Divulu Dya Dyanga Dya Jisobha 10:1-29
10 O mvwale ya Sabá kyevu o fuma ya Solomá mukonda dya dijina dya Jihova, mwene wayi mu mulola ni ibhwidisu yabhonzo.
2 Mwene wabhixila mu Jeluzaleme ni akalakadi avulu ni jikamelu jexile mu kwambata máji a mazumba ni ulu yavulu ni matadi ala ni valolo. Mwene weza kwa Solomá yu wa mutangela yoso yexile ku muxima wê.
3 Solomá wa mutambwijila o ibhwidisu yoso. Kikwexile kima kyabhonzele kinene* phala o sobha ku mujimbulula.
4 Kyoso o mvwale ya Sabá kyamono o unjimu woso wa Solomá ni inzo yatungile mwene
5 ni makudya ku meza mê ni kyebhi kyexile muxikama o ilamba yê ni kikalakalu kya yó exile musidivila o kudya ni izwatu yâ ni kikalakalu kya jikopelu ni jisata jakoha jexile mubhakula mu inzo ya Jihova, o kya kuzwela walembwa.
6 Mukusuluka, mwene wambela o sobha, wixi: “Mbe, o ima yoso i ngevu mu ixi yami yalungu ni ibhangelu* yé ni unjimu wé, kidi mwene!
7 Maji ngaxikina ngo mu yoso ya ngitangela kyoso ki ngeza, eme ngamono ni mesu mami. Mukidi, kangitangela né ngo kaxaxi ka ima yoso i ngamono, mukonda o kwijiya ni jimbote joso jiwala-naju, jasomboka o ima yoso i ngevu.
8 Azediwa o mayala mé ni jiselevende jé, ene mukala jinga ku pholo yé mukwivwa o unjimu wé!
9 Jihova Nzambi yé a muximane, yó wakuzolo, yu wakute mu ungana wa kutumina Izalayele. Mukonda dya Jihova kuzola kyavulu Izalayele, mwene wakusolo phala kutumina ni kuyuka ni kidi.”
10 Mukusuluka, mwene wabhana hama ni makwinyi ayadi a jitalendu* ja ulu kwa sobha ni máji a nzungule a mazumba ni matadi afwama. Kibhwexile dingi muthu wengi wabhana o máji oso yó a mazumba kala kyabhanene n’a mvwale ya Sabá kwa sobha Solomá.
11 O jinaviyu ja Hilamu jexile mututa o ulu ku Ofile, jabheka we mabaya avulu a muxi wa Sândalu ni matadi afwama.
12 Ni mabaya a Sândalu, sobha wabhange ifikidilu phala o inzo ya Jihova ni inzo ya sobha ni jimbánza ni jingoji phala o jingimbidi. Nuka dingi abhekele né kumona mabaya a Sândalu kala yá, kate mu izuwa ya lelu.
13 O sobha Solomá wabhana we kwa mvwale ya Sabá yoso yamesenene. O ku ima yoso ya mubhele kya, wateku dingi ima yamukwa. Mukusuluka, o mvwale ya Sabá wavutuka ku ixi yê kumoxi ni jiselevende jê.
14 O ulu yexile mutambula Solomá ku muvu, yexile munema hama asamanu ni makwiyi asamanu ni samanu a jitalendu.
15 Ku thandu dya ulu yoso yiyi, kwadite dingi o ulu yexile mutunda ku jingenji ni ku asumbixi ni ku jisobha ja Alábya ni ku jinguvulu ja jixi.
16 Sobha Solomá wabhange we hâma jiyadi ja jingubu ja ulu. (ngubu imoxi yexile ni hama jisamanu ja jixikulu* ja ulu.)
17 Ni hâma jitatu ja jingubu jofele ja ulu (kala ngubu yofele yexile ni mina* jitatu ja ulu). Mukusuluka, o sobha wajitula mu Inzo ya Muxitu wa Libanu.
