Dya Dyanga Dya Malunda 11:1-47
11 Mu kubhita thembu, akwa Izalayele ayi kwa Davidi ku Hebolone, ya a mwambela, exi: “Etu enyoso tu jiphange jé.*
2 Ngana, m’ukulu kyoso Sawulu kyexile sobha yetu, eye wexile mukala ku pholo mu ita ya Izalayele.* Jihova wazwelele, wixi: ‘Inga o mundu wami Izalayele, ukale mutwameni wâ.’”
3 Kyenyiki, o adyakime a Izalayele ayi muzwela ni Davidi ku Hebolone. Sobha Davidi anga uta-nawu kikutu ku Hebolone bhu pholo ya Jihova. Mukusuluka, ene atumbika Davidi ku usobha phala kutumina akwa Izalayele, kala kyatendelesele Jihova kwa Samuwele.
4 Ku pholo dya kwenda, Davidi ni Izalayele yoso ayi mu Jeluzaleme, kifwa ku Jebuze, o mbanza mwatungile akwa Jebuze.
5 O akwa Jebuze axongwena Davidi, mu kwamba: “Eye nuka wanda bokona mu mbanza yiyi!” Kyenyiki, Davidi watambula o mbanza ya Ziyone, lelu a ixana Mbanza ya Davidi.
6 Davidi wambe, wixi: “Bhukaxi kenu, woso utolola akwa Jebuze, mwéne wanda kala o mutwameni ni kilamba.” Jowabe mon’a Zeluya, mwene wa dyanga kubanda, anga ukala o mutwameni.
7 Kyenyiki, Davidi wayi mutunga mu mbonge. Mukonda dya kiki, o kididi kyenyokyo a kiluku Mbanza ya Davidi.
8 Mwene wamateka kutunga o mbanza yoso tunde ku mulundu* ndu mu jimbanza ja zukamene. Jowabe mwéne wazubha o kutungulula o mbanza yoso.
9 Kyenyiki, o kutena kwa Davidi kwayi ni kudibandekesa, mukonda Jihova dya ifuxi wexile-nê.
10 Yá ene o atwameni a mazonda a ita a Davidi ni Izalayele yoso, akwatekesa o utuminu wê ni ku mubhanga sobha kala kyazwelele Jihova yalungu ni Izalayele.
11 Yá ene o majina a mazonda a Davidi: Jokebeyame, mona a diyala mukwa Hakimone, wexile mutwameni wa masoladi atatu. Sayi kizuwa mwene wajibha hama jitatu ja mayala ni sosa yê.
12 Mukukayela, kwexile Eliyazale mon’a Dodo, mukwa Ahohi. Mwene wexile mwaxaxi ka mazonda atatu.
13 Mwene wexile ni Davidi ku Paze-Damine, bhu kididi bwa dibhongolokele o akwa Fidíxa phala o ita. Kwenyoko kwexile dibhya dya sevada, o masoladi alenge mukonda dya akwa Fidíxa.
14 Maji mwene wemana mukaxi ka dibhya, yu walange o dibhya mu kujibha o akwa Fidíxa. Mukonda dya kiki, Jihova wa abhana kikôwe* kyadikota.
15 Ku makwinyi atatu a atwameni a masoladi, kwatundu kitatu kya masoladi ayi ku ndanji phala kudisanga ni Davidi mu dibanda dya Adulamu, kyoso o masoladi akwa Fidíxa kyakexile mu honga ya Lafayime.
16 Mu kithangana kyenyokyo, Davidi wakexile mu kididi kyê kya kudisweka, o kibuka kya masoladi kya akwa Fidíxa kyexile ku Beleme.
17 Davidi anga wamba, wixi: “Ngamesena kyavulu kunwa o menya a kixima kyazukama ni mwelu wa mbanza ya Beleme.”
18 Kyenyiki, o mazonda atatu abokona mwakexile akwa Fidíxa, akatula menya mu kixima kyakexile bhwa zukama ni mwelu wa mbanza ya Beleme, ya abheka o menya kwa Davidi. Maji Davidi ka xikina ku anwa. Wa abhakula kwa Jihova, mu ku alundulwila bhoxi.
19 Mwene wambe: “Mukonda dya kuxila Nzambi yami, eme nuka ngeji xikina kubhanga o kima kiki. Kyebhi kingeji nwa o manyinga a mayala ate o myenyu yâ mu kilwezu? Kuma ene ate o myenyu yâ mu kilwezu, phala kwiza ni menya.” Mukonda dya kiki, mwene waditunu ku anwa. Yiyi, yene o ima yabhangele o mazonda atatu a Davidi.
