Divulu Dya Dyanga Dya Jisobha 2:1-46
2 Kyoso Davidi kyexile phala kufwa, mwene wabhana o itendelesu yiyi kwa mon’ê Solomá, wixi:
2 “Kwakambe ngo nganda fwa kya.* Kyenyiki, swina, kala u kindanda.
3 Kana kudisandula kwa Jihova Nzambi yé, belesela o itumu yê mu kwenda jinga mu jinjila jê ni kutumaka o jingonge jê ni itendelesu yê kala kyosoneke mu kijila kya Mozé. Se kyene ki ubhanga, wanda ditunda kyambote* mu ima yoso i ubhanga ni kwoso-kwoso ku uditela.
4 Jihova wanda kumbidila o kikanenu kya ngibhangele, kyoso kyambe: ‘Se an’é akala ni wendelu wambote, mu ku ngikala fiyele ni muxima woso ni mwenyu woso, ku mbutu yé kwanda kala jinga muthu* u xikama ku kyandu kya Izalayele.’
5 “Eye wejiya kyambote ya ngibhange Jowabe mon’a Zeluya ni yabhangele mwene ku jikabhitangu jiyadi ja masoladi a Izalayele. Mwene wajibha Abinele mon’a Nele ni Amasa mon’a Jetéle, mu kithangana kya kutululuka,* yu wate manyinga a ita mu phonda yexile mu mbunda yê, ni mu jihayi jexile mu inama yê.
6 Bhanga o ima ni unjimu, kana kwehela o jimvi jê kutuluka mu mbila ni kutululuka.*
7 “Maji watokala kukwatela henda ku twana twa Badizilayi mukwa Ngiliyade. Ene atokala kudya we ku meza mé, mukonda éne a ngikwatekesa kyoso ki ngalenge phang’yé Abisalone.
8 “Ximeyi mon’a Jela, mukwa Bejamí ya Bahudimi, watungu bhu mbandu yê, mwene wa ngibhubhidila kyoso ki ngayi ku Manayime. Maji kyoso mwene kya kulumuka ku Njolodá phala kudisanga n’eme, nga mukanena mu dijina dya Jihova, mu kwamba: ‘Kinganda kujibha.’
9 Kindala-phe kana kumweha ngo kiki, kuma eye u diyala dya u njimu, wejiya se ihi i watokala kubhanga ni mwene. Bhangesa kwila o jimvi jê jituluke mu mbila ni manyinga.”
10 Kyenyiki, Davidi wafu, ya a mufundu mu Mbanza ya Davidi.
11 Davidi watumina Izalayele mu makwinyi awana a mivu. Ku Hebolone mwene watumina mu sambwadi dya mivu, mu Jeluzaleme watumina mu makwinyi atatu ni kitatu kya mivu.
12 Solomá anga uxikama ku kyandu kya ungana kya tat’ê Davidi. Bhofele-bhofele, mwene wamateka kukala ni kutena kwavulu kwa kutumina.
13 Mukubhita thembu, Adoniya mon’a Hajiti, wayi muzwela ni Bateseba manya Solomá. Bateseba wa mwibhwidisa, wixi: “O kwila o kwiza kwé kwa kutululuka?” Mwene watambwijila: “Xe, kwa kutululuka.”
14 Adoniya wambe, wixi: “Ngamesena ku kutangela kima.” Bateseba wa mutambwijila, wixi: “Zwelé.”
15 Mwene wasuluka mu kwamba: “Eye wejiya kwila éme ngeji kala ngi sobha. O mundu woso wa Izalayele wexile mu kingila* kwila, ngitumina kala sobha. Maji a ngitambula o usobha, ya a ubhana kwa phang’yami, mukonda Jihova wamesenene kwila mwéne ukala sobha.
16 Maji-phe, ngamesena ku kubhinga kima. Kana kudituna o kima kiki ki nganda kubhinga.” Kyenyiki, Bateseba wambe, wixi: “Bhingé.”
17 Mwene wambe: “Ngakudyondo, bhinga kwa sobha Solomá phala a ngibhane Abisaki mukwa Suneme n’a kale muhat’wami. Mwene kanda dituna o kima kiki ki wanda mubhinga.
