Divulu Dya Dyanga Dya Jisobha 6:1-38
6 Mu kubhita hama jiwana ni makwinyi anake a mivu kyoso akwa Izalayele* kyatundu mu ixi ya Ijitu, mu muvu wa kawana wa Utuminu wa sobha Solomá mu Izalayele mu mbeji ya zife,* (kifwa o mbeji ya kayadi), mwene wamateka kutunga o inzo ya Jihova.*
2 O inzo yatungu sobha Solomá phala Jihova, yexile ni makwinyi asamanu a jikovadu* mu kulebha, makwinyi ayadi a jikovadu mu kuzanza ni makwinyi atatu a jikovadu mu kukula.
3 O mbalanda yexile ku pholo ya tembulu,* mu kuzanza yasokele ni kuzanza kwa inzo, kifwa yexile ni makwinyi ayadi a jikovadu.* O mbalanda ya inzo yabandekesa dikwinyi dya jikovadu mu kulebha kwa inzo.
4 Ku inzo wabhange-ku jinjanena jofele.
5 Mu jimbandu joso ja tembulu, mwene watungu-mu maxilu a naminina ku phalelu ya tembulu,* ni maxilu a kanga akondolokele o tembulu yoso.
6 O maxilu akexile ku lwiji mu jimbandu, exile ni kovadu jitanu mu kuzanza, o maxilu a ditala dya kaxi exile ni kovadu jisamanu mu kuzanza, o dya katatu dyasuku bhulu, dyexile ni sambwadi dya jikovadu mu kuzanza, mukonda mwene waxisa makungu mu jimbandu ja phalelu ja inzo yoso, phala o mikambu ki ibokone dingi mu phalelu ya tembulu.
7 O inzo a itungu ni matadi o batule kyambote mu kididi kwatundu. Mukyenyiki, mu kutunga o inzo kexile mu kwivwa jibuya ja malutelu mba ja dikuwa mba jibuya ja falamenda yoso-yoso ya felu.
8 O dibokwenu dya maxilu dyexile mu jimbandu jexile bhoxi, ku mbandu ya lwiji* ya inzo. Ate-mu we maxikata a kidifwanganu kya hwelendende phala kubanda kuditala dya kaxi ni kutunda ku ditala dya kaxi phala kubanda ku ditala dya tunda.
9 Mwene wasuluka mu kutunga o inzo kate kya izubha. Ku thandu a inzo wate-ku mikambu ya sédulu ni mabaya a muxi wa sédulu.
10 Watungu o maxilu exile mu jimbandu ja inzo, kala dixilu dyexile ni jikovadu jitanu mu kulebha. O maxilu oso wa anaminisa ku tembulu ni mikambu yamakota ya sédulu.
11 Kyenyiki, Jihova wambela Solomá, wixi:
12 “Yalungu ni inzo yiyi i wa mutunga, se wenda mu jingonge jami, ukumbidila o itendelesu yami anga ubelesela o itumu yami yoso mu kwendela-mu, eme nganda kumbidila o kikanenu ki ngabhange kwa tat’é Davidi yalungu n’eye.
13 Nganda kala jinga ni akwa Izalayele, kinganda xisa o mundu wami wa Izalayele.”
14 Solomá wasuluka ni kutunga o inzo phala ku izubha.
15 O moxi a inzo ku jiphalelu, mwene wayudika-ku* kyambote ni mabaya a sédulu, tunde bhoxi kate bhulu bhwala o mikambu. O m’onzo, bhoxi, wayukisa-bhu ni mabaya a muxi wa junípelu.
16 O moxi ku hota kwa suku o inzo, watungu-ku dingi dixilu dya makwinyi ayadi a kovadu ni mabaya a muxi wa sédulu, dyoyudike kyambote ni mabaya a sédulu, tunde bhoxi kate bhulu. Dixilu didi dyene dyexile o Kididi Kikôla Kinene.
17 O dixilu dya dyanga dya tembulu* dyexile ni makwinyi awana a jikovadu.
18 Moxi a inzo aseta-ku ithulu. Ku phalelu yoso ya inzo afwamesa-ku ni mabaya a sédulu, o matadi kexile mumoneka.
19 Solomá watungu dixilu ku hota dya inzo phala kutula-mu o Álaka ya Kikutu kya Jihova.
20 O dixilu dyexile ni makwinyi ayadi a jikovadu mu kukula, makwinyi ayadi a jikovadu mu kuzanza ni makwinyi ayadi a jikovadu mu kulebha. Mwene wa difwamesa ni ulu yakatunda, o kalatódyu wa kafwamesa ni mabaya a sédulu.
