Divulu Dya Dyanga Dya Jisobha 11:1-43
11 Maji sobha Solomá kazolele ngo mon’a Falawó, wazolele we ahatu avulu akwa jixi jengi kala o ahatu akwa Mowabe, akwa Amone, akwa Idomo, akwa Sidónya ni ahatu akwa Hiti.
2 Ene atokalele ku ifuxi yafidisile Jihova ku akwa Izalayele kyoso kyambe: “Enu kimutokala kukazala ni ene, ene wa katokala kukazala ni enu. Mukonda anda mibhomba o mixima ni ku mibhangesa kukayela o jinzambi jâ.” Maji-phe, Solomá wa azolele* kyavulu.
3 Mwene wexile ni hama asambwadi a ahatu ni hama jitatu ja jisayi. Bhofele-bhofele o ahatu yá exile mu mubhomba o muxima.*
4 Kyoso Solomá kya kukile kya, o ahat’wê a mubhombo o muxima phala kusidivila jinzambi jengi. Kyenyiki, mwene kexile musidivila dingi Jihova Nzambi yê ni muxima woso, kala kyabhange tat’ê Davidi.
5 Solomá wamateka kubheza Axitolote o nzambi ya akwa Sidónya ni Milikome o nzambi ya akwa Amone yayibhile kinene bhu pholo ya Nzambi yakidi.
6 Solomá wabhange ima yayibhila Jihova, mwene kasidivila Jihova ni ufiyele woso kala kyabhangele tat’ê Davidi.
7 Kyenyiki, Solomá watungu kididi phala kubheza Kemoji, o nzambi ya akwa Mowabe, yayibhile kinene bhu pholo ya Nzambi yakidi. Watungu we kididi phala kubheza Moloke, o nzambi ya akwa Amone yayibhile kinene bhu pholo ya Nzambi yakidi, ku mulundu bhwa zukama ni mbanza ya Jeluzaleme.
8 Mwene watungu o ididi yiyi phala o ahat’wê oso akwa jixi jengi, exile mubandesa o dixi dya jisata ni kubhakula we jisata ku jinzambi jâ.
9 Jihova wakwatela njinda yavulu kwa Solomá, mukonda o muxima wê a u bhombele yu wabhana dikunda kwa Jihova, o Nzambi ya Izalayele wa mumonekene mu luyadi,
10 wa mudimwine we mu maka yá, a kwila katokalele kubheza jinzambi jengi. Maji-phe, Solomá kabelesela o kitumu kya mubhanene Jihova.
11 Kyenyiki, Jihova wambela Solomá, wixi: “Kuma eye wabhange o kima kiki, eye wakambe kubhaka o kikutu ni kukumbidila o itendelesu i ngakubhana, nganda kutambula o utuminu, nganda ubhana kwa selevende yé.
12 Maji-phe, kinganda kutambula o utuminu kyoso kiwala hanji ku mwenyu, mukonda dya tat’é Davidi. Nganda u tambula bhu maku a mon’é,
13 maji kinganda tambula o utuminu woso. Nganda bhana kifuxi kimoxi kwa mon’é mukonda dya selevende yami Davidi ni mukonda dya Jeluzaleme o mbanza i ngasolo.”
14 Kyenyiki, Jihova wabheka nguma kwa Solomá, Hadade mukwa Idomo watokala ku mwiji wa jisobha ja Idomo.
15 Kyoso Davidi kyatolola akwa Idomo, Jowabe o kabhitangu ka masoladi wayi mufunda o imbi, yu wasoto kujibha o mayala oso akwa Idomo.
16 (Jowabe ni Izalayele yoso akala kwenyoko mu mbeji jisamanu kate kyazubha kujibha o mayala oso akwa Idomo.)
17 Maji Hadade walenge kumoxi ni jisevende ja tat’ê exile akwa Idomo, ene alengela ku Ijitu. Mu thembu yenyoyo, Hadade wexile hanji mona ndenge.
18 Kyenyiki, a tundu ku Midiyana ya ayi ku Palane. Mukusuluka, ene ayi ku Ijitu kumoxi ni mayala akwa Palane, a dilondekesa kwa Falawó o sobha ya Ijitu. O sobha wabhana kwa Hadade inzo, kudya ni mavu phala kudima.
19 Hadade wasange ngalasa ku mesu a Falawó. Kyenyiki, Falawó wa mubhana phange ya muhat’wê nvwale Tafene* phala kukazala-nê.
20 Mukubhita thembu, o phange ya Tafene wavwala mona ni Hadade, dijina dyê Jenubate, Tafene wa musase* mu inzo ya Falawó. Jenubate ukala mu inzo ya Falawó mwaxaxi ka an’â Falawó.
21 Kyoso kyexile ku Ijitu, Hadade weza mu kwijiya kwila Davidi wafu ni kwila, Jowabe o kabhitangu ka masoladi wafu we. Kyenyiki, Hadade wambela Falawó, wixi: “Ngehele kuvutuka mu ixi yami.”
22 Mukyenyiki, Falawó wa mwibhwidisa: “Ihi ya kukambe bhabha, yanda kubhangesa kuvutuka ku ixi yé?” Mwene wa mutambwijila wixi: “Ki kwa ngikambe kima, maji ngakudyondo, ngehele kuvutuka.”
