Divulu Dya Dyanga Dya Jisobha 22:1-53
22 Kwabhiti mivu itatu kikwexile ita bhukaxi ka akwa Sídya ni akwa Izalayele.
2 Mu muvu wa katatu, Jozafate sobha ya Judá, wayi mudisanga ni sobha ya Izalayele.
3 Kyenyiki, o sobha ya Izalayele wambela o jiselevende jê, wixi: “Enu kimwijiya kwila o ixi ya Lamote-Ngiliyade yatutokala? Maji né kiki twala hanji ni hele ya kuya mu itambula bhu maku a sobha ya Sídya.”
4 Kyenyiki, o sobha ya Izalayele webhwidisa Jozafate, wixi: “O kwila wandaya n’eme mubhânga ni akwa Lamote-Ngiliyade?” Jozafate watambwijila, wixi: “Ngandaya n’eye. O mundu wami wanda kala ni mundu wé, o jikabalu jami janda kala ni jikabalu jé.”
5 Maji Jozafate wambela o sobha ya Izalayele, wixi: “Ngakudyondo, sota kwijiya hanji o kizwelu kya Jihova.”
6 Bhenyobho, o sobha ya Izalayele wongeka o jipolofeta. Ene exile hama jiwana ja mala, yu wa ebhwidisa: “O kwila ngatokala kuya mubhânga ni akwa Lamote-Ngiliyade, inga kana?” Ene a mutambwijila, exi: “Ndé, Jihova wanda bhakula o mbanza bhu maku a sobha.”
7 Mukusuluka, Jozafate webhwidisa: “O kwila kibhwala polofeta ya Jihova bhabha? Tusote we kwijiya o kizwelu kya Nzambi bhukaxi ka mwene.”
8 Kyenyiki, o sobha ya Izalayele watambwijila Jozafate, wixi: “Sayi-ku diyala dimoxi, tutena kwijiya o kizwelu kya Jihova bhukaxi ka mwene. Maji eme nga muzembe. Mukonda mwene kene muzwela ima yambote yalungu n’eme, uzwela ngo ima yayibha. Dijina dyê Mikaya mon’a Imila.” Maji Jozafate wa mwambela, wixi: “Sobha, eye kutokala kuzwela kiki.”
9 Kyenyiki-phe, o sobha ya Izalayele watangela o selevende yê, wixi: “Lenguluka, tubhekele Mikaya mon’a Imila.”
10 O sobha ya Izalayele ni Jozafate sobha ya Judá, axikamene kala muthu bhu kyandu kyê kya ungana, ene azwatele o izwatu yâ ya ungana, ya akexile bhu kididi bhwene mu bhyatela, kyexile bhu mwelu wa Samadiya. O jipolofeta joso anga akala muzwela o maka a upolofeta.
11 Kyenyiki, Zedekiya mon’a Kenahana, wabhange jingela ja felu, yu wambe: “Jihova wambe kiki: ‘Ni jingela jiji, wanda tolola akwa Sídya ni ku abwikisa.’”
12 O jipolofeta joso exile muzwela kima kimoxi ngo, mu kwamba: “Banda ku Lamote-Ngiliyade wanda ditunda kyambote. Jihova wanda bhakula o mbanza bhu maku a sobha.”
13 Kyenyiki, o mukunji wayi mutakana Mikaya, wambe: “Ejiya kwila o jipolofeta joso ja mukanena ngo ima yambote kwa sobha. Ngakudyondo, eye watokala we kuzwela kala kya muzwela ene. Eye watokala kukanena ima yambote.”
14 Maji, Mikaya wa mwambela: “Kala Jihova kyene ku mwenyu, yoso yanda zwela Jihova yene i nganda zwela.”
15 Kyenyiki, mwene wayi kate kwa sobha, o sobha yu wa mwibhwidisa, wixi: “Mikaya tutena kuya mubhânga ni akwa Lamote-Ngiliyade inga kana?” Mwene wa mutambwijila, wixi: “Ndé, wanda ditunda kyambote. Jihova wanda bhakula o mbanza bhu maku a sobha.”
16 Maji o sobha wa mwambela, wixi: “Lukuxi lunganda kubhangesa kuloka kwila, u ngitangela ngo o kidi mu dijina dya Jihova?”
