Divulu Dya Dyanga Dya Jisobha 16:1-34
16 Kyenyiki-phe, Jehu mon’a Hanani, watambula o kizwelu kya Jihova phala kukitudila Bahasa, mu kwamba:
2 “Eme nga kubalumuna mu uthôkwa, eme nga kubhange u mutwameni wa mundu wami Izalayele. Maji eye wasuluka mukwenda mu jinjila ja Jelobowamu, eye wabhangesa o mundu wami Izalayele kuta ituxi, ene anga a ngithathamesa ni ituxi yâ.
3 Nganda bwika Bahasa ni mwiji wê woso. Nganda bhanga ku mwiji wê kala ki ngabhange ku mwiji wa Jelobowamu mon’a Nebate.
4 O akwa inzo ya Bahasa anda fwila mu mbanza, anda ku adya ku jimbwa, o yó anda fwila mu mukáwu anda ku adya ku jinjila jibhita bhulu.”
5 Yalungu ni musoso wa Bahasa, o ima yoso yabhange ni kutena kwê, a isoneka mu divulu dya misoso ya izuwa ya jisobha ja Izalayele.
6 Mukusuka-ku, Bahasa wafu, a mufundu ku Tidiza. O mon’ê Elahe mwéne wa mubhingana mu utuminu.
7 Jihova watumu we polofeta Jehu mon’a Hanani kutangela o kifundisu kiki kyalungu ni inzo ya Bahasa, mukonda dya ima yoso yayibha yabhangele Bahasa bhu pholo ya Jihova phala ku muthathamesa, kala kyabhangele Jelobowamu ni mukonda dya Bahasa kujibha* Jelobowamu.
8 Mu muvu wa makwinyi ayadi ni kisamanu wa utuminu wa Aza sobha ya Judá, Elahe mon’a Bahasa wakituka sobha ya Izalayele ku Tidiza, yu watumina mu mivu iyadi.
9 Nzidi, o selevende ya sobha wexile mutumina kaxaxi ka makalu a ita, walungulukila o sobha kyoso mwene kyexile munwa ni kukodiwa ku Tidiza mu inzo ya Alaza, o mutwameni wa inzo ya sobha* ku Tidiza.
10 Nzidi wabokona, yu wajibha o sobha, ku muvu wa makwinyi ayadi ni sambwadi wa utuminu wa Aza sobha ya Judá, yu wakituka sobha bhu kididi kyê.
11 Kyoso Nzidi kyakituka sobha yu waxikama ku kyandu, mwene wajibha o athu oso atokalele mu inzo ya Bahasa. Kaxisa-ku né ngo diyala* dimoxi, kikale jindandu* mba makamba.
12 Kyenyiki, Nzidi wabwika o mwiji woso wa Bahasa, kala kyazwelele Jihova yalungu ni Bahasa bhukaxi ka polofeta Jehu.
13 Kiki kyabhiti mukonda dya ituxi yatele Bahasa ni mon’ê Elahe, yabhangesa we akwa Izalayele kuta kituxi ni kuthathamesa Jihova, o Nzambi ya Izalayele ni iteka yê yakambe o valolo.
14 Yalungu ni musoso wa Elahe ni yoso yabhange mwene, a isoneka mu divulu dya misoso ya izuwa ya jisobha ja Izalayele.
15 Mu muvu wa makwinyi ayadi ni sambwadi wa utuminu wa Aza sobha ya Judá, Nzidi wakituka sobha yu watumina mu sambwadi dya izuwa ku Tidiza, kyoso o masoladi kyabatamene phala kubhânga ni akwa Ngibetone atokalele ku akwa Fidíxa.
16 Kyenyiki, o masoladi abatamene, evu kuzwela kwila, “Nzidi walungulukila o sobha yu wa mujibha.” Mukiki, mu kizuwa kyenyokyo o akwa Izalayele exile bhenyobho, atumbika Omidi kala sobha ya Izalayele.
17 Omidi ni Izalayele yoso atundu ku Ngibetone ya akondoloka o mbanza ya Tidiza.
18 Kyoso Nzidi kyamono kwila o mbanza a itolola, mwene wabokona mu inzo ya sobha yu wate túbhya anga ufwila mwenyomo.
19 Kiki kyabhiti mukonda dya ituxi yatele mwene, ya kubhanga ima yayibhila Jihova ni mukonda dya kwenda mu njila ya Jelobowamu mu kubhangesa akwa Izalayele kuta ituxi.
