Divulu Dya Dyanga Dya Jisobha 15:1-34
15 Ku muvu wa dikwinyi ni kanake wa utuminu wa sobha Jelobowamu, mon’a Nebate, Abiyamu* wakituka sobha ya Judá.
2 Mwene watumina mu mivu itatu mu Jeluzaleme. O dijina dya manyâ, dyexile Mahaka mulawula wa Abisalone.
3 Abiyamu wate o ituxi yatele tat’ê, kakexile musidivila Jihova Nzambi yê ni muxima woso, kala kyabhangele kuk’wê Davidi.
4 Maji mukonda dya Davidi, Jihova Nzambi yê, waxisa o mbutu* yê phala ku mubhingana n’a tumina mu Jeluzaleme phala o Jeluzaleme ki ijimuke.
5 Mukonda Davidi wabhange yoso yafwama ku mesu a Jihova ku mwenyu wê woso, kabhukumukina né ngo kitendelesu kimoxi kya mubhana, kikale ngo o maka a lungu ni Udiya mukwa Hiti.
6 Anga kukala jinga ita mwaxaxi ka Lobowamu ni Jelobowamu mu izuwa yoso ya mwenyu wê.
7 O yalungu ni musoso wa Abiyamu ni yoso yabhange a isoneka mu divulu dya misoso ya izuwa ya jisobha ja Judá. Kwexile we ita mwaxaxi ka Abiyamu ni Jelobowamu.
8 Mukusukaku, Abiyamu wafu, ya a mufundu mu Mbanza ya Davidi. Mon’ê Aza, mwéne wa mubhingana ku usobha.
9 Kyoso Jelobowamu kyatenesa makwinyi ayadi a mivu ni kutumina kala sobha mu Izalayele, Aza wamateka kutumina ku Judá.
10 Mwene watumina mu makwinyi awana a mivu ni umoxi mu Jeluzaleme. O dijina dya kuk’wê, dyexile Mahaka, mulawula wa Abisalone.
11 Aza wabhange ima yambote ku mesu a Jihova, kala kyabhangele kuk’wê Davidi.
12 Mwene wakaye mu ixi o mala oso akwa kubhanga undumbu mu tembulu, yu wabulu o iteka yabhangele o jikuku jê.
13 Kate mwene kuk’wê, Mahaka, Aza wa mukatula ku kididi kyê kya mvwale mukonda wabhangele kiteka kikwatesa jisonyi phala kukibheza mu ididi ya kubhezela.* Mwene wabulu o kiteka kiki, yu wakyohela mu honga ya Kidelone.
14 Maji mwene kabulu o ididi ya kubhezela, maji Aza wasidivila Jihova ni muxima woso mu izuwa yoso ya mwenyu wê.
15 Mwene wambata o imbamba yoso mu inzo ya Jihova, yabhangele mwéne ni tat’ê kala ima ikôla. Phalata, ulu ni imbamba yamukwa.
16 Ithangana yoso, Aza ni Bahasa sobha ya Izalayele, exile mulwa ita.
17 Kyenyiki, Bahasa, sobha ya Izalayele weza mulwa ita ni akwa Judá, yu wamateka kutungulula o mbanza ya Lamá, phala kehele muthu kutunda mba kubokona* mu mbambe ya Aza, sobha ya Judá.
18 Kyenyiki, Aza wakatula o phalata yoso ni ulu yoso yasubhukile ku jimbote mu inzo ya Jihova ni mu inzo ya sobha, yu wa ibhana ku jiselevende jê. Mukusuluka, Aza watumikisa o jiselevende jê kwa Bene-Hadade, mon’a Tabidimone, mon’a Heziyone, sobha ya Sídya, watungile ku Damasku ni njimbu mu kwamba:
19 “Sayi-ku kikutu bhukaxi kami n’eye ni bhukaxi ka tata yami ni tat’é. Nga mu kutumikisa phalata ni ulu kala ujitu. Batula o kikutu kya ukamba ni Bahasa, sobha ya Izalayele phala mwene atunde mu mbambe ya ixi yami.”
