Divulu Dya Dyanga Dya Jisobha 12:1-33
12 Lobowamu wayile ku Xikeme mukonda Izalayele yoso yayile ku Xikeme phala ku mutumbika ku usobha.
2 Jelobowamu mon’a Nebate weza mu kwijiya o maka yá (mwene wakexile hanji ku Ijitu, kuma walengele ku Ijitu mukonda dya sobha Solomá, mwene watungile kwenyoko).
3 Kyenyiki, atumu ku mwixana. Mukusuluka, Jelobowamu ni Izalayele yoso ayi kwa Lobowamu ya a mwambela, exi:
4 “Tat’enu wabhonzesa kyavulu o mwenyu wetu. Maji se eye kubhonzesa o mwenyu wetu kala kyabhangele tat’enu anga u tubhana kutululuka, twanda kusidivila.”
5 Kyenyiki, mwene wa ambela wixi: “Ndenu! Mukubhita izuwa itatu vutukenu.” Mukiki, o mundu wayi.
6 Mukusuluka, sobha Lobowamu wayi mudikunda ni adyakime exile mubhana jindunge kwa tat’ê Solomá, kyoso kyexile hanji ku mwenyu. Mwene wa ebhwidisa, wixi: “Kyebhi ki ngatokala kutambwijila o mundu yú?”
7 Ene a mwambela, exi: “Ngana, se udibhanga u selevende ya mundu yú anga ubhanga yakubhingi ene ni kwatambwijila kyambote, ene anda kusidivila jinga.”
8 Maji mwene waditunu o jindunge ja adyakime yu wayi musota o jindunge ja minzangala akudile-nê kumoxi, exile o akwatekexi yê.
9 Mwene wa ebhwidisa, wixi: “Ndunge yebhi i mu ngibhana? Kyebhi ki ngatokala kutambwijila o mundu yú wa ngambela: ‘Kana kubhonzesa o mwenyu wetu kala kyabhangele tat’enu’?”
10 O minzangala akudile-nê kumoxi, a mutambwijila, exi: “O mundu wa kwambela kwila, ‘tat’enu wabhonzesa kyavulu o mwenyu wetu, maji eye u ngana watokala kubhebhulukisa o mwenyu wetu,’ eye watokala kwatambwijila kiki: ‘Eme nganda bhonzesa dingi o myenyu yenu, tat’etu ndenge.*
11 Tat’etu wabhonzesa o myenyu yenu, maji eme-phe nganda bhonzesa dingi o myenyu yenu. Tat’etu wa mibeta ni jixikote, eme nganda mibeta ni jixikote jala ni minya.’”
12 Jelobowamu ni mundu woso ayi muzwela ni Lobowamu mu kizuwa kya katatu, kala kyazwelele o sobha mu kwamba: “Mukubhita izuwa itatu vutukenu.”
13 Maji-phe o sobha watambwijila kyayibha o mundu mukonda kabhana mátwi ku jindunge ja adyakime.
14 Mu kukayela o jindunge ja minzangala, mwene wambe: “Tat’etu wabhonzesa kyavulu o myenyu yenu, maji eme nganda mibhonzesa kinene. Tat’etu wa mibeta ni jixikote, eme nganda mibeta ni jixikote jala ni minya.”
15 Kyenyiki, o sobha kevu o mundu, mukonda o ima yexile mubhita yatundu kwa Jihova, phala kukumbidila o izwelu yazwelele Jihova bhukaxi ka Ahiya mukwa Silo yalungu ni Jelobowamu mon’a Nebate.
16 Kyoso Izalayele yoso kyamono kwila o sobha ngwê kwabhana mátwi, o mundu wambela o sobha, wixi: “Mbandu yahi itwala-nayu kwa Davidi? Kitwala ni undundu kwa mon’a Jesé! Vutukenu ku jinzambi jenu, enu mu akwa Izalayele. Kindala Davidi alange o inzo yê!” Mukiki, akwa Izalayele avutuka ku jinzo jâ.*
17 Maji-phe, Lobowamu wasuluka ni kutumina o akwa Izalayele atungile mu jimbanza ja Judá.
18 Mukusuluka, sobha Lobowamu wa atumikisa Adolamu, wexile ku pholo ya yó a exanene phala kubhanga o ikalakalu ya sobha, maji akwa Izalayele a mububu ni matadi kate kyafu. O sobha Lobowamu watena kubanda ku dikalu dyê dya ita, yu walenge ku Jeluzaleme.