17 Kyenyiki, mwene watambwijila, wixi: “Nga mumona Izalayele yoso yadimwange ku milundu, kala jimbudi jakambe mubhidi.” Jihova yu ambe: “Ene kala ni ngana. Kala muthu avutuke kubhata dyê ni kutululuka.”
18 Mukusuluka, o sobha ya Izalayele wambela Jozafate, wixi: “Kingikutangela-kyu kwila, mwene kanda kanena ima yambote yalungu n’eme, maji wanda kanena ngo ima yayibha?”
19 Mikaya wasuluka ni kuzwela, wixi: “Ivwa o kizwelu kya Jihova! Ngamono Jihova waxikama ku kyandu kyê ni kifuxi kyoso kya dyulu kyemana bhu mbandu yê ya kadilu ni ya kyasu.
20 Jihova anga wamba: ‘Nanyi wanda nganala Akabe, phala mwene abande ku Lamote-Ngiliyade, n’a fwile kwenyoko?’ Ene anga akwata, yu uzwela kiki, mukwa uzwela kyokyo.
21 Kyenyiki, anju imoxi yeza yemana bhu pholo ya Jihova, i yambe: ‘Eme nganda munganala.’ Jihova webhwidisa, wixi: ‘Wanda kibhanga kyebhi?’
22 O anju yatambwijila: ‘Ngandaya-ku, nganda bhangesa o jipolofeta jê kuzwela makutu.’* Kyenyiki, mwene wambe: ‘Eye wanda munganala, o kya mukwa, eye wanda ditunda kyambote. Ndé, ubhange kyenyiki.’
23 Mukiki-phe, Jihova wehela o anju kubhangesa o jipolofeta jé jiji kukutangela makutu. Maji ejiya-nakyu kwila, Jihova wambe kwila wanda bhita mu divwa.”
24 Zedekiya mon’a Kenahana, wazukama kwa Mikaya wa mubhana huxi, yu wambe: “Eye wa muzwela kwila o nzumbi ya Jihova, ya ngixisa,* i yazwela bhukaxi ké?”
25 Mikaya wa mutambwijila: “Kingila. Kizuwa wa kakimona kyoso ki wanda bokona mu xilu ni kusota bhwoso bhu udisweka.”
26 Kyenyiki, o sobha ya Izalayele wambe: “Ambatenu Mikaya, mu mubhana kwa Amone o mutwameni wa mbanza ni kwa Jowáji, mon’a sobha.
27 Mu atangela: ‘kiki kyene kyambe o sobha: “O diyala didi, mu mujikila mu kaleya. Mu mudikila ngo ni kakibhasu kambolo ni tumenya kate kinganda vutuka ni kutululuka.”’”
28 Maji Mikaya wambe, wixi: “Ngana, se uvutuka ni kutululuka, Jihova kazwela n’eme.” Mwene wambe dingi: “Enu mu mundu woso lembalalenu o maka yá.”
29 Kyenyiki, o sobha ya Izalayele ni Jozafate sobha ya Judá, abande ku Lamote-Ngiliyade.
30 O sobha ya Izalayele wambela Jozafate, wixi: “Eme nganda dibhangesa kala ngi muthu wengi, anga ngiya mubhânga mu ita, maji eye watokala kuzwata o izwatu yé ya usobha.” O sobha ya Izalayele anga wadibhangesa kala muthu wengi, yu wayi mubhânga.
31 O sobha ya Sídya wabhana o kitumu ku makwinyi atatu ni kiyadi kya atwameni a makalu a ita, mu kwamba: “Kanenu kubhânga ni disoladi mba o kabhitangu ka masoladi, kikale mukwata ngo o sobha ya Izalayele.”
32 Kyenyiki, kyoso o atwameni a ita kyamono Jozafate, ene abanze: “Yu mwéne mwene o sobha ya Izalayele.” A muzukama phala kubhânga-nê. Jozafate wamateka kudikola mu kubhinga kikwatekesu.
33 Kyoso o atwameni a makalu a ita, kyamono kwila ki mwene o sobha ya Izalayele, eha o ku mukayela.
34 Sayi disoladi dyatakula o mufula se kukijiya yu wakwama o sobha ya Izalayele bhwa ditakanesene o kivungatulu. Sobha anga wambela o mwendexi wa dikalu dyê dya ita, wixi: “Jinguluka u ngikatule bhwala o ita, mukonda a ngikwama kyavulu.”
