Divulu Dya Dyanga Dya Jisobha 7:1-51
7 Solomá wabhange dikwinyi dya mivu ni kitatu mu kutunga o inzo yê.
2 Mwene watungu inzo a ixana Inzo ya Muxitu wa Libanu. O inzo yexile ni hama ya jikovadu* mu kulebha, makwinyi atanu a jikovadu mu kuzanza ni makwinyi atatu a jikovadu mu kitala. O inzo a itungu ku thandu a jiphiladi jiwana ja muxi wa sédulu, o ku thandu ateku o mikambu ya sédulu.
3 O mbandu ya thunda ya inzo, a ixiti ni mabaya a muxi wa sédulu, yene yexile ku thandu a mikambu yexile ku jiphiladi. Yatenesene makwinyi awana ni kitanu, kala munonono kwexile dikwinyi ni kitanu kya jiphiladi.
4 Kwexile minonono itatu ya jinjanena, kala njanena yexile ku pholo ya njanena yamukwa.
5 O dibokwenu ni mbandu ya mabhitu, yakexile ni mbandu jiwana. Kyene we kimoxi ni jinjanena jexile ku pholo ya jinjanena jamukwa, ku minonono itatu.
6 Mwene watungu o mbalanda bhukaxi ka jiphiladi, jexile ni makwinyi atanu a jikovadu mu kulebha ni makwinyi atatu a jikovadu mu kuzanza. O ku pholo kwexile o mbalanda ni jiphiladi jê.
7 Watungu we inzo ya kufundisila, mweji xikama mwene ku kyandu phala kufundisa. O inzo yiyi a ifwamesa ni mabaya a sédulu, tunde bhoxi kate ku mikambu.
8 O inzo mweji kala mwene mu kithádi kyamukwa, yadikexidile ni inzo ya kufundisila, maji a itungile mu ukexilu umoxi. Solomá watungu we inzo yadifu ni inzo ya kufundisila phala muhat’wê, mon’a Falawó.
9 O jinzo joso jiji, ajitungu ni matadi ate kalu yavulu, tunde ku kaboko ndu ku jiphalelu jalebha ni kukanga kate mu kithádi kyadikota. O matadi yá, o batule mu ukexilu watokala ni jiselote ja kubatula matadi, a asokejeka kyambote, kikale moxi ni kukanga.
10 O kaboko a kabhange ni matadi a makota ate kalu yavulu. Sayi matadi atenesa dikwinyi dya jikovadu, o matadi amukwa dinake dya jikovadu.
11 O ku thandu a matadi yá, kwexile dingi matadi amukwa ate kalu yavulu, o batule kyambote kala kyabhange ni mikambu ya muxi wa sédulu.
12 O mu kithádi kyadikota, mwexile minonono itatu ya matadi o batujule kyambote ni munonono umoxi wa mukambu wa muxi wa sédulu, kala kyexile mu kithádi kya inzo ya Jihova ni mu mbalanda ya inzo.
13 Sobha Solomá watumu kutakana Hilamu mu mbanza ya Tilu.
14 Mwene wexile mon’a mutudi watokalele ku mwiji wa Nafitali, o tat’ê wexile mukalakala ni ngondo mu mbanza ya Tilu. Hilamu wexile ni unjimu, kwijiya ni uhete wavulu wa kubhanga o kikalakalu kyoso kyalungu ni ngondo. Kyenyiki, mwene wayi kate kwa sobha Solomá yu wabhange o kikalakalu kyoso kya bhindamene Solomá.
15 Mwene wabhange jiphiladi jiyadi ja ngondo, kala philadi yexile ni dikwinyi ni dinake dya jikovadu mu kulebha, kwabhingile ngoji ya kuzonga ya dikwinyi ni kiyadi kya jikovadu phala kukondoloka o jiphiladi.
16 Wabhange we kapitele* jiyadi ja ngondo, phala kujitula ku thandu a jiphiladi. Kapitele kamoxi kexile ni kovadu jitanu mu kulebha, o kapitele kamukwa kexile we ni kovadu jitanu mu kulebha.
17 O kapitele ku thandu dya jiphiladi kexile ni wanda wa felu ni malubhambu. Kapitele kamoxi kexile ni sambwadi, kapitele kamukwa kexile we ni sambwadi.
18 Mwene wabhange minonono iyadi ya jilomá ya kondoloka o wanda, phala kuvungina o jikapitele jexile ku thandu a jiphiladi. Kiki kyene kyabhange ku jikapitele jiyadi.