18 O sobha wabhange we kyandu kyadikota ni mazu a jinzamba, yu wa ifwamesa ni ulu ya fina.
19 O kyandu kyakexile ni xikata ya matala asamanu, o ku thandu dya kyandu kwexile kima kyexile muvungina. O kyalu kyexile ni ixamenenu iyadi ku mbandu jiyadi ja kyalu, kala mbandu kwexile kiteka kya hoji.
20 O ku matala asamanu a xikata, kwexile dikwinyi ni kiyadi kya jihoji. Mbandu imoxi samanu dya jihoji, o mbandu yamukwa samanu dya jihoji, séku sobha yengi wexile ni kyandu kyadifwile ni kiki.
21 O jikopho ja sobha Solomá ajibhangele ni ulu, o imbamba yoso ya inzo a ixana Muxitu wa Libanu, yexile ya ulu yafina. Kibhwexile kima a kibhangele ni phalata, mukonda mu izuwa ya Solomá o phalata kiyexile ni valolo.
22 Mukonda o sobha wakexile ni jinaviyu ja Talxixi ku musanza wa kalunga, kumoxi ni jinaviyu ja Hilamu. Mu kubhita mivu itatu, o jinaviyu jiji jakexile mukwiza veji imoxi, mu kutunda ku Talxixi ni kubheka ulu, phalata, mazu a jinzamba, ni jihima ni jinjila a jixana jipavá.
23 Kyenyiki, sobha Solomá mwéne wabetele-kota mu kukala mvwama ni kukala njimu, o jisobha joso mu ixi ndenge.
24 Mukonda dyakiki, athu a jixi joso a mesenene kuzwela ni* Solomá phala kwivwa o unjimu wa mubhana Nzambi.
25 Ene oso exile mu mubhekela maujitu kala, itutu ya phalata, itutu ya ulu, izwatu, mauta, máji a dizumba, jikabalu ni jimula. Muvu ni muvu, exile mu mubhekela o ima yiyi.
26 O makalu a ita ni jikabalu* ja Solomá jexile mu dibandekesa dingi. Mwene wexile ni midi ni hama jiwana ja makalu a ita ni dikwinyi ni kiyadi kya midi kya jikabalu.* Jene jexile mu jimbanza ja kubhaka o makalu a ita ni mu Jeluzaleme bhwa zukama ni sobha.
27 Sobha Solomá wabhangesa kwila mu Jeluzaleme mwizala ni phalata kala matadi. Wabhangesa o mabaya a muxi wa sédulu kuvula kala muxi wa mufiku wa Sefelá.
28 O jikabalu ja sobha Solomá, exile mu jisumba ku Ijitu. O kibuka kya jingenji ja sobha exile musumba o jikabalu,* exile mufuta o jikabalu mu valolo yexile mubhinga o asumbixi.
29 Dikalu dimoxi dya ita, exile mu disumba ku Ijitu mu hama asamanu a mabele a phalata. Kabalu kamoxi exile mu kasumba mu hama ni makwinyi atanu a mabele a phalata. Ene we exile mu jisumbisa ku jisobha joso ja akwa Hiti ni ku jisobha ja akwa Sídya.
Footnotes
^ Mu Heba.: “ka kijidile.”
^ Mba, “izwelu.”
^ Talendu imoxi yasokele ni 34.2 ya jikilu.Tala o Kiba. B14.
^ Xikulu imoxi yasokele ni 11.4 ya jigrama. Tala o Kiba. B14.
^ Mu Mikanda ya Hebalayiku, mina imoxi yasokele ni 570 ya jigrama. Tala o Kiba. B14.
^ Mu Heba.: “kusota o pholo ya.”
^ Mba, “akwa kumondala o jikabalu.”
^ Mba, “akwa kumondala o jikabalu.”
^ Mba nange, “ku Ijitu ni ku Kowa. O jingenji ja sobha exile mu jisumba ku Kowa.” Nange phala kulombolola Silisya.