18 Bateseba anga u mwambela, wixi: “Kyambote, nganda zwela ni sobha.”
19 Kyenyiki, Bateseba wayi kwa sobha Solomá phala kuzwela-nê yalungu ni kima kyabhingi Adoniya. Mu kithangana kyenyokyo, o sobha wabalumuka wa muzukama anga u mufukamena. Mukusuluka, waxikama ku kyandu kyê, yu watumu kubheka kyandu phala manya sobha, n’a xikame ku kadilu kê.
20 Bateseba wambe: “Ngamesena ku kubhinga kama. Kana kudituna i nganda kubhinga.” O sobha watambwijila: “Mamá Bhingé, mukonda kinganda dituna ku kubhana o kima ki wanda bhinga.”
21 Mwene wa mwambela, wixi: “Bhana Abisaki mukwa Suneme kwa phang’yé Adoniya n’a kale muhat’wê.”
22 Sobha Solomá watambwijila manyâ, wixi: “Mukonda dyahi wa mu ngibhinga kubhana Abisaki mukwa Suneme, kwa Adoniya phala kukala muhat’wê? Kwa mu kukamba kya ngo kubhinga o utuminu phala mwene, mukonda mwene kota dyami yu wala ni kikwatekesu kya mukunji Abiyatale, ni kikwatekesu kya Jowabe mon’a Zeluya.”
23 Kyenyiki, Solomá waloko mu dijina dya Jihova, mu kwamba: “Adoniya wanda futa ni mwenyu wê mu kubhinga o kima kiki. Nzambi a ngikaxtikale kinene se kingikibhange.
24 Kala Jihova kyene ku mwenyu, yu wa ngixikamesa ku kyandu kya ungana kya tata yami Davidi, Yó wabhana o utuminu kokwami ni ku mbutu* yami kala kya kikanena, Adoniya anda mujibha lelu.”
25 Mu kithangana kyenyokyo, sobha Solomá watumikisa Benaya mon’a Joyada. Mwene wayi, wasange Adoniya yu wa mujibha.
26 Sobha wambela o mukunji Abiyatale, wixi: “Ndé ku mabhya mê ku Anatote! Eye watokalele kufwa, maji mu kizuwa kya lelu kinganda kujibha mukonda eye watutu o alaka ya Ngana Jihova Sukeku, bhu pholo ya tata yami Davidi. Mu jihadi joso jatale tat’etu, eye wexile-nê kumoxi.”
27 Kyenyiki, Solomá wakatula Abiyatale mu kikalakalu kya ukunji wa Jihova, phala o izwelu ya Jihova yazwelele ku Silo yalungu ni mwiji wa Elí, i dikumbidile.
28 Kyoso Jowabe kyevu o njimbu, mwene walengela ku balaka ya Jihova, yu wa dikwatenena ku jingela jexile ku kalatódyu, mukonda Jowabe wakwatekesele Adoniya, sumbala mwene kakwatekesele Abisalone.
29 Kyenyiki, atangela sobha Solomá, exi: “Jowabe walengela mu balaka ya Jihova, yu wala ku mbandu a kalatódyu.” Kyenyiki, Solomá watumikisa-ku Benaya mon’a Joyada, mu kwamba: “Ndé u mujibhe.”
30 Benaya wayi mu balaka ya Jihova, yu wa mwambela: “O sobha wambe kiki: ‘Zá bhu kanga!’” Maji Jowabe watambwijila: “Kana! Nganda fwila bhenyabha.” Kyenyiki, Benaya wavutuka kwa sobha, yu wa mutangela yazwela Jowabe.
31 Kyenyiki, o sobha wa mwambela wixi: “Bhanga kala kyazwela mwene, u mujibha anga u mufunda. Katula o manyinga angene abhubhisa Jowabe kokwami ni ku thandu dya inzo ya tat’etu.
