Divulu Dya Dyanga Dya Jisobha 3:1-28
3 Solomá wabhange kikutu kya ukaza ni Falawó, sobha ya Ijitu. Mwene wakazala ni mon’a Falawó, wa mwambata mu Mbanza ya Davidi, kate kyeji tunga o inzo yê, ni inzo ya Jihova ni ilumbu ya Jeluzaleme.
2 O mundu wakexile hanji mubhakula o jisata mu ididi yâ ya kubheza, mukonda kate mu kithangana kyenyokyo, katungile luwa inzo yambata o dijina dya Jihova.
3 Solomá wasuluka mu kuzola Jihova, mu kukayela o itendelesu ya tat’ê Davidi, maji wexile hanji mubhakula jisata ni ku johela mu ididi yâ ya kubheza.
4 Sobha Solomá wayi kate ku Ngibiyone phala kubhakula jisata, mukonda kyokyo kyene kyexile o kididi kikôla kyabetele kota.* Solomá wabhakula midi ya ibhaku kala sata ya kwoha mu kididi kyenyokyo.
5 Kyoso Solomá kyakexile ku Ngibiyone, Jihova wa mumonekena mu nzoji. Kyenyiki, Nzambi wambe wixi: “Bhinga o kima ki wamesena kwila ngi kubhana-kyu.”
6 Solomá wambe: “Eye walondekesa henda yadikota kwa tat’etu Davidi, o selevende yé, kuma mwene wende bhu pholo yé ni ufiyele ni kuyuka kwoso ni muxima watenena. Éye wasuluka mu ku mulondekesa henda yadikota kate mu kizuwa kya lelu, mu ku mubhana mon’a diyala n’a xikame bhu kyandu kyê.
7 Maji-phe Jihova Nzambi yami, eye wabhangesa o selevende yé kukala sobha bhu kididi kya tata yami Davidi, sumbala ngi munzangala hanji ngakambe o unjimu.*
8 O selevende yé wala mwaxaxi ka mundu wé u wasolo, mundu wavulu katena ku ukwata konda.
9 Mukyenyiki, bhangesa o selevende yé kukala ni muxima wabelesela phala kufundisa ni kutungula o ima yawabha mu yiyi yayibha. Mukonda nanyi utena kufundisa o mundu wé yú, wavulu kinene kiki?”*
10 O kima kyabhingi Solomá kya sangulukisa Jihova.
11 Kyenyiki, Nzambi wa mwambela, wixi: “Kuma wabhingi o kima kiki, muveji dya kubhinga phala ku nangenena ku mwenyu,* mba kukala ni umvwama mba o kufwa kwa jinguma jé, maji wabhingi unjimu phala kubatula o madimanda,
12 nganda bhanga o kima ki wabhingi. O unjimu ni kutongoloka ku nganda kubhana, nuka kwexile muthu ni unjimu yu, ku pholo dya kwenda kikwanda kala we muthu ni unjimu yú.
13 O kyamukwa, o ima i wakambe o kubhinga nganda kubhana-yu we, kala o umvwama ni fuma. Kikwanda kala sobha wanda sokela n’eye mu izuwa yoso ya mwenyu wé.
14 Se wenda mu jinjila jami mu kubhaka o itendelesu ni itumu yami, kala kyabhange tat’enu Davidi, nganda kubhangesa we kunangenena mivu yavulu ku mwenyu.”*
15 Kyoso Solomá kya balumuka ku kilu, wamono kwila wexile mulota nzoji. Mukyenyiki, mwene wavutuka mu Jeluzaleme yu wemana bhu pholo ya Álaka ya Kikutu kya Jihova, wabhakula jisata ja kwoha ni jisata ja paze. Wabhange we fesa phala o jiselevende jê joso.
16 Mu izuwa yenyoyo, idyanzunga iyadi ayi muzwela ni sobha.
17 Muhatu umoxi wambe, wixi: “Ngakudyondo ngana yami, eme ni muhatu yú, twatungu dibhata dimoxi. Kyoso ki ngabhanduluka* mwene wakexile we monzo.
18 Mu kubhita izuwa itatu kyoso ki ngabhanduluka, o muhatu yú wabhanduluka we. Twexile ngo kiyadi kyetu mu inzo, kimwexile dingi muthu wengi.
19 Mu usuku, o mona wa muhatu yú wafu, mukonda wamuxina kyoso kyazeka.
20 Kyenyiki, mwene wabalumuka mukaxi ka usuku, kyoso eme ngi mubhik’é ki ngexile ku kilu. Mwene wakatula mon’ami bhu mbandu yami, yu wa mutula bhu mbandu yê,* wakwata mon’ê wafu wa mutula bhu jihata jami.
21 Kyoso ki ngabalumuka mu kamene phala kwamwisa mon’ami, ngamono kwila wafu. Kyenyiki, nga mutonginina kyambote, ngamono kwila ki mwene o mona u nga muvwala.”
22 Maji, o muhatu wamukwa wambe, wixi: “Kana, o mon’ami yú wala ni mwenyu, o mon’é wafu.” Maji o muhatu wa dyanga wambe, wixi: “Kana, o mon’ami yú wala ni mwenyu, o mon’é yó wafu.” Kyene kyexile muzoka bhu pholo ya sobha.
23 Mukusuka-ku, o sobha wambe: “Umoxi wamba: ‘O mon’ami yú wala ni mwenyu, o mon’é yó wafu!’ O wamukwa wamba: ‘Kana, o mon’é yó wafu, o mon’ami yú wala ni mwenyu.’”
24 O sobha wambe: “Ngi bhekelenu xibhata bhabha.” Kyenyiki, o sobha a mubhekela xibhata.
25 O sobha wambe, wixi: “Batulenu o mona wala ni mwenyu mu mbandu jiyadi. Mbandu mu ibhana ku muhatu yú, mbandu mu ibhana ku muhatu yó.”
26 Mu kithangana kyenyokyo, o man’ya mona wala ni mwenyu, mukonda dya henda ya kwatela mon’ê, wadyondela o sobha, wixi: “Ngakudyondo ngana yami! Mubhanyenu o mona wala ni mwenyu! Kanenu ku mujibha!” Maji o muhatu wamukwa wambe, wixi: “O mona yú kanda kala n’eme, kanda kala we n’eye, mubatulyenu mwene mu mbandu jiyadi.”
27 Kyenyiki, sobha wambe: “Bhanenu o mona wala ni mwenyu ku muhatu wa dyanga! Mukonda mwéne o mamá ya mona.”
28 Akwa Izalayele eza mu kwijiya o kima kyasolo sobha, ya adiwana* ni sobha, mukonda amono kwila, o sobha wexile ni unjimu wa Nzambi phala kubatula o milonga ni kuyuka.
Footnotes
^ Mu Heba.: “ditala dyadikota.”
^ Mu Heba.: “eme ngi kambonga hanji, kingejiya kutunda né ngo kubokona.”
^ Mba nange, “wabhonzo.” Mu Heba.: “waneme.”
^ Mu Heba.: “izuwa yavulu.”
^ Mu Heba. “kuvudisa o izuwa yé.”
^ Mba, “vwala.”
^ Mba, “bhu jihata jê.” Mu Heba.: “ku dyele.”
^ Mu Heba.: “akala ni wôma wa.”