21 Mox’a inzo, Solomá wafwamesa-mu ni ulu yakatunda yu wate malubhambu mu dixilu dyofwamese ni ulu.
22 Mwene wafwamesa o inzo yoso ni ulu. O kalatódyu kexile bhu mbandu a Kididi Kikôla wakafwamesa we ni ulu.
23 Ku dixilu dya hota wabhange-ku jikelubini jiyadi, kala kelubini, mu kulebha yatenesa dikwinyi dya kovadu.
24 O dibhabha dimoxi dya kelubini mu kudizonga dyatenesene kovadu jitanu, o dibhabha dya kamukwa we kovadu jitanu. Tunde bhwa suku o dibhabha dimoxi dya kelubini ndu bhwa suku o dibhabha dyamukwa, mu kuzonga dyatenesene dikwinyi dya jikovadu.
25 O kelubini ya kayadi yakexile ni dikwinyi dya jikovadu. O jikelubini jiyadi jasokele ngo, jene jadifwile we.
26 O kelubini imoxi yakexile ni dikwinyi dya jikovadu mu kulebha, o yamukwa yakexile we ni dikwinyi dya jikovadu mu kulebha.
27 Mukusuluka, mwene watula o jikelubini jiyadi mu dixilu dyexile ku hota.* O mabhabha a jikelubini adizale, o dibhabha dimoxi dyexile mutula ku phalelu imoxi, o dibhabha dya kelubini yamukwa dyexile mutula ku phalelu yamukwa. O mabhabha ayadi amukwa a jikelubini aditakajana mu kaxi.
28 Mwene we wafwamesa o jikelubini ni ulu.
29 O jiphalelu joso* ja maxilu ayadi waseta-ku jifikula ja jikelubini ni jifikula ja maye ni ithulu.
30 Bhoxi dya inzo mu maxilu ayadi, wafwamesa-ku ni ulu.
31 Bhu mwelu wa dixilu dyexile ku hota, mwene wate-ku mabhitu o bhange ni mabaya a pinyu ni jiphiladi mu jimbandu, mu mbandu jiyadi ja mabhitu, kifwa o mbandu ya katanu.*
32 O mabhitu ayadi a mabaya a pinyu mwene waseta-ku jikelubini ni maye ni ithulu, yu wa afwamesa ni ulu. O jikelubini ni maye wa afwamesa ni ulu yotutujule ni malutelu.
33 O mbandu jiyadi ja mabhitu ja Kididi Kikôla, wa jibhange mu ukexilu umoxi ni mabaya a pinyu, yatokalele ku mbandu ya kawana.*
34 Mwene wabhange mabhitu ayadi ni mabaya a junípelu. Dibhitu dimoxi dyexile ni mbandu jiyadi, dyexile ku thandu dya kixamenenu kyexile mubhangesa kujinguluka. O dibhitu dyamukwa dyexile we ni mbandu jiyadi, dyexile ku thandu dya kixamenenu kyexile mubhangesa kujinguluka.
35 Ku mabhitu aseta-ku jifikula ja jikelubini ni jifikula ja maye ni ithulu yu wa jifwamesa ni ulu.
36 O ilumbu ya moxi, mwene wa itungu ni fiyada jitatu ja matadi o sete, ni fiyada imoxi ya mabaya a sédulu.
37 Ku muvu wa kawana mu mbeji ya Zive,* amateka kuta o kaboko ka inzo ya Jihova.
38 Mu muvu wa dikwinyi ni kamoxi mu mbeji ya bule* (kifwa mu mbeji ya kanake), azubha kutunga o inzo ya Nzambi kala kya mutendelesele. Kyenyiki, Solomá watungu o inzo mu sambwadi dya mivu.
Footnotes
^ Mu Heba.: “ana a Izalayele.”
^ Tala o Kiba. B15.
^ Tala o Kiba. B8.
^ Kovadu imoxi yasokele 44.5 ja jisentímetulu. Tala o Kiba. B14.
^ Mu Heba.: “tembulu ya inzo.”
^ Mba, “yexile ni 20 a jikovadu mu kulebha, kifwa, yasokele ni kukoma kwa inzo.”
^ Bhabha ya mulombolola o kididi kikôla.
^ Mu Heba.: “kadilu.”
^ Mu Heba.: “watungu.”
^ Kifwa, o kididi Kikôla kyexile bhu pholo ya Kikidi Kikôla Kinene.
^ Kifwa, o Kididi Kikôla Kinene.
^ Mu Heba.: “kikale moxi ni kukanga a.”
^ Kifwa, kilombolola o jimbandu mwexile mu nyenganana o mabhitu.
^ Kifwa, kilombolola o jimbandu mwexile mu nyenganana o mabhitu.
^ Tala o Kiba. B15.
^ Tala o Kiba. B15.
