofeta Natane, Benaya ni mazonda a ita, kate mwene ni phang’yê Solomá kamwixana.
11 Kyenyiki, Natane wambela Bateseba man’ya Solomá, wixi: “Eye kwívu kwila Adoniya mon’a Hajiti wakituka sobha, maji ngana yetu Davidi kejiya o maka yá?
12 Kyenyiki, ngakudyondo ngivwe kyambote, ngehele ngikubhane ndunge phala ubhulule o mwenyu wé ni mwenyu wa mon’é Solomá.
13 Ndé uzwele ni sobha Davidi, u mwambela kiki: ‘Ngana yami, k’eye wakanena o mubhik’é, kyoso ki wambe: “O mon’é Solomá mwene wanda ngibhingana ku ungana ni kuxikama ku kyandu kyami kya ungana?” Mukonda dyahi-phe Adoniya mwéne wakituka sobha?’
14 Kyoso ki wandaya ni kuzwela ni sobha, eme nganda bokona he ngi kulungisa mu yoso i wanda zwela.”
15 Kyenyiki, Bateseba wabokona mu xilu dya sobha. O sobha wakukile kya kyavulu, Abisaki mukwa Suneme, mwéne wexile mulanga o sobha.
16 Bateseba wafukama bhu pholo ya sobha. O sobha yu wa mwibhwidisa: “Ihi i wamesena?”
17 Mwene wa mutambwijila: “Ngana yami, eye wa ngikanena mu dijina dya Jihova, Nzambi yé, mu kwamba: ‘O mon’é Solomá, mwéne wanda ngibhingana ku ungana ni kuxikama ku kyandu kyami.’
18 Maji kindala, Adoniya mwéne wakituka sobha. Ngana yami u sobha, eye ki wejiya o maka yá.
19 Mwene wasatela ibhaku yavulu: Jingombe, tungombe twanete ni jimbudi. Wexana o twana twoso twa sobha, o mukunji Abiyatale ni Jowabe o kabhitangu ka masoladi, maji kexana o selevende yé Solomá.
20 Kindala-phe, ngana yami o sobha, Izalayele yoso ya mu kukingila eye phala u atangele se nanyi wanda xikama ku kyandu kyé, mu ku kubhingana ku usobha.
21 Se kukibhange, kyoso o ngana yami o sobha ki wanda fwa kala kyafu o jikuku jé, eme ni mon’ami Solomá anda fika kwila twa alungulukila.”
22 Kyoso kyakexile hanji muzwela ni sobha, polofeta Natane wabhixila.
23 Anga atangela o sobha, exi: “Polofeta Natane yu bhabha.” Mwene wabokona kate bhwexile o sobha, yu wafukama ni pholo bhoxi, bhu pholo ya sobha.
24 Polofeta Natane wa mwibhwidisa: “Ngana yami sobha, o kwila eye wambe kuma Adoniya wanda kubhingana ku usobha, ni kwila mwéne wanda xikama ku kyandu kyé?
25 Lelu, mwene wabhakula ibhaku yavulu: Jingombe, tungombe twanete ni jimbudi. Wexana o twana twoso twa sobha ni jikabhitangu ja masoladi ni mukunji Abiyatale. Ene ala kwenyoko mudya kumoxi ni mwene ni kwamba: ‘Tanaku sobha Adoniya!’
26 Maji eme ngi mubhik’é kangixana, kexana we o mukunji Zadoke, Benaya mon’â Joyada, né ngo Solomá, o selevende yé.
27 O kwila ngana yami u sobha, watumu kubhanga kiki sé kutangela selevende yé, se nanyi weji kubhingana mu utuminu?”
28 Sobha Davidi wambe: “Exanenu Bateseba.” Kyenyiki-phe, Bateseba wabokona yu wemana bhu pholo ya sobha.
29 O sobha wabhange o kikanenu kiki: “Kala Jihova kyene ku mwenyu, yó wa ngibhulula* mu kutata kwami kwoso,
30 kala ki nga kukanena mu dijina dya Jihova, o Nzambi ya Izalayele mu kwamba: ‘O mon’é Solomá wanda ngibhingana ku usobha, mwéne wanda xikama ku kyandu kyami kya ungana!’ Kyene ki nganda bhanga mu kizuwa kiki.”
31 Kyenyiki, Bateseba wafukamena o sobha ni pholo bhoxi, yu wambe: “Ngana yami sobha Davidi, ukôle mwenyu!”
32 Mu kithangana kyenyokyo, sobha Davidi wambe, wixi: “Exanenu o mukunji Zadoke, polofeta Natane ni Benaya mon’a Joyada.” Mukyenyiki, ene ayi kwa sobha.
33 O sobha wa ambela, wixi: “Ambatenu o jiselevende ja ngana yenu, mubhangese mon’ami Solomá kuhaba ku bulu yami, kulumukenu-nê ku Ngihone.