20 Yalungu ni musoso wa Nzidi ni kyebhi kyabalukila o sobha, a isoneka mu divulu dya misoso ya izuwa ya jisobha ja Izalayele.
21 Mukonda dyakiki-phe, o mundu wa Izalayele wadiwane mu mbandu jiyadi. O mbandu imoxi yexile muzokela Tibini mon’a Jinate, ya amesenene ku mutumbika ku usobha. O mbandu ya mukwa yexile muzokela Omidi.
22 Maji o mundu wexile muzokela Omidi atolola o mundu wexile muzokela Tibini mon’a Jinate. Kyenyiki, Tibini wafu, Omidi wakituka sobha.
23 Ku muvu wa makwinyi atatu ni umoxi wa utuminu wa Aza sobha ya Judá, Omidi wakituka sobha ya Izalayele, yu watumina mu dikwinyi ni kiyadi kya mivu. Ku Tidiza watumina-ku mivu isamanu.
24 Mwene wasumbu o mulundu wa Semele ku Samadiya mu jitalendu* jiyadi ja phalata, yu watungu-ku mbanza. O mbanza wa iluku o dijina dya Samadiya* mukonda dya Semele wavu* o mulundu.
25 Omidi wexile mubhanga ima yayibhila Jihova. Mwene wabetele kota mukubhanga ima yayibha, o jisobha ja mudyangele ndenge.
26 Mwene watele we o ituxi yatele Jelobowamu mon’a Nebate, yabhangesele we Izalayele kuta ituxi mu kuthathamesa Jihova o Nzambi ya Izalayele ni iteka yê yakambe o valolo.
27 Yalungu ni musoso woso wa Omidi, o ima yabhange ni kutena kwê, a isoneka mu divulu dya misoso ya izuwa ya jisobha ja Izalayele.
28 Mukusuka-ku, Omidi wafu, a mufundu ku Samadiya. Mon’ê Akabe mwéne wa mubhingana mu utuminu.
29 Akabe mon’a Omidi, wakituka sobha ya Izalayele mu muvu wa makwinyi atatu ni dinake wa utuminu wa Aza sobha ya Judá. Tunde ku Samadiya, Akabe mon’a Omidi, watumina Izalayele mu makwinyi ayadi ni kiyadi kya mivu.
30 Akabe mon’a Omidi, wabetele kota mu kubhanga ima yayibha bhu pholo ya Jihova, o jisobha joso ja mudyangele ndenge.
31 Akabe wate o ituxi yatele we Jelobowamu mon’a Nebate, maji wabandekesa-ku dingi mu kukazala ni Jezabele, mon’a Etibahale sobha ya Sidónya, yu wamateka kusidivila Bahale ni ku mufukamena.
32 Mwene wabhange we kalatódyu phala Bahale, mu inzo* ya Bahale yatungile mwene ku Samadiya.
33 Akabe wabhange we o kiteka phala ku kibheza.* Akabe wathathamesa dingi Jihova o Nzambi ya Izalayele, o jisobha joso ja dyangele kutumina Izalayele ndenge.
34 Mu izuwa ya Akabe, Hiyele o mukwa Betele, watungulula o mbanza ya Jedikó. Mukuta o kaboko ka mbanza, o mon’ê wa dyanga Abilamu wafu, mukuta o mabhitu a mbanza, o kasule kê Sengube wafu, kala kyazwelele Jihova bhukaxi ka Jozuwé mon’a Nune.
Footnotes
^ Kifwa, wajibhile Nadabe mon’ â Jelobowamu.
^ Mu Heba.: “yó wexile o kimbadi kya inzo.”
^ Mu Heba.: “muthu ususa ku ilumbu.” Mu Hebalayiku, o kizwelu kiki kilombolola kusebhulula, kyene kyalungu ni mayala.
^ Mba, “muzokedi wa manyanga.”
^ Talendu imoxi yasokele 34.2 ya jikilu. Tala o Kiba. B14.
^ Dilombolola, “yatokala ku mwiji wa Semele.”
^ Mu Heba.: “ngana ya.”
^ Mba, “mu tembulu.”
^ Tala o Dilombolwelu.
