Divulu Dya Dyanga Dya Jisobha 21:1-29
21 Ku pholo dya kwenda, kwamoneka maka alungu ni dibhya dya mividi dyatokalele kwa Nabote, mukwa Jezelele. O dibhya dyenyidi dyexile ku Jezelele, dya zukamene ni inzo ya Akabe sobha ya Samadiya.
2 Akabe wambela Nabote, wixi: “Ngibhane o dibhya dyé dya mividi ni ngidibhange ndombe* yami, mukonda dyazukama ku inzo yami. Eme nganda kubhana dibhya dyengi dya mividi dyabeta-kota, mba se wandala, nganda kufuta ni kitadi kala kyasoko o valolo yê.”
3 Maji Nabote watambwijila Akabe, wixi: “Mukonda dya kuxila Jihova kingitena ku kubhana o undundu wa ngixila o jikuku jami.”
4 Kyenyiki, ni kuluwala kwoso Akabe wabokona mu inzo yê ni kikote ku muxima mukonda Nabote o mukwa Jezelele wa mwambela: “Kinganda kubhana o undundu wa ngixila o jikuku jami.” Kyenyiki, mwene wazeka mu hama yê, walungila o pholo ku phalelu, yu waditunu o kudya.
5 O muhat’wê Jezabele wayi muzwela-nê, yu wa mwibhwidisa: “O kuluwala kuku kwahi, kwa mu kubhangesa kudituna o kudya?”
6 Mwene wa mutambwijila, wixi: “Ngambela Nabote mukwa Jezelele, ngixi: ‘Ngisumbise o dibhya dyé dya mividi, mba se wandala nganda kubhana dibhya dyengi dya mividi.’ Maji mwene-phe waditunu, yu wambe: ‘Kinganda kubhana o dibhya dyami dya mividi.’”
7 O muhat’wê Jezabele wa mwambela, wixi: “K’eye u sobha ya Izalayele? Balumuka, xakuta kama koso-koso, muxima wé usanguluke. Eme nganda kubhana o dibhya dya Nabote, o mukwa Jezelele.”
8 Kyenyiki, mwene wasoneka mikanda mu dijina dya Akabe, yu wate-mu o kidimbu kya sobha. Watumikisa o mikanda yiyi ku adyakime ni ku jingana atungile mu mbanza ya Nabote.
9 Mu mikanda yasoneka, mwene wambe: “Kolenu ngonge ya kujejuwala, bhangesenu Nabote kuxikama bhu pholo dya mundu.”
10 Bhekenu mayala ayadi ayibha n’a xikame bhu pholo yê phala kubhana umbangi wa makutu, mu kwamba: “Eye waxingi Nzambi ni sobha!’ Mukusuluka, mwambatenu bhu kanga dya mbanza anga mu mububa ni matadi kate kyanda fwa.”
11 Kyenyiki, o mayala a mbanza ya Nabote ni adyakime ni jingana atungile mu mbanza yenyoyo, abhange kala kyosoneke mu mikanda yatumikisa Jezabele.
12 Abhana ngonge ya kujejuwala, ya abhangesa Nabote kuxikama bhu pholo dya mundu.
13 Kyenyiki, mayala ayadi ayibha, eza, axikama bhu pholo ya Nabote ya abhana umbangi wa makutu bhu pholo ya mundu, exi: “Nabote waxingi Nzambi ni sobha!” Mukusuluka, amwambata bhu kanga dya mbanza, ya a mububa ni matadi kate kyafu.
14 Kyenyiki, atumu kwambela Jezabele, exi: “Nabote a mububa ni matadi, yu wafu.”
15 Kyoso Jezabele kyeza mu kwijiya kwila, Nabote a mububa ni matadi yu wafu, mwene wambela Akabe, wixi: “Balumuka, ndé utambule o dibhya dya mividi dya Nabote o mukwa Jezelele, waditunine ku kusumbisa-nadyu, mukonda Nabote kale dingi ku mwenyu, mwene wafu.
16 Kyoso Akabe kyeza mu kwijiya kwila, Nabote wafu, wakulumuka ni lusolo ku dibhya dya mividi dya Nabote o mukwa Jezelele phala kuditambula.
17 Maji Jihova wambela Elija, o Tejibita, wixi:
18 “Balumuka, uye ni lusolo lwoso kwa Akabe sobha ya Izalayele wala ku Samadiya. Mwene wala mu dibhya dya mividi dya Nabote, mukonda wayi-ku phala ku ditambula.
19 Mutangele kiki: ‘Jihova wambe: “Eye wajibha muthu phala kutambula o dibhya dyê?”’ Mutangele we kiki: ‘Jihova wambe: “Mu kididi mwalesela o manyinga a Nabote ku jimbwa, bhwene we bhwanda lesela o manyinga mé ku jimbwa.”’”
20 Kyoso Akabe kyamono Elija, wa mwambela, wixi: “Eyó nguma yami, wa ngisange! Mwene wa mutambwijila: “Ngakusange. Nzambi wambe: “Kuma eye wa musuluka* mu kubhanga ima yayibha bhu pholo ya Jihova,
21 nganda kubhekela wíndwa, nganda bwika mu Izalayele, o mayala* oso atokala ku dibhata dyé, kate mwene ni yó akambe o valolo mu Izalayele.
22 Nganda bhanga ku inzo yé kala ki ngabhange ku inzo ya Jelobowamu mon’a Nebate ni ku inzo ya Bahasa mon’a Ahiya, mukonda eye wa ngibhangesa kukala ni njinda, eye wabhangesa Izalayele kuta kituxi.’
23 Yalungu ni Jezabele, Jihova wambe, wixi: ‘Jezabele anda mudya ku jimbwa mu dibhya dya Jezelele.
24 O athu atokala ku dibhata dya Akabe anda fwila mu mbanza, anda kwadya ku jimbwa, o yó anda fwila mu mukáwu, anda ku adya ku jinjila jibhita bhulu.
25 Kana-ku muthu wasokela ni Akabe mu kubhanga ima yayibhila Jihova, kala kya mufunyisa ku muhat’wê Jezabele.
26 Mwene wabhange ima yayibha kinene, mu kubheza o iteka yakambe valolo kala kyexile mubhanga akwa Mamodi a akaye kwa Jihova bhu pholo ya Izalayele.’”
27 Kyoso Akabe kyevu o izwelu yiyi, utandula o izwatu yê, uzwata izwatu ya jisaku anga ufula o kudya. Mwene wexile muzeka mu jisaku, waluwalele kyavulu.
28 Kyenyiki-phe, Jihova wambela Elija mukwa tejibita, wixi:
29 “Wamono kyebhi Akabe kyaditulula mukonda dyami? Kuma mwene waditulula bhu pholo yami, kinganda bheka o divuwa mu izuwa yê. Nganda bheka o divwa mu inzo ya Akabe, mu izuwa ya mon’ê.”
Footnotes
^ dibhya dya makovi.
^ Mu Heba.: “wadisumbisa.”
^ Mu Heba.: “oso yó asusa ku ilumbu.” Mu Hebalayiku, o kizwelu kiki kilombolola kusebhulula, kyene kyalungu ni mayala.