20 Bene-Hadade wabhange o kima kya mubhingi sobha Aza, yu watumikisa o jikabhitangu ja masoladi phala kubhanga ita ni akwa Izalayele. Ene abhânge ni akwa Ijone, akwa Dane, akwa Abele-Bete-Mahaka, akwa Kinelete ni ixi yoso ya Nafitali.
21 Kyoso Bahasa kyeza mu kwijiya o ima yiyi weha kutungulula o mbanza ya Lamá, yu wasuluka kutunga ku Tidiza.
22 Kyenyiki, sobha Aza wexana akwa Judá oso, kikuxala muthu. Ene akatula o matadi ni mabaya ku Lamá, exile mutungulula-nawu sobha Bahasa. Ni mabaya yá, sobha Aza watungulula o mbanza ya Jeba ku Bejamí ni Mixipa.
23 Ima yoso yalungu ni musoso wa Aza, o kutena kwê ni ima yoso yabhange ni jimbanza jatungu, a isoneka mu divulu dya musoso ya thembu ya jisobha ja Judá. Maji kyoso kyakuka, mwene wakatele o inama.
24 Mukusuka-ku, Aza wafu, ya a mufundu bhu kididi bhwa fundile o jikuku jê, mu Mbanza ya Davidi. O mon’ê Jehozafate wa mubhingana bhu kididi kyê kya ungana.
25 Nadabe mon’a Jelobowamu wakituka sobha ya Izalayele mu muvu wa kayadi wa utuminu wa Aza sobha ya Judá yu watumina mu Izalayele mu mivu iyadi.
26 Mwene wexile mubhanga ima yayibha ku mesu a Jihova, wexile mukwenda mu njila ya tat’ê ni kuta o ituxi yatele tat’ê, yabhangesa we Izalayele kuta ituxi.
27 Bahasa mon’a Ahiya, watokala kudibhata dya Isakale, walungulukila Nadabe, Bahasa anga u mujibha ku Ngibetone, o mbanza yatokalele ku akwa Fidíxa, kyoso Nadabe ni Izalayele yoso kya kondolokele Ngibetone.
28 Kyenyiki, Bahasa wa mujibha mu muvu wa katatu wa utuminu wa Aza, sobha ya Judá, yu wa mubhingana mu ungana.
29 Kyoso mwene kyakituka sobha, wajibha o athu oso atokalele ku mwiji wa Jelobowamu. Mwene keha muthu ku mwiji wa Jelobowamu kulenga. Wajibha enyoso kala kyambele Jihova bhukaxi ka selevende yê, Ahiya mukwa Silo.
30 Kiki kyabhiti, mukonda dya ituxi ya Jelobowamu ni mukonda dya kubhangesa Izalayele kuta ituxi ni mukonda dya kubhekesa njinda yavulu kwa Jihova, o Nzambi ya Izalayele.
31 O yalungu ni musoso wa Nadabe ni yoso yabhange, a isoneka mu divulu dya misoso ya izuwa ya jisobha ja Izalayele.
32 Ithangana yoso, kwexile ita mwaxaxi ka Aza ni Bahasa o sobha ya Izalayele.
33 Mu muvu wa katatu wa utuminu wa Aza, sobha ya Judá, Bahasa mon’â Ahiya, wakituka sobha ku Tidiza phala kutumina Izalayele, watumina makwinyi ayadi ni kiwana kya mivu.
34 Maji mwene wabhange ima yayibha ku mesu a Jihova, wende mu jinjila jendele Jelobowamu ni mu ituxi yatele mwene, yabhangesa we akwa Izalayele kuta ituxi.
Footnotes
^ Amwixana we Abya.
^ Mu Heba.: “wa mubhana kandeya.”
^ Tala o Dilombolwelu.
^ Mu Heba.: “kutunda ni kuboka kate.”
