Divulu Dya Dyanga Dya Jisobha 14:1-31
14 Mu thembu yenyoyo, Abiya mon’a Jelobowamu, wakatele.
2 Kyenyiki, Jelobowamu wambela muhat’wê, wixi: “Zwata mu ukexilu wa kwila, kibhukale muthu u kutungununa kwila u muhat’wami ni uye ku Silo. Polofeta Ahiya kwene kwala. Mwéne wa ngitangele kwila ngeji kituka ngi sobha ya mundu yú.
3 Uya kwa mwene, ambata dikwinyi dya jimbolo, jibolo ni wiki. Mwene wanda kutangela ihi yanda bhita ni kambonga.”
4 O muhatu wa Jelobowamu wabhange ya mutendelesa. Mwene wayi kate ku Silo yu wabhixila ku dibhata dya Ahiya. O mesu a Ahiya a fwefwetele kya, kexile mumona dingi kyambote mukonda dya kukuka.
5 Maji-phe, Jihova wambele Ahiya, wixi: “O muhatu wa Jelobowamu yu wiza phala ku kwibhwidisa yalungu ni mon’ê, kuma mon’ê wakate. Nganda kutangela ihi i watokala o kuzwela* kyoso kyanda bhixila. Mwene wadibhange kala muthu wengi.”
6 Kyenyiki, Ahiya wevu muthu kubokona, yu wambe: “Bokoné u muhatu wa Jelobowamu. Mukonda dyahi wa mudisweka? A ngitumu ku kutudila njimbu yayibha.
7 Ndé, wambela kiki kwa Jelobowamu: ‘Jihova o Nzambi ya Izalayele wambe kiki: “Eme ngakusolo mwaxaxi ka mundu phala ukale mutwameni wa mundu wami Izalayele.
8 Ngakatula o utuminu ku dibhata dya Davidi, eme nga kubhana-wu. Maji eye kusokela ni selevende yami Davidi, mukonda mwene wabhake o itumu yami, wa ngikayela ni muxima woso, mu kubhanga ngo yoso ya ngiwabhela ku mesu.
9 O kima ki wabhange kyayibha kinene, o ima yabhangele o jisobha jamukwa ja kudyangela ndenge. Eye wabhange jinzambi phala eye ni kiteka kya felu phala ku ngixinga, eye wa ngibhana dikunda.
10 Mukonda dya kiki, nganda bheka wíndwa mu dibhata dya Jelobowamu. Nganda jibha mu Izalayele o mayala* oso atokala ku dibhata dya Jelobowamu. Nganda bwika* enyoso kate mwene ni yó kala ni valolo mu Izalayele. Nganda komba o dibhata dya Jelobowamu kala kyakomba o matobe, kikwanda subhuka kima.
11 O atokala mu dibhata dya Jelobowamu anda fwila mu mbanza, anda ku adya ku jimbwa. O yó anda fwila mu mukáwu, anda ku adya ku jinjila jibhita bhulu, kuma Jihova mwene wa kyambe.”’
12 “Balumuka kindala, uvutuke kubhata dyé. Kyoso ki wanda bhixila mu mbanza, o kambonga kanda fwa.
13 Athu oso mu Izalayele anda mudila ni ku mufunda. Ku mwiji wa Jelobowamu mwéne ngo anda mufunda mu mbila, mukonda mu dibhata dya Jelobowamu mwéne ngo a musange ni kima kyambote ku muxima kwala Jihova o Nzambi ya Izalayele.
14 Kyoso kyanda bhixila o kizuwa kiki, Jihova wanda bheka sobha mu Izalayele phala kubwika* o mwiji wa Jelobowamu. Mukidi, kiki kya mubhita kya.
15 Jihova wanda kaxtikala akwa Izalayele. Ene anda kala kála o muxi ku thandu a menya ki ukala mu jinguluka. Wanda katula o akwa Izalayele mu ixi yiyi yambote yabhanene ku jikuku jâ anga u a mwanga ku mbandu yamukwa ya ngiji ya Ewufalate,* mukonda abhangele jiphiladi jikôla* phala kuxinga Jihova.
