Mukanda wa Dyanga ku Akwa Kolindu 14:1-40
14 Sulukenu mu kudilondekesa o henda. Maji sotenu* we o mauhete atunda kwa Nzambi, benge-benge o uhete wa kuzwela kala jipolofeta.
2 Kuma woso uzwela mu dimi dyengi, ka mu zwelela phala athu, maji phala Nzambi. Mukonda sé-ku muthu utendela o ima ya muzwela, sumbala mwene wa muzwela o ikutu ya Nzambi bhukaxi ka nzumbi ikôla.
3 Woso uzwela kala polofeta uswinisa, ukolokotesa, ukonda o malamba a athu ni izwelu yê.
4 Woso uzwela mu dimi dyengi, udiswinisa ngó mwene mudyê, maji woso uzwela kala polofeta, uswinisa o kilunga kyoso.
5 Nga mesenene kwila, enu enyoso muzwela mu madimi avulu, maji mu dyami, kota se muzwela kala mu jipolofeta. Mu kidi, woso uzwela kala polofeta, wa betakota, o muthu uzwela mu madimi avulu ndenge, kikale ngó se mwene ulombolola* o ima ya muzwela phala kuswinisa o athu oso mu kilunga.
6 Phange jami, se kindala ngiza ku mi kunda ni ku mi zwelela mu madimi avulu, o kwila kiki kyeji mi kwatekesa? Ngatokala ku mi kwatekesa bhukaxi ka maka u ngi tambula kwa Nzambi, bhukaxi ka kwijiya, bhukaxi ka maka a upolofeta, ni ilongesu ya Nzambi.
7 Kyene we kibhita ni ima ya kuxika ya kambe o mwenyu, kala o mbéndu ni mbánza. Se muthu uxika o mbéndu mba mbánza mu ukexilu wayibha, kyebhi o athu kyanda tena kwijiya o mwimbu?
8 Mukonda se o koloneta ka i xiki kyambote, nanyi wanda disokejeka phala kuya mu ita?
9 Kyene we kimoxi, se mu kamba kuzwela ima ka itendela ku athu, kyebhi ene kyanda tena kwijiya o ima i mwa mesena kuzwela? Kyadifu ni kuzwelela o kitembu.
10 Mu ngongo o athu azwela madimi avulu, maji madimi oso atena kwatendela.
11 Se ngi kamba kutendela o ima ya muzwela o muthu, nganda kala kála ngi mukwa ixi yengi phala mwene. O yó wa muzwela, wanda kala we kála mukwa ixi yengi phala eme.
12 Kyenyiki, enu wenu kuma mwa mesena kyavulu kutambula o mauhete a nzumbi ikôla, sotenu kukala ni mauhete avulu anda swinisa o kilunga.
13 Mu kiki, woso uzwela mu dimi dyengi, asambe phala atene kulombolola* o ima yazwela kyá.
14 Kuma se ngi samba mu dimi dyengi, keme nga muzwela, maji o ujitu u nga tambula bhukaxi ka nzumbi ikôla. Mukonda eme ki ngi tendela o ima i ngi zwela.
15 Ihi i ngatokala o kubhanga? Nganda samba ni uhete u nga tambula bhukaxi ka nzumbi ikôla, maji nganda samba we phala akwetu atendele o ima i nga muzwela. Nganda kwimba ni uhete u nga tambula bhukaxi ka nzumbi ikôla, maji nganda kwimba we phala akwetu atendele yoso i nga mu kwimba.
16 Kyenyiki, se usakidila Nzambi ni uhete u wa tambula bhukaxi ka nzumbi ikôla, kyebhi o muthu woso-woso wala mwaxaxi kenu kyanda tambwijila, “Kyene”* ku kisakidilu kyé, se mwene katendela o ima i wa zwela?
17 Eye wa mu sakidila mwene Nzambi mu ukexilu wambote, maji ki wa mu swinisa mukwenu.
18 Ngi sakidila Nzambi mukonda eme ngi zwela dingi mu madimi avulu, enu enyoso ndenge.
19 Maji kyoso ki tu dyongeka mu kilunga, ngi mona kwila kota kuzwela izwelu itanu atena ku itendela ku athu phala kwalonga we, muveji dya kuzwela kwinyi dya midi dya izwelu mu dimi dyengi.
20 Jiphange jami, ki mukale mu xinganeka kala mu ana ndenge. Mukala mu ana ndenge mu ima yayibha, maji mu xinganeka kala mu adyakime.
