Divulu Dya Dyanga Dya Jisobha 5:1-18
5 Kyoso Hilamu sobha ya Tilu, kyevu kwila Solomá a mu undu kala sobha, mwene watumikisa o jiselevende jê kwa Solomá mukonda Hilamu wexile dikamba dya* Davidi.
2 Kyenyiki, Solomá watumu kutangela Hilamu, wixi:
3 “Kala ki wejiya kya, tat’etu Davidi katena kutunga inzo yambata o dijina dya Jihova Nzambi yê, mukonda dya kubhânga ni jinguma javulu, kate kyoso Jihova kyatula o jinguma jê bhoxi dya inama yê.
4 Maji kindala-phe Jihova Nzambi yami, wa ngibhana dinyohenu ku jinguma joso, séku muthu ubhânga n’eme, kikwene we mubhita kima kyoso-kyoso kyayibha.
5 Mukyenyiki, ngamesena kutunga inzo phala o dijina dya Jihova Nzambi yami, kala kyakanena Jihova kwa tat’etu Davidi, mu kwamba: ‘O mon’é nganda mutumbika bhu kididi kyé, mwéne wanda tunga o inzo yambata o dijina dyami.’
6 Kyenyiki, tuma o mundu wé kukoka mixi ya sédulu ya Libanu. O jiselevende jé anda kalakala ni jiselevende jami, yoso i wanda bhinga kala futu, yene i nganda futa. Mukonda, eye wejiya kyambote kwila, mwaxaxi k’etu kimwala muthu wejiya kubatula kyambote o mixi kala akwa Sidónya.”
7 Kyoso Hilamu kyevu o ima yazwela Solomá wasanguluka kyavulu, yu wambe: “Lelu Jihova ataneku, mukubhana mona wala ni unjimu kwa Davidi phala kutumina o kifuxi kiki kyadikota!”
8 Hilamu watumu kutangela Solomá, wixi: “Ngevu o njimbu i watumikisa, nganda bhanga yoso i wabhingi. Nganda bhana mabaya a muxi wa sédulu ni mabaya a muxi wa junípelu.
9 O jiselevende jami, anda kwambata o mabaya ku lwiji, tunde ku Libanu ndu ku musanza wa kalunga, eme nganda ku akuta phala ku atuta mu kubhita mu musanza wa kalunga kate bhu kididi ki wanda sola. Kwenyoko wanda ku ajituna, wanda kwambata o mabaya. Maji-phe wanda ngibhana o kudya ku nganda bhindamena phala o dibhata dyami.”
10 Kyenyiki, Hilamu wabhana o mabaya oso a sédulu ni a junípelu abhingi Solomá.
11 Mu kufuta Hilamu, Solomá wakexile mu mubhana makwinyi ayadi a midi a kolu* a tiliku ni makwinyi ayadi a kolu a máji ambote.* Yiyi yene o ima yexile mufuta Solomá kwa Hilamu muvu ni muvu.
12 Jihova wabhana unjimu kwa Solomá kala kya mukanene. Hilamu ni Solomá akexile ni kutululuka mudyâ, kiyadi kya ate kikutu.
13 O sobha Solomá wexana o mayala oso a Izalayele phala kubhanga o kikalakalu kya sobha. Wexana makwinyi atatu a midi a mayala.
14 Mwene wexile mwatumikisa ku Libanu mu ibuka ya dikwinyi dya midi a athu ku mbeji. Ene exile mukalakala mbeji ku Libanu anga akala mbeji jiyadi ku bhata. Adonilamu mwéne wexile ku pholo mu kwendesa o akalakadi a sobha.
15 Solomá wakexile ni makwinyi asambwadi a midi a mayala kakexile ni uhete* ni makwinyi anake a midi a mayala akexile mubatula o matadi ku milundu.
16 Ku kwadite dingi midi jitatu ni hama jitatu ja mayala exile ku pholo ya akalakadi.
17 Kala kyatumu sobha, akatula matadi amakota ni matadi ate kalu yavulu, phala o kaboko ka inzo, a kabhange ni matadi osete.
18 Kyenyiki, o jimesene ja kutunga ja Solomá ni ja Hilamu ni akwa Jebale, akexile mubula o matadi ni kusokejeka o mabaya ni matadi phala kutunga o inzo.
Footnotes
^ Mba, “wazolele njinga.”
^ Kolu imoxi yasokele ni 220 a jilitulu. Tala o Kiba. B14.
^ Máji ambote ate kalu, o bhange ni midiva yozuke mu kinu sé o ibundu.
^ Mba, “akwa kututa o imbamba.”
