Divulu Dya Dyanga Dya Jisobha 9:1-28
9 Kyoso Solomá kyazubha kutunga o inzo ya Jihova ni inzo ya sobha ni yoso yamesenene kubhanga mwene,
2 Jihova wamoneka dingi kwa Solomá muveji ya kayadi kala kya mu monekene kya ku Ngibiyone.
3 Jihova wambe, wixi: “Ngevu o kudyonda kwé ni musambu u wabhange kokwami. Ngaxikina o inzo yiyi i watungu mu kuta-mu o dijina dyami kate ku hádya ni hádya, o mesu’ami ni muxima wami, wanda kala jinga mu kididi kiki.
4 Se wenda jinga mu jinjila jami ni muxima woso, kala kyabhangele tat’é Davidi, mu kubhanga yoso i ngakutumu ni kubelesela o itumu yami ni jingonge jami,
5 kyenyiki-phe, nganda bhangesa o ungana wé kunangenena mu Izalayele kate ku hádya ni hádya kala ki ngakanena kwa tat’é Davidi, mu kwamba: ‘Ku mbutu yé kwanda kala jinga muthu wanda xikama ku kyandu kya Izalayele.’
6 Maji-phe se enu ni twana twenu mweha ku ngikayela ni mukambe kukayela o itumu ni jingonge ji nga mibhana, anga muya musidivila jinzambi jengi ni ku jifukamena,
7 nganda bwikisa Izalayele mu ixi i nga abhana. Nganda dituna o inzo yiyi i ngaxikina phala o dijina dyami. O mundu woso mba ifuxi yoso yanda xongwena ni kusebhulula Izalayele.
8 O inzo yiyi yanda xala kipulungunzu kyahatu. Woso ubhita, mu ku imona wanda diwana, wanda xika mwixi* ni kudibhwidisa: ‘Mukonda dyahi Jihova wabhange kiki ku ixi yiyi ni ku inzo yiyi?’
9 Kyenyiki, o athu anda tambwijila: ‘Kiki kyabhiti mukonda ene abhana dikunda kwa Jihova o Nzambi yâ, wakatula o jikuku jâ ku Ijitu, ya adikwatenena ku jinzambi jengi, mu ku jifukamena phala ku jibheza. Kiki kyene kyabhangesa Jihova kwabhekela o divuwa dyoso didi.’”
10 Kudisukilu dya makwinyi ayadi a mivu yabhange Solomá mu kutunga o jinzo jiyadi, o inzo ya Jihova ni ya sobha,
11 Hilamu sobha ya Tilu wabhanene kwa Solomá mabaya a muxi wa sédulu ni wa junípelu ni ulu yoso yabhindamene Solomá. Mukonda dyakiki, o sobha Solomá wabhana kwa Hilamu makwinyi ayadi a jisanzala ku Ngalileya.
12 Kyenyiki, Hilamu watundu ku Tilu, yu weza mutala o jisanzala ja mubhele Solomá. Maji mwene kajiwabhela.
13 Mwene wambe, wixi: “Phang’yami tata, o jisanzala ji wa ngibhana kijawabha, kana.” Kyenyiki, o jisanzala jenyojo a jiluku o dijina dya Kabule* kate mu izuwa ya lelu.
14 Hilamu watumikisine hama ni makwinyi ayadi a jitalendu* ja ulu kwa sobha.
15 Sobha Solomá wexana athu phala kubhanga kikalakalu kya nguzu, kutunga o inzo ya Jihova ni inzo ya sobha, kubhanga o mulundu,* o ilumbu ya Jeluzaleme, Hazole, Mejidu ni Ngezele.
16 (Falawó sobha ya Ijitu walwu ita yu watolola o mbanza ya Ngezele. Wate túbhya mu mbanza yu wajibha akwa Kanana atungile mu mbanza yenyoyo. Mukusuluka, wabhana o mbanza kwa mon’ê, o muhatu wa Solomá, kala ujitu wa ku musula.*)
17 Solomá watungu Ngezele ni Betolone ya Lwiji,
18 watungu we Balate, Tamala, mu kikangalakata kyakexile mu ixi yenyoyo.
19 Mwene watungu we o jimbanza ja kubhakela-mu o kudya ni jimbanza ja makalu a ita, o jimbanza phala yó endela mu jikabalu ni yoso yamesenene kutunga Solomá mu Jeluzaleme ni mu Libanu ni mu jixi joso jexile mutumina mwene.
20 Ku athu oso asubhukile ku akwa Mamodi, ku akwa Hiti, ku akwa Mapelezi, ku akwa Mahivi ni ku akwa Jebuze kabhangele mbandu ku akwa Izalayele,
21 kifwa o mbutu yasubhuka ku ifuxi yiyi akambele ku abwikisa* ku akwa Izalayele, Solomá wa abhange abhika phala kubhanga ikalakalu ya nguzu. Ene abhika kate mu izuwa ya lelu.
22 Maji ku akwa Izalayele Solomá kabhangesa-ku muthu kukala mubhik’ê, mukonda ene exile masoladi mê, jiselevende, ilamba, jifixiyadi ni atwameni a yó akwa kwendesa o makalu a ita ni jikabalu.
23 Kwakexile hama ni makwinyi atanu a athu akexile ku pholo mukwendesa o ikalakalu ya Solomá. Yá ene exile mukwendesa o akalakadi.
24 O mon’a Falawó wa muhatu, watundu mu mbanza ya Davidi phala kuya mu inzo yê ya mutungile Solomá. Mukusuluka, mwene watungu we Milo.*
25 Lutatu ku muvu Solomá wexile mubhakula jisata ja kwoha ni jisata ja paze ku kalatódyu katungile mwene phala Jihova. Mwene wexile we mubandesa o dixi dya jisata ku kalatódyu kexile bhu pholo ya Jihova. Kyenyiki, mwene wazubha kutunga o inzo.
26 Sobha Solomá wabhange we jinaviyu javulu ku Ezone-Ngabele, ya zukamene ku Elate bhu mbandu a musanza wa Kalunga Kakusuka mu ixi ya Idomo.
27 Hilamu watumikisa o jinaviyu ni jiselevende jê exile ni uhete wa ku jendesa phala kukalakala kumoxi ni akalakadi a Solomá.
28 Ene ayi ku Ofile ya akatula-ku hama jiwana ni makwinyi ayadi a jitalendu ja ulu, anga ajibheka kwa sobha Solomá.
Footnotes
^ Mba, “mwiji.”
^ Mba nange, “ixi ya kambele valolo.”
^ Talendu imoxi yasokele ni 34.2 ya jikilu. Tala o Kiba. B14.
^ Mba, “Milo.” Kizwelu mu dimi dya Hebalayiku kilombolola “kwizalesa.”
^ Mba, “ujitu wa ukaza.”
^ Tala o Dilombolwelu.
^ Kizwelu mu dimi dya Hebalayiku kilombolola “kwizalesa.”