20 Abizayi phange ya Jowabe, mwéne wexile o kabhitangu ka kibuka kyamukwa kya mazonda atatu. Mwene wajibha hama jitatu ja mayala ni sosa yê, wafumanene kyavulu kala o mazonda atatu adyanga.
21 Ku kitatu kyâ, mwéne dingi wafumanene o kiyadi kya mukwa ndenge, mwéne wakexile ku pholo yâ, maji kasokele ni mazonda atatu adyanga.
22 Benaya mon’a Joyada wexile diyala dyaswina,* mwene wabhange ima yavulu ya undanda ku Kabiziyele. Mwene wajibha o an’a ayadi a Adiyele mukwa Mowabe. Watuluka mu kixima mu kizuwa kyexile mubwa mbundu yavulu, yu wajibha-mu hoji.
23 Mwene wajibha we diyala mukwa Ijitu wexile dizonda dyonene, wexile ni kovadu* jitanu mu kulebha. Sumbala o mukwa Ijitu wexile ni sosa yadikota bhu maku, Benaya wayi mubhânga-nê ni mbangala. Mwene watambula o sosa bhu maku a mukwa Ijitu, yu wa mujibha ni sosa yê mwene.
24 Yiyi o ima yabhangele Benaya mon’a Joyada. Mwene wafumanene kyavulu kala o mazonda atatu.
25 Sumbala wafumanene kyavulu o makwinyi atatu a masoladi ndenge, maji kasokele ni mazonda atatu. Davidi-phe wa musolo phala kukala mulangidi wê.
26 O mazonda a ita a kifuxi kya masoladi enya: Azayele phange ya Jowabe, Ele-Hanane mon’a Dodo mukwa Beleme.
27 Samote o mukwa Halodite, Heleji o mukwa Pelone,
28 Ila mon’a Ikexi mukwa Tekowa, Abiyezele mukwa Anatote.
29 Sibekayi mukwa Huzata, Iláyi mukwa Ahohi,
30 Mahalayi mukwa Notofa, Helede mon’a Bahana mukwa Notofa,
31 Ithayi mon’a Dibayi mukwa Ngibeya ya akwa Bejamí, Benaya mukwa Pilatone,
32 Hulayi mukwa honga ya Ngahaxi, Abiyele mukwa Bete-Halabá,
33 Azemavete mukwa Bahudimi, Eliyahaba mukwa Salabimu,
34 o an’a Haseme mukwa Jizonita, Jonatá mon’a Sagi mukwa Halale,
35 Ahiyamu mon’a Sakala mukwa Halale, Elifale mon’a Ule,
36 Hefele mukwa Mekela, Ahiya mukwa Pelone.
37 Hezulo mukwa Kalumelu, Nahalayi mon’a Ezebaye,
38 Jowele phange ya Natane, Mibale mon’a Ngelaye,
39 Zeleke mukwa Amone, Nahalayi mukwa Behelote, o mukwatekexi wa Jowabe mon’a Zeluya,
40 Ila mukwa Itedite, Ngalebe mukwa Itedite,
41 Udiya mukwa Hiti, Zabadi mon’a Alayi,
42 Adina mon’a Siza mukwa Lubene, o mutwameni wa akwa Lubene ni makwinyi atatu a mayala exile-nê.
43 Hanane mon’a Mahaka, Jozafate mukwa Mitinita,
44 Uziya mukwa Axitalote, Sama ni Jehiyele an’a Hotane mukwa Alowele.
45 Jediyale mon’a Nzidi ni phang’yê Joha mukwa Tiza,
46 Ediyele mukwa Mahavita, Jedibayi ni Josaviya, an’a Elenahame, Itima mukwa Mowabe,
47 Ediyele, Obede ni Jahaziyele mukwa mezobaya.
Footnotes
^ Mu Heba.: “tu xitu yê, tu kifuba kyê.”
^ Mu Heba.: “eye wakexile mu twamenena Izalayele mu kutunda ni mu kubokona.”
^ Mba, “Milo.” O kizwelu kiki mu Hebalayiku kilombolola, “kwizalesa.”
^ Mba, “kubhuluka.”
^ Mu Heba.: “mona wa diyala dyala ni valolo.”
^ Mwene wexile 2.23 ja jimetulu. Tala o Kiba. B14.