35 Mu kizuwa kyenyokyo, o ita ya dibandekesa, o sobha a mwimanesa mu dikalu dyê dya ita, ku pholo ya kifuxi kya akwa Sídya. O manyinga akexile mu kunguluka mu dikalu, mwene wafu mu ngoloxi.
36 Kyoso o dikumbi ki dyakexile kya muboba, evu dízwi dyaswina bhukaxi ka masoladi, dyambe: “Kala muthu avutuke mu mbanza yê, kala muthu avutuke mu ixi yê.”
37 Kyenyiki, o sobha wafu ya amwambata ku Samadiya. Ene anga afunda o sobha ku Samadiya.
38 Kyoso kyakexile musukula o dikalu dya ita, bhwa zukama o kixima kya Samadiya, o jimbwa jexile mulesa o manyinga mê, o idyanzunga exile muzowa bhwenyobho,* kala kyazwelele Jihova.
39 Yalungu ni musoso wa Akabe ni yoso yabhange mwene ni inzo yatungile ni mazu a jinzamba ni jimbanza joso jatungile mwene, manyi, ka isoneka mu divulu dya misoso ya izuwa ya jisobha ja Izalayele?
40 Mukusuka-ku, Akabe wafu. O mon’ê Akaziya mwéne wa mubhingana ku usobha.
41 Jozafate mon’a Aza, wakituka sobha ya Judá mu muvu wa kawana wa utuminu wa Akabe, sobha ya Izalayele.
42 Jozafate wexile ni makwinyi atatu ni kitanu kya mivu, kyoso mwene kyamateka o kutumina. Mwene watumina mu makwinyi ayadi ni kitanu kya mivu mu Jeluzaleme. O manyâ wexile Azuba, mon’a Sili.
43 Mwene wasuluka ni kwenda mu njila ya tat’ê, Aza. Mwene kaditela njila yengi, wasuluka ni kubhanga ima yambote bhu pholo ya Jihova. Maji kabulu o ididi ya kubhezela, o mundu wasulukile hanji ni kubhana jisata ni kuhabesa dixi mu ididi ya kubhezela.
44 Jozafate ni sobha ya Izalayele, exile ni kutululuka mudyâ.
45 Yalungu ni musoso wa Jozafate, o ima yonene yabhange ni ita yalwu, ka isoneka mu divulu dya misoso ya izuwa ya jisobha ja Judá?
46 Mwene wajibha we o mala akwa kubhanga undumbu mu tembulu, asubhukile mu izuwa ya tat’ê, Aza.
47 Mu izuwa yenyoyo, kikwexile sobha ku Idomo. O nguvulu ya kibatu, mwéne wexile mutumina kala sobha.
48 Jozafate wabhange we jinaviyu ja Talxixi* phala kuya musota ulu ku Ofile, maji o jinaviyu kijitena kubhixila-ku mukonda jaboba ku Ezone-Ngabele.
49 Mukiki-phe, Akaziya mon’a Akabe wambela Jozafate, wixi: “Ehela o jiselevende jami kuya kumoxi ni jiselevende jé mu jinaviyu,” maji Jozafate waditunu.
50 Mukusuka-ku, Jozafate wafu, ya a mufundu mwafundile o jikuku jê, mu Mbanza ya Davidi, kuk’wê. Mon’ê Jeholamu, mwéne wa mubhingana ku ungana.
51 Akaziya mon’a Akabe wakituka sobha ya Izalayele ku Samadiya, mu muvu wa dikwinyi ni sambwadi wa utuminu wa Jozafate, sobha ya Judá. Mwene watumina Izalayele mu mivu iyadi.
52 Mwene wabhange ima yayibha bhu pholo ya Jihova, wende mu jinjila ya tat’ê ni ja manyâ, wende mu jinjila ja Jelobowamu mon’a Nebate, wabhangesa Izalayele kuta kituxi.
53 Akaziya wabheza o iteka ya Bahale, wa ifukamena phala kuxinga Jihova o Nzambi ya Izalayele kala kyabhangele tat’ê.
Footnotes
^ Mu Heba.: “nga kakala ngi nzumbi ya makutu.”
^ Mu Heba.: “o nzumbi ya Jihova ya ngi sombokela bhebhi?”
^ Mba nange, “bhwexile muzowela o idyanzunga, o jimbwa jexile mulesa o manyinga mê”
^ Tala o Dilombolwelu.
