Divulu Dya Dyanga Dya Jisobha 18:1-46
18 Mukubhita thembu, kifwa ku muvu wa katatu, Jihova wambela Elija, wixi: “Ndé kwa Akabe, nganda bheka mvula mu ixi.”
2 Kyenyiki, Elija wayi mudilondekesa kwa Akabe, kyoso ku Samadiya kwexile nzala yavulu.
3 Akabe wexana Obadiya wexile mulanga o dibhata. (Obadiya wexile muxila kyavulu Jihova.
4 Kyoso Jezabele kyexile mujibha o jipolofeta ja Jihova, Obadiya wasweka hama ya jipolofeta mu dibanda mu ibuka ya makwinyi atanu, yu wexile mu abhana mbolo ni menya.)
5 Akabe wambela Obadiya, wixi: “Nyunga o ixi yoso, ndé ku jifixi joso ja menya ni mu jihonga joso. Nange wanda sanga-mu kudya kwasoko phala o jikabalu ni jimula, phala o ibhaku yetu yoso ki ifwe.”
6 Kyenyiki, adiwane o jimbandu ja ixi jeji nyunga. Akabe wayi ubheka we mu njila yê, Obadiya wayi we ubheka we mu njila yengi.
7 Kyoso Obadiya kyayi ni kwenda, Elija weza mu disanga-nê. Kyoso Obadiya kyamono Elija, wa mufukamena ni pholo bhoxi, yu wa mwibhwidisa: “O kwila eye u ngana yami Elija?”
8 Mwene wa mutambwijila, wixi: “Xe, éme mwene. Ndé utangele ngana yé o sobha kwila, ‘Elija wala bhabha.’”
9 Maji Obadiya wa mutambwijila wixi: “Ngana yami, kituxi kyahi ki ngate ki kubhangesa ku ngibhakula bhu maku a Akabe n’a ngijibhe?
10 Kala Jihova Nzambi yé kyene ku mwenyu, o sobha watumu ku kusota mu ifuxi yoso ni mu mautuminu moso. Kyoso ene kyakexile muzwela: ‘Mwene kala kuku.’ O sobha wexile mutumina o athu a ifuxi yenyiyi ni mautuminu kuloka kwila, alembwa o ku kusanga.
11 Kindala wa mu ngitangela kwila: ‘Ndé utangele ngana yé o sobha kwila: “Elija wala bhabha.”’
12 Kyoso ki ngandaya, o nzumbi ya Jihova yanda ku kwambata bhu kididi bhu ngakambe kukijiya. Kyoso ki nganda tangela Akabe anga ukamba ku kusanga, mukidi, mwene wanda ngijibha. Maji-phe, eme ngi selevende yé ngene muxila Jihova tunde mu unzangala wami.
13 Ngana yami, kakutangela o ima i ngabhange kyoso Jezabele kyexile mujibha o jipolofeta ja Jihova? Kakutangela se kyebhi ki ngasweka o hama ya jipolofeta ja Jihova mu ibuka iyadi ya makwinyi atanu mu dibanda, ni kwabhana mbolo ni menya?
14 Maji kindala, eye u ngana wa mu ngitangela kwila: ‘Ndé utangele ngana yé o sobha, kwila: “Elija wala bhabha.’”Ngi kutangela ni kidi kyoso kwila, mwene wanda ngijibha.”
15 Kyenyiki, Elija wambe: “Kala Jihova o Nzambi ya ifuxi, u ngene mu musidivila* wene ku mwenyu, lelu nganda dibhakula kwa Akabe.”
16 Obadiya anga uya kwa Akabe, yu wa mutudila o njimbu. Akabe wayi mudisanga ni Elija.
17 Kyenyiki, kyoso Akabe kyamono Elija, mwene wambe: “Mbe eye! Eye wabheka divuwa dyadikota mu Izalayele.”
18 Kyenyiki, Elija wa mutambwijila: “K’eme ngabheka o divuwa didi mu Izalayele, eye ni mwiji wa tat’é, énu mwala ni kikuma. Mukonda kimukayela o itumu ya Jihova, maji mwa mubheza o iteka ya Bahale.