23 Nzambi wabheka dingi nguma yamukwa kwa Solomá, Lezone mon’a Eliyada. Mwene walengele ngana yê Hadadezele, sobha ya Zoba.
24 Kyoso Davidi kyatolola o mayala akwa Zoba,* Lezone wabhongolola mayala yu wakituka mutwameni a mayala yá exile miyi. Mukusuluka, ene ayi ku Damasku, mwene yu wamateka kutumina mu mbanza ya Damasku.
25 Mwene wadibhange nguma ya Izalayele mu izuwa yoso ya Solomá, wabandekesa dingi ku maka abhekele Hadade. Kyoso Lezone kyexile mutumina o mbanza ya Sídya, mwene wazembele akwa Izalayele.
26 Jelobowamu mon’a Nebate, wabhukumukina* we o sobha. Mwene wexile mukwa Efalayíme ya Zelede, selevende ya Solomá. O manyâ wexile mutudi a mwixanene Zeluwa.
27 Mwene wabhukumukina o sobha mukonda dya kima kiki: Solomá wabhangele mulundu* yu watungulula* o Mbanza ya Davidi, tat’ê.
28 Jelobowamu wexile mukalakadi waswina. Kyoso Solomá kyamono kwila o munzangala wexile mukalakala ni kuswina, wamute ku pholo ya ikalakalu yoso yexile mubhanga mu dibhata dya Zuze.
29 Mu thembu yenyoyo, Jelobowamu watundu mu Jeluzaleme, o polofeta Ahiya mukwa Silo, wa musange mu kikoka. Ahiya wexile ni divunga dya ubhe, kiyadi kya exile ubheka ku mukáwu.
30 Ahiya wakwata o divunga dya ubhe dyazwatele, yu wa ditandujula mu dikwinyi ni kiyadi kya jimbandu.
31 Mukyenyiki, mwene wambela Jelobowamu, wixi:
“Xala ni dikwinyi dya jimbandu dya divunga didi, kuma Jihova o Nzambi ya Izalayele wambe kiki: ‘Nganda katula o utuminu bhu maku a Solomá, nganda kubhana dikwinyi dya miji.
32 Maji nganda muxisa ni mwiji umoxi, mukonda dya selevende yami Davidi ni mukonda dya Jeluzaleme o mbanza i ngasolo mwaxaxi ka miji a Izalayele.
33 Nganda bhanga kiki mukonda ene a ngibhana dikunda, ya a mubheza Axitolote o nzambi ya akwa Sidónya ni Kemoji o nzambi ya Mowabe ni Milikome o nzambi ya akwa Amone. Ene kende mu jinjila jami, kabhange o ima ya ngiwabhela ku mesu, kabelesela o itendelesu ni jingonge jami kala kyabhangele Davidi tata ya Solomá.
34 Maji-phe, kinganda mukatula o utuminu woso bhu maku mê. Nganda mweha kukala mutwameni izuwa yoso ya mwenyu wê mukonda dya selevende yami Davidi yó nga musolo, kuma mwene wabelesela o itumu yami ni jingonge jami.
35 Maji-phe, nganda katula o utuminu bhu maku a mon’a Solomá anga ngi kubhana dikwinyi dya miji.
36 Nganda bhana mwiji umoxi kwa mon’é mukonda dya selevende yami Davidi, phala bhukale mwanga ku pholo yami mu Jeluzaleme, o mbanza i ngasolo phala o dijina dyami.
37 Eme nganda kusola, eye wanda tumina o mundu woso, wanda kituka u sobha ya Izalayele.
38 Se u belesela o ima i nganda kutuma anga wenda jinga mu jinjila jami ni kubhanga o ima ya ngiwabhela, se u belesela o itumu ni jingonge jami kala kyabhangele selevende yami Davidi, eme wami nganda kala n’eye. Nganda kutungila dibhata dinangenena kala ki ngabhangele ni Davidi, nganda kubhanga u sobha ya Izalayele.
39 Kyenyiki, nganda kwatesa jisonyi ku mwiji wa Davidi, maji kijanda nangenena kate ku hádya.’”
40 Mukonda dyakiki, Solomá wasoto kujibha Jelobowamu, maji Jelobowamu walengela ku Ijitu yu wayi mudisanga ni Sizake sobha ya Ijitu. Mwene anga utunga ku Ijitu kate kyoso Solomá kyafu.
41 O yalungu ni ima yamukwa ya musoso wa Solomá, yoso yabhange ni unjimu wê ka isonekena mu divulu dya musoso wa Solomá?
42 Solomá watumina mu Jeluzaleme ni mu Izalayele yoso, mu makwinyi awana a mivu.
43 Mukusukaku, Solomá wafu ya a mufundila mu Mbanza ya Davidi, tat’ê. Mon’ê Lobowamu mwene wa mubhingana mu ungana.
Footnotes
^ Mba, “wa azolele.” Nange kitena kulombolola o iteka.
^ Mba, “o ahat’wê a mu funyisa kyavulu.”
^ Nvwale kakexile mutumina.
^ Mba nange, “wa mubatula o kwamwa.”
^ Mu Heba.: “wa ajibha.”
^ Mu Heba.: “kuleka o maku.”
^ Mba, “Milo.” Kizwelu mu dimi dya Hebalayiku kilombolola “kwizalesa.”
^ Mba nange, “kuzubha.”