19 O akwa Izalayele abhukumukina o inzo ya Davidi, ya asuluka kyenyiki kate mu izuwa ya lelu.
20 Kyenyiki, kyoso akwa Izalayele kyevu kwila Jelobowamu wavutukile, adyongeka ya atumu ku mwixana anga a mubhanga sobha ya Izalayele. Séku muthu wazokela o inzo ya Davidi, kikale ngo o mwiji wa Judá.
21 Kyoso Lobowamu kyabhixila mu Jeluzaleme wongeka o kifuxi kya Judá ni mwiji wa Bejamí, kifwa hama ni makwinyi anake a midi a mazonda exile ni uhete* wa kubhanga o ita, phala kuya mulwa ni Izalayele ni kuvutwila o utuminu kwa Lobowamu mon’a Solomá.
22 Kyenyiki, o Nzambi yakidi wambela Semaya, o diyala dya Nzambi yakidi, wixi:
23 “Tangela kiki kwa Lobowamu mon’a Solomá, sobha ya Judá ni ku inzo yoso ya Judá ni dibhata dya Bejamí ni ku mundu woso:
24 ‘Jihova wambe kiki: “Kanenu kuya mulwa ni jiphange jenu, akwa Izalayele. Kala muthu avutuke kubhata dyê, kuma éme ngabhangesa o ima yiyi kubhita.”’” Kyenyiki, ene abelesela o kizwelu kya Jihova, ya avutuka ku mabhata mâ kala kya atumine Jihova.
25 Jelobowamu watungu o mbanza ya Xikeme ku milundu ya Efalayíme, anga ukala kwenyoko. Mukusuluka, watundu ku Xikeme yu watungu ku Penuwele.
26 Jelobowamu wazwela ku muxima wê, wixi: “Kindala o utuminu wanda vutuka ku dibhata dya Davidi.
27 Se o mundu yú usuluka mu kubanda mu Jeluzaleme phala kubhakula jisata mu inzo ya Jihova, o muxima wa mundu yú wanda lunguluka, anda vutuka kwa ngana yâ Lobowamu, o sobha ya Judá. Mukiki, ene anda ngijibha anga avutuka kwa Lobowamu, sobha ya Judá.”
28 Kyazubha kudikunda ni yó ene mu mubhana jindunge, o sobha wabhange iteka iyadi ya tungombe ya ulu, yu wambela o mundu, wixi: “Kyene mu mibhonza kyavulu kubanda ku Jeluzaleme. Enu mu akwa Izalayele, talenu, yiyi o Nzambi yenu ya mikatula mu ixi ya Ijitu.”
29 Kyenyiki, mwene watula kiteka kimoxi kya kangombe ku Betele, o kya mukwa wakitula ku Dane.
30 Kiki kyabhangesa o mundu kuta kituxi, ene exile muya kate ku Dane phala kubheza o kiteka kya kangombe.
31 Mwene watungu jinzo ku milundu phala kubhezela-mu o jinzambi jiji, yu wasolo mayala katokalele ku mwiji wa Levi phala kukala akunji.
32 Jelobowamu anga ubhanga fesa mu mbeji ya kanake, mu kizuwa kya dikwinyi ni katanu. O fesa yiyi yadifu ni yakexile mubhanga mu Judá. Mu kalatódyu kabhangele ku Betele kwene kwexile mubhakula jisata ku kiteka kya tungombe twabhangele mwene. Ku Betele mwene wasolo akunji phala kusidivila mu jinzo jatungile mwene.
33 O mu kizuwa kya dikwinyi ni katanu, kya mbeji ya kanake, o mbeji yasolele mwene, wamateka kubhakula jisata ku kalatódyu kabhangele ku Betele. Mwene watendelesa o mundu wa Izalayele phala kuya ni kubhanga jinga o fesa yabhangele mu kizuwa kyenyokyo, yu wayi ku kalatódyu mubhakula jisata ni kubandesa o dixi dya jisata.
Footnotes
^ Mu Heba.: “o mulembu wami wofele wanda koma dingi, o kinyonga kya tat’etu ndenge.”
^ Mu Heba.: “mu jibalaka.”
^ Mu Heba.: “a asolo.”