19 O jikapitele jexile ku thandu a jiphiladi jadifwile ni itulu, mu kulebha jexile ni kovadu jiwana.
20 O jikapitele jexile ku thandu ya jiphiladi, ku thandu dyê kwene kwexile o wánda. Ku jikapitele jiyadi kwexile we hama jiyadi ja jilomá ku munonono.
21 Mwene wabhange philadi jiyadi ja mbalanda ya tembulu.* Wabhange philadi imoxi ku mbandu ya kadilu* yu wa iluku o dijina dya Jakini.* Mukusuluka, watungu o philadi ku mbandu ya kyasu* yu wa iluku o dijina dya Bowaji.*
22 O mbandu ya thandu ya jiphiladi ya difwile ni kithulu. Kyenyiki, o kikalakalu kya jiphiladi a kizubha.
23 Mukusuluka, mwene wabhange basiya yadikota ya menya a exana Musanza wa Kalunga. O basiya yiyi yexile ni dikwinyi dya jikovadu, tunde ku mbandu imoxi ndu ku mbandu yamukwa ni kovadu jitanu mu kulebha. Phala ku ijinguluka kwabhingile mukolo wa kuzonga wa makwinyi atatu a jikovadu.
24 Mu jimbandu joso ja basiya, afwamesa-ku ni jifikula jadifwile ni jimbinda, dikwinyi dya jikovadu ja jingulukile o basiya yoso ni minonono iyadi ya jimbinda ja ngondo mu basiya imoxi ngo.
25 O basiya yadikota a exana Musanza, yexile ku thandu dya dikwinyi ni kiyadi kya jingombe. Ngombe jitatu jalungile o jipholo ku mbandu ya thunda, jingombe jitatu jamukwa jalungile o jipholo ku mbandu kufwila o dikumbi, o jingombe jitatu jamukwa jalungile o jipholo ku mbandu ya lwiji, o jingombe jitatu jamukwa jalungile o jipholo ku mbandu ku tundila o dikumbi. O basiya yexile ku thandu dya jingombe, o jimbunda ja jingombe jexile koxi a basiya.
26 O basiya mu kukoma yasokele ni dikanda dya lukwaku,* o muzumbu wê wadifwanganene ni muzumbu wa kopho, yadifwanganene ni kithulu.* Phala ku izalesa kwabhingile midi jiyadi ja jibatu.*
27 Mukusuluka, mwene wabhange dikwinyi dya tumakalu* twa ngondo. Kala dikalu dyexile ni kovadu jiwana mu kulebha, kovadu jiwana mu kuzanza ni kovadu jitatu mu kitala.
28 O tumakalu a tubhange kiki: Mu jimbandu axiti-mu ni jikwadulu jobhange ni ngondo, ku jikwadulu jiji kwexile jifelu jexile mu jifikidila.
29 Mu jikwadulu jexile mu jimbandu ni mu jifelu jafikidile o jikwadulu, afwamesa-ku ni jifikula ja jihoji, ja jingombe ni ja jikelubini. O ku thandu ni ku lwiji dya jihoji ni dya jingombe, kwexile jifikula jedile kala isasa.
30 Kala kadikalu kexile ni malola awana a ngondo, o mu jimbandu jiwana mwexile ima yexile mu ifikidila. Bhoxi dya basiya bhwexile kixamenenu kyexile ni jifikula ja isasa jobhange ni ngondo mu jimbandu joso.
31 O ku mbandu ya thunda kwexile o dibokwenu, dyene dyexile ni kovadu imoxi mu kitala. O dibokwenu dya difwile ni dya kopho, o ixamenenu yexile ni kovadu imoxi ni kaxaxi mu kitala. O ku dibokwenu kwexile jifikula, maji o jikwadulu kijexile mu ukexilu wa dikanu dya kopho, kana.
32 O malola awana exile koxi a jikwadulu jakondolokele o kadikalu. O ixamenenu ya malola yadikwatenene ku kadikalu, kala dilola dyexile ni kovadu imoxi ni kaxaxi mu kitala.
33 O malola a tumakalu, edile kala o malola a dikalu dya ita. O ifikidilu yê, o jijande ni malola o bhange ni felu.
34 Kwexile ifikidilu iwana mu jihota ja kadikalu, o ifikidilu yiyi a ibhangele ni felu yexile ku kadikalu.
35 Ku thandu dya kadikalu kwexile kima kya jingulukile o basiya, yexile ni kaxaxi ka kovadu mu kithala. Ku mbandu yiyi ya thunda ya kadikalu, o ifikidilu ni jikwadulu mu jimbandu ajibhangele ni felu, jatokalele we ku kadikalu.