34 Kwenyoko, o mukunji Zadoke ni polofeta Natane atokala ku mu unda kala sobha ya Izalayele. Mukusuluka, muxika o jikoloneta anga mwamba: ‘Tanaku sobha Solomá!’
35 O kimwanda zubha kukibhanga, mubandela-nê kumoxi mu mukayela ku dima dyê. Kyanda bhixila, wanda xikama ku kyandu kyami kya ungana. Mwene wanda kala sobha bhu kididi kyami, nganda musola kala mutwameni wa Izalayele ni wa Judá.”
36 Mu kithangana kyenyokyo, Benaya mon’a Joyada wambela o sobha, wixi: “Kyene! Jihova o Nzambi ya ngana yami akixikine.
37 Jihova akwatekese Solomá kala kya kukwatekesa, ngana yami u sobha, Mwene abhangese o ungana wa Solomá kubeta dingi kota, o wa ngana yami sobha Davidi, ndenge.”
38 Kyenyiki, o mukunji Zadoke ni polofeta Natane ni Benaya mon’a Joyada ni akwa Makeleti ni akwa Mapelete akulumuka, abhangesa Solomá kusambela ku bulu yatokalele kwa sobha Davidi, anga aya-nê kate ku Ngihone.
39 O mukunji Zadoke wakatula o lungela lwa máji mu balaka, yu wa undu Solomá. Kyenyiki, amateka kuxika o jikoloneta, o mundu woso anga umateka o kudikola: “Ataneku sobha Solomá!”
40 Mukusuluka, o mundu woso wa mukayela kudima ni kuxika jimbéndu ni kusanguluka kwoso. O mavu exile mu teketa* mukonda dya jibuya jâ.
41 Kyoso kyakexile muzubha o kudya, Adoniya ni athu oso a exana, evu o jibuya. Mukyenyiki, Jowabe wevu o jikoloneta jakexile muxika, yu wambe: “O jibuya joso jiji mu mbanza jilombolola ihi?”
42 Kyoso kyakexile muzwela hanji, o mukunji Jonatá, mon’a Abiyatale wabhixila. Kyenyiki, Adoniya wambe: “Tusange-ku, bokona, mukonda eye u muthu wambote, weza ni njimbu yambote.”
43 Maji Jonatá watambwijila Adoniya, wixi: “Kingamukwiza ni njimbu yambote, kana! Mukidi o ngana yami, sobha Davidi watumbika Solomá ku usobha.
44 O sobha watumikisa o mukunji Zadoke, polofeta Natane, Benaya mon’a Joyada ni akwa Makeleti ni akwa Mapelete, phala kuxinjikila Solomá. Ene a mubhangesa kusambela ku bulu yatokala kwa sobha.
45 Mukusuluka, o mukunji Zadoke ni polofeta Natane a mu undu kala sobha ku Ngihone. Ene atundu kwenyoko ni kisangusangu kyadikota, o athu mu mbanza a mukemba, kyene ki mwevu o jibuya jiji.
46 Kikyene ngo, Solomá waxikama we ku kyandu kya ungana kya sobha.
47 O kyamukwa, o jiselevende ja sobha ayi mutanesa ngana yetu sobha Davidi, mu kwamba: ‘O Nzambi yé, abhangese kwila o dijina dya Solomá mu kudijingisa dibeta kota, o dijina dya ngana yetu ndenge. Ni kwila o ungana wê ubeta kota.’ Mukusuluka, sobha wafukama mu hama yê phala kubheza Nzambi.
48 O sobha wambe we kiki: ‘Aximane Jihova o Nzambi ya Izalayele, wabhangesa kwila kukale muthu phala kuxikama ku kyandu kyami kya ungana, yu wa ngehela kumona o ima yiyi.’”
49 O mundu woso a exanene kwala Adoniya wôma wa akwata. Ene abalumuka, ya ayi.
50 Adoniya wakexile we ni wôma mukonda dya Solomá. Kyenyiki wabalumuka yu wayi mudikwatela ku jingela ja kalatódyu.
51 Mukyenyiki, akitangela Solomá mu kwamba: “Adoniya wala ni wôma wa Sobha Solomá, yu wayi mudikwatela ku jingela ja kalatódyu, yu wambe: ‘Kya dyanga o Sobha Solomá a ngikanene kwila kanda jibha o selevende yê ni xibhata.’”
52 Mukiki-phe Solomá wambe: “Se mwene ukala fiyele, ku mutwe wê kikwanda lawuka né ngo lundemba lumoxi. Maji se mwene ubhanga kima kyayibha, wanda fwa.”
53 Sobha Solomá watumu-phe ku mubhangesa kutuluka ku kalatódyu, mwene anga ubokona yu wafukama bhu pholo ya Sobha Solomá. Solomá anga u mwambela, wixi: “Ndé kubhata dyé.”
