Dya Dyanga Dya Malunda 13:1-14
13 Davidi wadikundu ni atwameni a jimidi ni a jihama ni atwameni amukwa.
2 Mukusuluka, Davidi wambela o Izalayele yoso, wixi: “Se kya miwabhela ni kwila Jihova Nzambi yetu u kixikina, tutumikise akunji ku jiphange jetu jamukwa mu jixi joso ja Izalayele ni ku akunji ni akwa Levi ala mu jimbanza* joso, phala tudyongeke kumoxi.
3 Ni tubheke o Álaka ya Nzambi yetu.” Mukonda mu izuwa ya Sawulu ene kalangele o Álaka.
4 O mundu woso waxikina, mukonda kya awabhela.
5 Kyenyiki, Davidi wongeka o Izalayele yoso, tunde ku ngiji* ya Ijitu ndu ku Lebo-Hamati,* phala kukatula o Álaka ya Nzambi yakidi ku Kidyate-Jadimi.
6 Davidi ni Izalayele yoso ayi ku Bahala, kifwa, Kidyate-Jadimi yatokala kwa Judá, mutakana o Álaka ya Jihova o Nzambi yakidi, bhwene mukola o dijina dyê, waxikama ku kyandu kyê kyala ku thandu a* jikelubini.
7 Kyenyiki, ene ate o Álaka ya Nzambi yakidi mu dikalu dya ubhe, a ikatula mu inzo ya Abinadabe. Uzá ni Ahiyo ene exile mu kwendesa o dikalu.
8 Davidi ni akwa Izalayele yoso asangulukile bhu pholo ya Nzambi yakidi ni nguzu yâ yoso ni kwimba ni kuxika o jimbánza ni tungoji ni jingoma ni misaxi ni jikoloneta.
9 Maji kyoso kyabhixila mu kididi kya kubhyatela, ku Kidone, Uzá wasununa o lukwaku lwê phala kukwata o Álaka, mukonda o jingombe jejibhangesa o Álaka kubwa bhoxi.
10 Kyenyiki, o njinda ya Jihova yeza ku thandu dya Uzá, Mwene anga u mujibha, mukonda dya kusununa o lukwaku lwê phala kukwata o Álaka. Uzá anga ufwa bhenyobho bhu pholo ya Nzambi.
11 Maji Davidi ukala ni njinda* mukonda o njinda ya Jihova yeza ku thandu dya Uzá. Kyenyiki-phe, o kididi kyenyokyo akiluku o dijina dya Peleza-Uzá,* kate mu kizuwa kya lelu.
12 Mu kizuwa kyenyokyo, Davidi ukala ni wôma wa Nzambi yakidi, anga wamba, wixi: “Kyebhi ki nganda kwambata o Álaka ya Nzambi yakidi mu mbanza yami?”
13 Davidi kambata dingi o Álaka mwatungile mwene, mu Mbanza ya Davidi. Maji, mwene watumu kwambata o Álaka mu inzo ya Obede-Edomo, mukwa Ngate.
14 O Álaka ya Nzambi yakidi anga ixala mu inzo ya Obede-Edomo. Yene ikala mwenyomo mu mbeji jitatu. Jihova wexile mubesowala Obede-Edomo ni athu oso atokala ku dibhata dyê ni yoso yexile nayu.
Footnotes
^ Mu Heba.: “jimbanza ni ididi yâ yakwingila-mu o ibhaku.”
^ Mba, “Sihole.”
^ Mba, “dibokwenu dya Hamati.”
^ Mba nange, “bhukaxi ka.”
^ mba, “uluwala.”
^ Kilombolola “kastiku kabhana kwa Uzá.”