19 Kindala ongeka o Izalayele yoso ku mulundu wa Kalumelu, exana we o hama jiwana ni makwinyi atanu a jipolofeta ja Bahale ni hama jiwana ja jipolofeta ene mubheza o iteka, ene mudya ku meza a Jezabele.”
20 Kyenyiki, Akabe watumikisa mayala phala kutudila njimbu ku mundu woso wa Izalayele, yu wexana o jipolofeta ku mulundu wa Kalumelu.
21 Mukusuluka, Elija wazukama ku mundu yu wa ambela: “Kate bhwebhi mwanda kala ni jiphata, mu kusola ima iyadi ki idifu? Se Jihova mwene o Nzambi yakidi, mukayelenu. Maji se Bahale, mukayelenu.” O mundu-phe wadixibha, kazwela kima.
22 Elija wambela o mundu wixi: “Eme ngo ngasubhuka-ku ku jipolofeta ja Jihova, maji kwala hama jiwana ni makwinyi atanu a jipolofeta ja Bahale.
23 Abheke tungombe tuyadi. Ene asole-bhu kangombe, akabatule mu jithumba-jithumba, ajitule ku thandu dya jihwínyi. Maji katokala kuwika-bhu túbhya. Eme wami nganda batujula o kangombe kamukwa, nganda kukatula ku thandu dya jihwínyi maji kinganda wika-ku túbhya.
24 Mukusuluka, dikolenu mu dijina dya nzambi yenu, eme nganda dikola mu dijina dya Jihova. O Nzambi utambwijila mu kutumikisa túbhya, wanda londekesa kwila mwéne o Nzambi yakidi.” O mundu woso watambwijila: “O kima ki wazwela kima kyambote.”
25 Elija wambela o jipolofeta ja Bahale, wixi: “Enu mudyanga kusola o kangombe ni ku kabatujula, mukonda enu mwavulu dingi. Mukusuluka, kolenu mu dijina dya nzambi yenu maji kanenu kuwika túbhya ku kangombe.”
26 Kyenyiki, akwata ku kangombe kabhekele, akabatujula anga adikola mu dijina dya Bahale tunde mu kamene kate ku mediya mu kwamba: “Bahale tata, tutambwijile!” Maji kikutundu dízwi, séku muthu wa atambwijila. Ene asuluka mu kukina ni kutuka-tuka, mu kujinguluka o kalatódyu ka bhangele.
27 Mu kithangana kya mediya, Elija wamateka kwaxongwena, mu kwamba: “Dikolyenu mwene ni dízwi dyaswina, mukonda mwene nzambi! Nange mwene walanduka ni ima yê, mba nange wayi mubhanga ima yengi,* mba wa muzeka, kwabhingi muthu phala ku mubalumuna.”
28 Ene akexile mudikola ni dízwi dyaswina ni kubatujula o mikutu yâ ni jiphoko ni kudikwama ni sosa, kala kyexile o kifwa kyâ kate kyexile mumbomba manyinga mu mukutu woso.
29 Kyoso kyabhiti o mediya, ene asuluka ni kudikola kala asaluka, kate mu ngoloxi mu ola ya kubhana o jisata ja jimbutu, maji kévu-ku dízwi, ka atambwijila, ka asuwu.
30 Mukusuka-ku, Elija watangela o mundu, wixi: “Ngizukamenu.” Kyenyiki, o mundu wa muzukama. Mwene watungu dingi o kalatódyu ka Jihova a kabudile.
31 Elija wakwata ku dikwinyi ni kiyadi kya matadi, kala o dyalwilu dya miji a an’a Jakobo, kala kyambele Jihova kwa Jakobo, wixi: “Dijina dyé dyanda kala Izalayele.”
32 Ni matadi yá, Elija watungu o kalatódyu mu dijina dya Jihova. Mukusuluka, wabhange mulombo wakondoloka o kalatódyu koso. Wene wexile wadikota wasokele phala kukuna-mu seya* jiyadi ya jimbutu.