21 O Kijila kya Mozé kyambe: “Jihova wambe, wixi: ‘Nganda tangela o maka mami ku mundu yú bhukaxi ka athu azwela mu madimi avulu ni bhukaxi ka akwa jixi jengi. Maji né kiki, ene kanda xikina kwívwa o maka mami.’”
22 Kyenyiki, o uhete wa kuzwela mu madimi avulu, ki kijimbwete phala yó axikana Ngana, maji kijimbwete phala o athu kaxikana Ngana. Maji o uhete wa kuzwela kala polofeta, ki watokala kwa yó kaxikana Ngana, maji ku athu a muxikana.
23 Mu kyenyiki, se o kilunga kyoso kidibhongolola, o athu akala muzwela mu madimi avulu, anga mu bokona athu oso-oso mba athu kaxikana Ngana, ene kanda fika kwila enu mwa saluka?
24 Maji se mu kala muzwela kala mu jipolofeta anga kubokona muthu woso-woso mba muthu kaxikana Ngana, mwene anda mu bazela ni ku mu tokwesa mu ima yanda kwívwa.
25 Mu kwijiya o ima yala ku muxima wê, mwene wanda fukama ni pholo bhoxi ni kubheza Nzambi, anga uzwela, wixi: “Mu kidi, Nzambi wala mwene mwaxaxi k’enu!”
26 Phange jami, kyoso ki mu dyongeka, amoxi mudyenu emba mimbu, amukwá alonga, amukwá hanji azwela o njimbu ya tambula kwa Nzambi, amukwá azwela mu madimi engi, amukwá alombolola o madimi enyá. Mukonda dyahi mwa tokala kubhanga o ima yoso yiyi? Ima yoso yiyi mu ibhanga phala kudiswinisa mudyenu.
27 Se bhukala athu a muzwela mu dimi dyengi, akale ngó kiyadi mba kitatu. Kala muthu azwele mu kithangana kyê, maji bhukale we muthu ulombolola* o ima ya muzwela.
28 Maji se mu kilunga ki mwala muthu phala kulombolola* o ima ya muzwela, watokala kudixibha, azwele ni Nzambi ku muxima wê.
29 Se mu kilunga mu kala jipolofeta jiyadi mba jitatu, éne atokala kuzwela, akwá atongolole o ima ya muzwela.
30 Maji se mu kithangana kyenyókyo o muthu waxikama watambula njimbu ya Nzambi, o muthu wa muzwela watokala kudixibha.
31 Mukonda enu enyoso mutena kuzwela kala mu jipolofeta, maji kala muthu azwele mu kithangana kyê, phala athu oso adilonge anga atambule o kiswinisu.
32 Maji o jipolofeta atokala kulanga o uhete wâ wa kuzwela kala jipolofeta, a utambula bhukaxi ka nzumbi ikôla.
33 Mukonda Nzambi ki mukwa kavwanza, maji mwene Nzambi ya paze.
Kala kyene mu bhita mu ilunga yoso ya athu o’sole.*
34 Mu kilunga o ahatu atokala adixibha, ene kala ni ufôlo wa kuzwela. Ene atokala kuxila o mayala kala kizwela o Kijila.
35 Se ene amesena kwijiya kima, atokala kwibhula ku anumi’yâ kubhata. Mukonda kima kya jisonyi phala o muhatu kuzwela mu kilunga.
36 O kwila o mak’â Nzambi atundu kokwenu? O kwila enu ngó mwa atambula?
37 Se muthu ubanza kwila polofeta, mba watambula uhete bhukaxi ka nzumbi ikôla, mwene watokala kwijiya kwila o ima i nga mi sonekena, itumu ya Ngana.
38 Maji se muthu kamesena kubhana mátwi mu maka yá, Nzambi kanda musuwa.*
39 Kyenyiki phange jami, diswinisyenu phala muzwele kala mu jipolofeta, maji kanenu kufidisa akwenu kuzwela mu madimi avulu.
40 Ima yoso yabhingi kubhita mu ukexilu watokala ni kuyuka kwoso.
Footnotes
^ Mba, “sotenu ni kuswina kwoso.”
^ Mba, “u lungulula.”
^ Mba, “kulungulula.”
^ Mba, “Amen, mu dimi dya Ngeleku.”
^ Mba, “kulungulula.”
^ Mba, “u lungulula.”
^ Mba, “athu akôla.”
^ Mba nange, “se muthu ka mesena kutendela o maka enyá, mwene wa-nda kala mwene kyenyiki.”
