Mukanda wa Dyanga ku Akwa Kolindu 16:1-24
16 Yalungu ni kusangela o kitadi phala o athu a asolo* kwa Nzambi, kayelenu o itendelesu i nga bhana ku jiphange ja ilunga ya Ngalásya.
2 Mu kizuwa kya dyanga kya semana, kala muthu mudyenu abhake kima, kala kyasoko nakyu, phala kyoso kinganda bhixila, ki mu bhongolole kitadi.
3 Kyoso kinganda bhixila, nganda tumikisa mayala ku Jeluzaleme phala kwambata o ujitu u mwabhana ni muxima woso. Nganda tumikisa o mayala u mwa tumbula mu mikanda yenu kwila athu afiyele.
4 Se kyafwama eme wami kuya, nganda ya kumoxi ni ene.
5 Nganda mikunda kyoso kinganda zubha kubhitila ku Masedonya, mukonda kwene kunganda bhitila,
6 nange nganda kala ni enu tu ithangana, mba nange o thembu yoso ya mbambi i ngi bhitila kwenyóko, phala mu ngi xinjikile mu njila mu ngandaya.
7 Mukonda ki ngi mesena ku mi mona ngó tu ithangana, maji nga mesena kubhita thembu ni enu, se Jihova wa kyandala.
8 Maji nganda kala hanji mu Efezu katé kyanda bhita o Fesa ya Pendekoxi,
9 mukonda kwa ngi monekena ikalakalu yavulu* phala ku ibhanga, maji kwala jinguma javulu.
10 Se Timote u misanga kwenyóko, bhangenu yoso phala mwene kakale ni wôma kyoso kyanda kala ni enu, mukonda kala eme, mwene wa mubhanga we o ikalakalu ya Jihova.
11 Kyenyiki, kana muthu u mu tobhesa,* maji mwehyenu abhange o njila yê ni kutululuka, phala a ngisange, mukonda eme ni jiphange twa mu mukinga.
12 O phang’yetu Apolo, nga mu dyondela phala aye ku mikunda kumoxi ni jiphange. Mwene kamesena kuya kindala, maji kyoso kyanda kala ni kithangana, wandaya ku mikunda.
13 Dilangyenu, mu kolokote mu kixikanu, swinenu, mukale ni nguzu.
14 Yoso i mubhanga, mu ibhanga ni henda.
15 Jiphange jami, ngamesena ku mitangela kima: Kala ki mwejiya, Setefanu ni mwiji wê, éne adyangele kuxikana Ngana mu mbanza ya Akaya, ene a dibhakula we mu kukwatekesa o athu a asolo* kwa Nzambi.
16 Athu kala ene, mu atumaka, ni oso akwatekesa ni kukalakala ni kuswina kwoso.
17 Maji nga sanguluka kyavulu, mukonda Setefanu, Folutunatu, ni Akayuku a ngisange, ene a ngi kwatekesa bhu kididi kyenu.
18 Ene a ngi swinisa eme, enu we a mi swinisa. Mu kyenyiki, bhanenu valolo ku athu kala ene.
19 O jiphange mu ilunga ya Azya a mi menekena. Akila ni Pidisila kumoxi ni jiphange adyongeka mu inzo yâ, a mi tumikisa o umenekenu mwa Ngana.
20 O jiphange joso a mi menekena. Dimenekenyenu mudyenu ni jinzobole.*
21 Yú wene o umenekenu wami, eme ngi Phawulu. O umenekenu yú, nga usoneka ni lukwaku lwami.
22 Se muthu kazolo Ngana, a mu bhubhidile. Twa kudyóndo Ngana yetu, zá kyá!
23 O ngalasa ya Ngana yetu Jezú, ikale ni enu!
24 O henda yami ikale momwenu, mukonda mwala mu maxibulu a Kidistu Jezú.
Footnotes
^ Mu Ngel.: “athu akôla.”
^ Mu Ngel.: “mwelu wa dikota.”
^ Mba, “kana muthu u mu tenda.”
^ Mu Ngel.: “athu akôla.”
^ M’ukulu kyoso o Jikidistá kya kexile mu di sanga, akexile mu di menekena ni jinzobole.