16 Mwene wanda bwazeka Izalayele mukonda dya ituxi ya Jelobowamu ni mukonda dya kubhangesa Izalayele kuta kituxi.”
17 O muhatu wa Jelobowamu wabalumuka yu wavutuka ku Tidiza. Kyoso kyabhixila bhu mwelu wa inzo, o kambonga kafu.
18 Kyenyiki, ene a mufundu. Akwa Izalayele adidi, kala kyazwelele Jihova bhukaxi ka polofeta yê Ahiya.
19 O misoso yamukwa yalungu ni Jelobowamu, kyebhi kya lwu ita ni kyebhi kyatumina, a isoneka mu divulu dya misoso ya izuwa ya jisobha ja Izalayele.
20 Jelobowamu watumina mu makwinyi ayadi ni kiyadi kya mivu. Mukusuluka, mwene wafu, mon’ê Nadabe, mwéne wakituka sobha bhu kididi kyê.
21 Kyenyiki, Lobowamu mon’a Solomá wakituka sobha ya Judá. Lobowamu wexile ni makwinyi awana ni umoxi a mivu kyoso kyakituka sobha, yu watumina mu dikwinyi ni sambwadi dya mivu mu Jeluzaleme, o mbanza yasolo Jihova mwaxaxi ka mwiji wa Izalayele phala kwambata o dijina dyê. O dijina dya manya Lobowamu dyexile Nahama, mukwa Amone.
22 Akwa Judá exile mubhanga ima yayibha ku mesu a Jihova, mukonda dya ituxi yatele, ene abeta ku mulokalala o jikuku jâ ndenge.
23 Ene atungu ididi phala kubhezela-mu, atungu ididi ya matadi, iteka ni jiphiladi phala ku jibheza ku milundu yoso ni bhoxi dya mixi yamakota.
24 Mu ixi mwexile we mala akexile mubhanga undumbu mu tembulu. Ene exile mubhanga ima yayibha yexile mubhanga o ifuxi yakayele Jihova bhu pholo ya Izalayele.
25 Mu muvu wa katanu wa utuminu wa sobha Lobowamu, Sizake sobha ya Ijitu weza mulwa ita ni akwa Jeluzaleme.
26 Mwene wambata o jimbote joso jexile mu inzo ya Jihova ni jimbote joso jexile mu inzo ya sobha. Wambata o ima yoso kate mwene ni jingubu ja ulu jabhangele Solomá.
27 Mukonda dyakiki, o sobha Lobowamu wabhange jingubu ja ngondo phala ku jibhinganesa, yu wa jibhana ku atwameni a alangidi exile mulanga o dibhitu dya inzo ya sobha.
28 Ithangana yoso kyoso o sobha kyexile muya mu inzo ya Jihova, o alangidi exile mukwambata o jingubu, mukusuluka avutuka-naju mu dixilu dya alangidi.
29 O misoso yamukwa yalungu ni Lobowamu ni yoso yabhange, a isoneka mu divulu dya misoso ya izuwa ya jisobha ja Judá.
30 Ithangana yoso kwexile ita bhukaxi ka Lobowamu ni Jelobowamu.
31 Mukusuka-ku, Lobowamu wafu ya a mufundu bhu kididi bhwa fundile o jikuku jê, mu Mbanza ya Davidi. O dijina dya manyâ dyexile Nahama, mukwa Amone. O mon’ê Abiyamu* mwéne wa mubhingana ku usobha.
Footnotes
^ Mba, “eye watokala kumutangela kiki ni kiki.”
^ Mu Heba.: “oso yó asusa ku ilumbu.” Mu Hebalayiku, o kizwelu kiki kilombolola kusebhulula, kyene kyalungu ni mayala.
^ Mu Heba.: “kujibha.”
^ Mu Heba.: “kujibha.”
^ Mu Heba.: “ya Ngiji.”
^ Tala o Dilombolwelu.
^ Amwixanene we Abya.