32 Jihova wanda bhangesa kwila, mwene ukala ni kikuma kya manyinga a bhubhisa. Mukonda mwene wayi, wajibha mayala ayadi abetele-kota mu kukala athu ayuka mwene ndenge, sé tat’etu Davidi kukijiya. Kifwa wajibha Abinele mon’a Nele, o kabhitangu ka masoladi ka Izalayele ni Amasa mon’a Jetéle, o kabhitangu ka masoladi a Judá.
33 Jowabe ni mbutu yê, ene anda kala jinga ni kikuma kya manyinga a mayala yá, kate ku hádya ni hádya. Maji Davidi ni mbutu yê ni inzo yê ni kyandu kyê akale jinga ni kutululuka kutunda kwa Jihova, kate ku hádya ni hádya.”
34 Kyenyiki, Benaya mon’a Joyada, wayi bhwexile Jowabe wa mujibha, ya a mufundu mu inzo yê mu kikangalakata.
35 Mukusuluka, o sobha wasolo Benaya mon’a Joyada phala kukala o kabhitangu ka masoladi mu kubhingana Jowabe. Sobha wasolo we o mukunji Zadoke phala kubhingana Abiyatale.
36 O sobha watumu kwixana Ximeyi, yu wa mwambela, wixi: “Tunga o inzo yé mu Jeluzaleme, anga ukala kwenyoko. Kana kutunda mu mbanza phala kuya kididi kyengi.
37 Mu kizuwa ki utunda anga uzawuka o honga ya Kidelone, ejiya kwila, wanda fwa mwene. Éye-phe wanda kala ni kikuma kya manyinga mé.”
38 Ximeyi wambela o sobha, wixi: “O sobha wazwela kyambote. O selevende yé wanda bhanga yoso kala kyazwela ngana yami, o sobha.” Ximeyi anga utunga thembu yavulu mu Jeluzaleme.
39 Maji mu kubhita mivu itatu, abhika ayadi a Ximeyi alenge ya adisweka bhwa zukama ni Akiji mon’a Mahaka, sobha ya Ngate. Kyoso kyatangela Ximeyi mu kwamba: “O abhik’ê ala ku Ngate,”
40 Ximeyi wasambela ku jumendu yê ni lusolo lwoso, yu wayi mudisanga ni Akiji ku Ngate, mu kusota o abhik’ê. Kyoso Ximeyi kyavutuka ku Ngate ni abhik’ê,
41 Solomá a mutangela, exi: “Ximeyi watundu mu Jeluzaleme, wayi ku Ngate, maji wavutuka kya.”
42 Kyenyiki, o sobha watumu kwixana Ximeyi, yu wa mwambela: “Kingakutumu kuloka ku pholo ya Jihova, eme nga kutendelesa kwila, ‘mu kizuwa ki wanda tunda bhabha, anga uya kididi kyengi wanda fwa?’ Eye ku ngitambwijila kwila, ‘yoso i ngazwela yawabha, ni kwila wanda ibelesela?’
43 Mukonda dyahi-phe kiwakumbidila o kikanenu ki wabhange bhu pholo ya Jihova ni kitendelesu ki ngakubhana?”
44 O sobha wambela Ximeyi, wixi: “Ku muxima wé, eye wejiya kyambote o ima yoso yayibha i wabhange kwa tat’etu Davidi. Jihova wanda bhangesa kwila eye ukala ni kikuma ku ima yoso yayibha i wabhange.
45 Maji o sobha Solomá anda mubesowala, o kyandu kya Davidi kyanda nangenena bhu pholo ya Jihova kate ku hádya ni hádya.”
46 Kyenyiki, o sobha watumu Benaya mon’a Joyada kujibha Ximeyi, mwene wa mujibha.
Mukiki-phe, o utuminu wa nangenena bhu maku a Solomá.
Footnotes
^ Mu Heba.: “eme nga muya mu njila yene muditela o mundu woso.”
^ Mba, “wanda londekesa unjimu.”
^ Mu Heba.: “ku yó akutokala kanda jibha-ku muthu.”
^ Mba, “kithangana kikwexile ita.”
^ Tala o Dilombolwelu.
^ Mu Heba.: “o jipholo jâ jalungile kokwami.”
^ Mba, “dibhata dyami.”
