Divulu Dya Dyanga Dya Jisobha 4:1-34
4 Sobha Solomá wexile mutumina o Izalayele yoso.
2 Yá ene exile o ilamba yabeta kota: Azadiya mon’a Zadoke wexile o mukunji.
3 Elihofele ni Ahiya an’a Siza, éne exile o jiseketa. Jozafate mon’a Ahilude, mwéne wexile o musoneki.
4 Benaya mon’a Joyada, mwéne wexile o kabhitangu ka masoladi. Zadoke ni Abiyatale éne exile o akunji.
5 Azadiya mon’a Natane mwéne wexile o mutwameni wa jinguvulu ja jimbanza. Zabude mon’a Natane mwéne wexile o mukunji, wexile we dikamba dya sobha.
6 Ahisadi mwéne wexile o kimbadi kya inzo. Adonilamu mon’a Abada, wexile o mutwameni wa yó exile mwa exana phala kubhanga o kikalakalu kya sobha.
7 Solomá wakexile ni dikwinyi ni kiyadi kya jinguvulu mu Izalayele yoso, exile mubheka o kudya kwa sobha ni ku akwa dibhata dyê. Ku muvu, kala muthu wexile ni mbeji yê ya kubheka o kudya.
8 Jiji jene o jinguvulu ja jimbanza: O mon’a Hule, watungile ku milundu ya Efalayíme,
9 o mon’a Dekele, Makaze, Salabimu, Beteseme ni Elone-Bete-Hanana,
10 o mon’a Hesede ku Alubote (wexile mu tumina o mbanza ya Soko ni ixi yoso ya Hefele.)
11 O mon’a Abinadabe ku milundu ya Ndole, (Tafate mon’a Solomá, mwéne wakituka muhat’wê.)
12 Bahana mon’a Ahilude ku Tahanake, ku Mejido ni ku jimbandu joso ja Bete-Sane (mu mbambe ya Zeletane ku lwiji ya Jezelele.) Tunde ku Bete-Sane kate ku Abele-Mehola ndu ku Jokemeyame.
13 O mon’a Ngebele ku Lamote-Ngiliyade mwéne wexile mutumina ku jibalaka ja Jayile, mon’a Manasa ku Ngiliyade. Mwéne we wexile mutumina o ibatu ya Alekobe ku Basane. Kifwa makwinyi asamanu a jimbanza ja makota jexile ni ilumbu ni mabhitu a ngondo.)
14 Ahinadabe mon’a Idu ku Manayime,
15 Ahimaze ku Nafitali (mwéne wa kazala ni Bazemate mon’a wamukwa wa Solomá.)
16 Bahana mon’a Husayi ku Azele ni Bayalote.
17 Jozafate mon’a Paluwa ku Izakale.
18 Ximeyi mon’a Ela ku Bejamí.
19 Ngebele mon’a Udi ku ixi ya Ngiliyade, o ixi yatokalele kwa Sihone, sobha ya akwa Mamodi ni ya akwa Hoge, o sobha ya Basane. Kwakexile we nguvulu imoxi, wexile mutumina o jinguvulu joso ja ixi yiyi.
20 O mundu wa Judá ni wa Izalayele wavudile kala o museke wa musanza wa kalunga. Ene exile mudya, munwa ni kukemba.
21 Solomá wakexile mutumina o jisobha joso jiji, tunde ku ngiji ya Ewufalate* kate ku ixi ya akwa Fidíxa ndu ku mbambe ya akwa Ijitu. O jisobha joso jiji jakexile mubheka lubhaku ni kusidivila Solomá mu izuwa yoso ya mwenyu wê.
22 Mu kizuwa ni kizuwa, Solomá wakexile mutambula makwinyi atatu a Kolu* ya fuba ya tiliku yafina, ni makwinyi asamanu a kolu a fuba ya tiliku, kiyexile yafina.
23 Ni dikwinyi dya jingombe janete, ni makwinyi ayadi a jingombe akexile mujidisa mu kibhanga ni hama a jimbudi, ku kwa dite dingi o jingulungu, o tusexi, jimbambi, mikuku, yexile musasa phala kudya.
24 Mwene wexile mutumina mu mbandu yoso yiyi* ya Ewufalate,* tunde ku Tifiza ndu ku Ngaza ni jisobha jojo ja mbandu yiyi ya ngiji. Mwene wexile ni kutululuka mu ibatu yoso ya mukondolokele.
25 Mu izuwa yoso ya Solomá, akwa Judá ni akwa Izalayele atungile ni kutululuka, kala muthu bhoxi dya muxi wa muvidi wê, kala muthu bhoxi dya muxi wa mufiku wê, tunde ku Dane ndu ku Beleseba.
26 Solomá wakexile ni midi jiwana* ja ididi mu ibhanga yê phala o jikabalu ja makalu mê a ita, ni dikwinyi ni kiyadi kya midi a jikabalu.*
27 O jinguvulu ja jimbanza jexile mubheka kudya kwa sobha Solomá ni yó atokalele mu dibhata dya Solomá. Kala muthu wexile ni mbeji yê ya kubheka o kudya ni kubhanga yoso phala kikukambe kima.
28 Kala muthu wakexile mubheka o Sevada ni yangu, kabasa kididi bhukala o jikabalu, kate mwene ni jikabalu jexile musunga o makalu.
29 Nzambi wabhana kwa Solomá, unjimu ni kutongoloka kwavulu ni muxima watetuluka kyavulu kala museke bhu mbandu a kalunga.
30 Solomá wabetele kota mu unjimu, o athu atungile ku mbandu ya thunda ni jinjimu joso ja akwa Ijitu ndenge.
31 Mwene wabetele kota mu unjimu muthu woso-woso ndenge. Wabetele dingi kota mu unjimu, Etane mukwa Nzelá ni Hemane ni Kalekoli ni Dana an’a Mahole ndenge. O fuma yê yadimwange mu ifuxi yoso ya mukondolokele.
32 Mwene wasoneka* midi jitatu ja jisabhu ni midi ni kitanu kya mimbu.
33 Mwene kexile ngo ni kwijiya kwalungu ni mixi yamakota ya muxitu wa Libanu, maji kate mwene ni isasa ya hisopo yakexile musabhuka mu ilumbu. Wakexile muzwela we yalungu ni yama, jinjila ni yama idihuha* ni jimbiji.
34 Athu akwa ifuxi yoso, exile mukwiza mu kwivwa o unjimu wa Solomá, kate mwene ni jisobha ja jixi joso, evwile kuzwela yalungu ni unjimu wa sobha.
Footnotes
^ Mu Heba.: “o Ngiji.”
^ Kolu imoxi yasokele ni 220 a jilitulu. Tala o Kiba. B14
^ Kifwa, ku mbandu kufwila o dikumbi.
^ Mu Heba.: “ngiji.”
^ O muxinda yú, a usanga mu mikanda yamukwa izwela we o maka enya. O mikanda yamukwa izwela kwila o muxinda yú wexile makwinyi awana amidi.
^ Mba, “endesa o jikabalu.”
^ Mba, “wazwela.”
^ Nange, kyalungu we ni twibamba.