33 Mukusuluka, watula o jihwínyi, yu wabatujula o kangombe mu jithumba-jithumba, wajitula ku thandu a jihwínyi, yu wambe: “Izalesenu o jimbinda jiyadi jamakota ni menya, mu alundulula ku thandu a sata ya kwoha ni ku thandu a jihwínyi.”
34 Kyenyiki, mwene wa ambela: “Bhangenu dingi lwamukwa.” Ene anga abhanga dingi kiki. Mukusuluka, mwene wa ambela dingi: “Bhangenu kiki lwa katatu.” Ene anga a kibhanga muveji ya katatu.
35 Mukiki, o menya exile mu kunguluka mu kalatódyu koso. Mwene wezalesa we o mulombo ni menya.
36 Mu ngoloxi, mu ola ya kubhakula o sata ya jimbutu, polofeta Elija wazukama ku kalatódyu, yu wambe: “Jihova, eye u Nzambi ya Mbalahamu, ya Izake ni ya Izalayele, lelu athu akijiye kwila, eye u Nzambi mu Izalayele, eme ngi selevende yé ni kwila ngabhange o ima yoso yiyi kala ki wa ngitumu.
37 Ngitambwijile Jihova, ngitambwijile! Phala o mundu yu akijiye kwila, u Jihova eye u Nzambi yakidi ni kwila, eye wa mu abhangesa kuvutuka kokwé.”
38 Kyenyiki-phe, kwatundu túbhya kwa Jihova twoha o sata, o jihwínyi, o matadi, o fufuta, twa kukutisa we o menya exile mu mulombo.
39 Kyoso o mundu kyamono o ima yiyi, enyoso afukama ni pholo bhoxi, ya ambe: “Jihova mwéne o Nzambi yakidi! Jihova mwéne o Nzambi yakidi!”
40 Bhenyobho Elija wa ambela, wixi: “Kwatenu o jipolofeta ja Bahale! Kimwehele muthu kulenga!” Mu kithangana kyenyokyo a akwata, Elija wa kulumuka-nawu kate ku ngiji ya Kixone, yu wa ajibhila kwenyoko.
41 Elija wambela Akabe, wixi. “Ndé udye, unwe, mukonda nga mukwivwa kya o kunuma kwa mvula yadikota.”
42 Kyenyiki, Akabe wayi mudya ni kunwa maji Elija wabande ku mulundu wa Kalumelu. Mwene wafukama bhoxi, o pholo wa itula bhukaxi ka jiphuna jê.
43 Mukusuluka, Elija wambela o mukwatekexi wê, wixi: “Ngakudyondo, ndé utalele kwa lungila o kalunga.” Kyenyiki, mwene wabande, watale yu wambe: “Kingamumona kima.” Elija wa mwambela mu sambwadi dya jiveji: “Vutuka-ku dingi ni utale.”
44 O lwa kasambwadi, o mukwatekexi wambe, wixi: “Tala! Sayi dituta dyofele dyasoko ni lukwaku, dya mubanda ku musanza wa kalunga.” Elija wa mwambela, wixi: “Ndé, tangela Akabe: ‘Sokejeka o dikalu dyé dya ita phala o mvula ki i kukwatele kuku!”
45 Kyenyiki, o dyulu dya mateka o kuvunda, o kitembu ki mateka o kubhusa, anga kusonoka mvula yadikota. Maji Akabe-phe wahabe mu dikalu dyê dya ita yu wayi ku Jezelele.
46 Jihova wabhana o kutena kwa Elija, mwene anga ukuta o divunga dyê mu mbunda, yu walenge ku pholo ya Akabe kate ku Jezelele.
Footnotes
^ Mu Heba.: “yó nga mwimanena bhu pholo yê.”
^ Mba nange, “wabhange njila.”
^ Seya imoxi yasokele 7.33 ya jilitulu. Tala o Kiba. B14.
