Divulu Dya Dyanga Dya Jisobha 17:1-24
17 Elija* o Tejibita watungile ku Ngiliyade. Mwene wambela Akabe, wixi: “Kala Jihova o Nzambi ya Izalayele kyene ku mwenyu, u ngene mu musidivila,* kikwanda kala né mbundu né mvula mu mivu yiyi, kikale ngo se ngikituma.”
2 Jihova wambela Elija, wixi:
3 “Tunda mu kididi kiki, ndé ku mbandu kutundila o dikumbi udisweke mu honga ya Kedite, yala ku Njolodá ku mbandu kutundila o dikumbi.
4 Watokala kunwa o menya a kangiji, eme nganda tumina o ilombelombe ku kubhekela kudya.”
5 Mu kithangana kyenyokyo mwene wayi yu wabhange kala kya mutendelesa Jihova. Mwene wayi yu wadisweka mu honga ya Kedite, yala ku Njolodá ku mbandu kutundila o dikumbi.
6 O ilombelombe yexile mu mubhekela mbolo ni xitu mu kamene ni mu ngoloxi, yu wexile munwa o menya a kangiji.
7 Maji-phe, mukubhita tu izuwa, o kangiji ka kukuta mukonda mu ixi kimwexile munoka.
8 Jihova wambela dingi Elija, wixi:
9 “Ndé ni lusolo ku Salefá mu ixi ya Sidónya, ukale kwenyoko. Nganda tumina mutudi ku kubhana kudya.”
10 Kyenyiki, mwene wabalumuka yu wayi ku Salefá. Kyabhixila bhu mwelu wa mbanza, wasange mutudi wexile muxanga jihwinyi. Mwene wamwixana yu wa mwambela: “Ngakudyondo, ngibhekele tumenya ni nginwe.”
11 Kyoso o muhatu kyexile muya mutakana o menya, mwene wa mwixana yu wa mwambela: “Ngakudyondo, ngibhekele kakibhasu ka mbolo.”
12 Kyenyiki, o muhatu wambela Elija, wixi: “Kala Jihova Nzambi yé wene ku mwenyu, ngikutangela o kidi kwila, kingala ni mbolo, ngala ngo ni tufadinya mu disanga dyadikota ni tumáji mu disanga dyofele. Nga muxanga o jihwínyi jiji ni ngiye ku bhata mulamba kama koso-koso phala eme ni mon’ami. Twanda dya, anga twanda fwa.”
13 Kyenyiki, Elija wa mwambela, wixi: “Kukale ni wôma. Ndé kubhata, bhanga kala ki wambe. Maji kya dyanga u ngibhangela kambolo ni u ngibhekele-naku. Mukusuluka, utena kya kulamba kama koso-koso phala eye ni mon’é.
14 Kuma Jihova o Nzambi ya Izalayele wambe kiki: ‘O fadinya yala mu disanga dyadikota kiyanda bhwa, o máji ala mu disanga dyofele kanda bhwa we, kate mu kizuwa kyanda bhangesa Jihova kunoka mvula mu ixi.’”
15 Kyenyiki, mwene wayi yu wabhange kala kya mwambela Elija. Mwene ni polofeta ni mwiji we exile ni kudya mu izuwa yavulu.
16 O fadinya mu disanga dyadikota ki yabhu, o máji mu disanga dyofele kabhu we kala kyambele Jihova bhukaxi ka Elija.
17 Mukusuluka, o mona wa muhatu mwenyú wakate, o uhaxi wayi ni kudibandekesa kate mwene kyafu.
18 Mukiki, mwene wambela Elija, wixi: “Ihi i ngakubhange eye u diyala dya Nzambi? Eye weza kubhata dyami phala ku ngilembalesa o ituxi yami ni kujibha mon’ami?”
19 Maji mwene wa mwambela: “Ngibhane mon’é.” Kyenyiki, Elija wakatula o mona wexile bhu homba ya muhatu yu wabande-nê mu dixilu dyexile ku thala dya inzo bhwa muzalela, yu wa muzekesa bhu hama yê.
20 Mwene wadyondela Jihova, mu kwamba: “Jihova Nzambi yami, o kwila wa mubheka we divuwa ku mutudi wa ngizalela mu ku mujibhila o mona?”
21 Bhenyobho, Elija udizala lutatu ku mukutu wa mona, yu wadyondela Jihova, wixi: “Jihova Nzambi yami, ngakudyondo, bhangesa o mona yú kuvutuka ku mwenyu.”
22 Jihova wevu o musambu wa Elija, o mona wavutuka dingi ku mwenyu.
23 Elija wakwata o mona yu watundu-nê mu xilu dyexile ku thala dya inzo, wa mubhana kwa manyâ. Elija wambe: “Tala! O mon’ê wavutuka ku mwenyu.”
24 Kyenyiki, o muhatu wambela Elija, wixi: “Kindala ngejiya kwila eye u diyala dya Nzambi mwene, o ima i wazwela yatundu kwa Jihova, yakidi mwene.”