36 Ku thandu dya ifikidilu ni ku jikwadulu jexile mu jimbandu, mwene wate-ku jifikula ja jikelubini, ja jihoji ni ja maye. Yu wabhange-ku jifikula ja isasa mu jimbandu joso.
37 Kiki kyene kyabhange o dikwinyi dya tumakalu: Tumakalu twenyoso atubhange mu ukexilu umoxi, kikale mu kulebha, kikale mu kuzanza ni mu kitala.
38 Mwene wabhange dikwinyi dya jibasiya ja ngondo. Phala kwizalesa o jibasiya kwabhingile makwinyi awana a jibatu. Kala basiya yexile ni kovadu jiwana, o tumakalu twoso twexile ni basiya.
39 Kyenyiki-phe, mwene watula tumakalu tutanu ku mbandu ya kadilu ka inzo ni tumakalu tutanu ku mbandu ya kyasu ya inzo. O basiya wa itula ku pholo ya inzo ku mbandu ya lwiji.
40 Hilamu wabhange we o jibasiya, ivotelu ni matijela. Kyenyiki, Hilamu wazubha o kikalakalu kyoso kya mubhana sobha Solomá mu inzo ya Jihova.
41 O jiphiladi jiyadi ni jikapitele jexile mu ukexilu wa ditijela, jexile ku thandu dya jiphiladi jiyadi. O mawanda ayadi exile muvungina o jikapitele jexile mu ukexilu wa ditijela ku thandu dya jiphiladi jiyadi.
42 Hama jiwana ja jilomá phala o mawanda ayadi. Kala wanda wexile ni minonono iyadi ya jilomá phala kuvungina o jikapitele jiyadi jexile mu ukexilu wa ditijela, jexile ku thandu dya jiphiladi jiyadi,
43 o dikwinyi dya tumakalu ni dikwinyi dya jibasiya jexile ku tumakalu.
44 O basiya yadikota a ixana musanza wa kalunga ni dikwinyi ni kiyadi kya jingombe jexile koxi dya basiya yiyi yadikota,
45 o itutu ni ivotelu ni matijela ni imbamba yoso yamukwa yabhange Hilamu ni ngondo phala sobha Solomá ni inzo ya Jihova.
46 Sobha watumu kubhanga o ima yiyi ni utuma, mu mbambe ya Njolodá bhukaxi ka Sukote ni Zeletane.
47 Solomá kazongo o ima yoso mukonda yavudile. O ngondo ka izongele mukonda katenene ku ikwata konda.
48 Solomá wabhange o ima yoso phala o inzo ya Jihova, o kalatódyu ka ulu ni meza a ulu phala kutula-mu o jimbolo jikôla,
49 ni matudilu a tundeya a ulu yafina. O ku mbandu ya kadilu kwexile matudilu atanu a tundeya, o ku mbandu ya kyasu kwexile we matudilu atanu a tundeya ku pholo ya dixilu. Wabhange we o ithulu, o tundeya ni ijimwinu ya ulu,
50 o jibasiya ni jitezola* ni matijela ni jikopho ni ididi ya kutula o makala, yobhange ni ulu yafina ni ixamenenu ya ulu phala o mabhitu a dixilu, kifwa, o Kididi Kikôla Kinéne ni ixamenenu phala o mabhitu a tembulu.*
51 Kyenyiki, sobha Solomá wazubha o kikalakalu kyoso kyatokalele o kubhanga phala o inzo ya Jihova. Mukusuluka, Solomá wambata mu tembulu o ima yoso yabhakwile tat’ê Davidi kala ima ikôla, yu watula-mu we o phalata ni ulu ni imbamba yamukwa mu kididi mwene mubhaka o ima ya valolo mu inzo ya Jihova.
Footnotes
^ Kovadu imoxi yasokele ni 44.5 ja jisentímetulu. Tala o Kiba. B14.
^ O mbandu ya thunda ya philadi yofwamese kyambote.
^ Bhabha kya mulombolola o Kididi Kikôla.
^ Mba, “ku mbandu ya lwiji.”
^ Dilombolola, “kwila mwene [kifwa, Jihova] ukolesa.”
^ Mba, “ku mbandu ya thunda.”
^ Mba nange, dilombolola “nguzu.”
^ Yexile ni 7.4 ya jisentímetulu. Tala o Kiba. B14.
^ Mba, “lírio.”
^ Yasokele ni 22 a jilitulu. Tala o Kiba. B14.
^ Mba, “tumakalu phala kututa o menya.”
^ Felamenda phala kujima nayu o tubhyia twa mvela.
^ Bhabha kya mulombolola o Kididi Kikôla.
