Dya Dyanga Dya Malunda 15:1-29
15 Davidi wasuluka mu kutunga jinzo phala mwene mu Mbanza ya Davidi. Wayudika we kididi phala o Álaka ya Nzambi yakidi, yu watungu-bhu balaka phala o Álaka.
2 Davidi wambe: “Kibhukale muthu wambata o Álaka ya Nzambi yakidi, kikale ngo o Jilevita, mukonda Jihova wa asolo phala kwambata o Álaka ya Jihova ni ku musidivila jinga.”
3 Mukusuluka, Davidi wongeka o Izalayele yoso mu Jeluzaleme phala kubheka o Álaka ya Jihova bhu kididi kya yudikile.
4 Mwene wongeka o an’a Alá ni Jilevita.
5 O ku akwa Kohate, Udiyele mwéne wexile o mutwameni, mwene wexile kumoxi ni hama ni makwinyi ayadi a jiphange jê.
6 Ku akwa Meladi, Azayiya mwéne wexile o mutwameni, mwene wexile kumoxi ni hama jiyadi ni makwinyi ayadi a jiphange jê.
7 O ku akwa Ngelexone, Jowele mwéne wexile o mutwameni, mwene wexile kumoxi ni hama ni makwinyi atatu a jiphange jê.
8 O ku mbutu ya Elizafane, Semaya mwéne wexile o mutwameni, mwene wexile kumoxi ni hama jiyadi a jiphange jê.
9 O ku mbutu ya Hebolone, Ediyele mwéne wexile o mutwameni, mwene wexile kumoxi ni makwinyi anake a jiphange jê.
10 O ku mbutu ya Uziyele, Aminadabe mwéne wexile o mutwameni, mwene wexile kumoxi ni hama ni dikwinyi ni kiyadi a jiphange jê.
11 Kyenyiki, Davidi wexana o akunji Zadoke ni Abiyatale. O ku Jilevita wexana Udiyele, Azayiya, Jowele, Semaya, Ediyele ni Aminadabe,
12 yu wa ambela, wixi: “Enu mu atwameni a jinzo ja jitata jenu ku Jilevita. Dizelesenu, zelesenu we o jiphange jenu, he mubheke o Álaka ya Jihova o Nzambi ya Izalayele, bhu kididi ki ngayudika.
13 Kuma muveji ya dyanga kimwambata o Álaka, Jihova Nzambi yetu watukwatela njinda, mukonda kitwasoto kwijiya se kyebhi ki twatokalele kwambata o Álaka.”
14 Kyenyiki, o akunji ni Jilevita adizelesa phala kubheka o Álaka ya Jihova, o Nzambi ya Izalayele.
15 O Jilevita ambata o Álaka ya Nzambi yakidi ku mikambu bhu isuxi, kala kyatendelesele Jihova bhukaxi ka Mozé.
16 Davidi wambela o atwameni a Jilevita phala kutumina o jiphange jâ, o jingimbidi n’embi ni kusanguluka kwoso ni kuxika iselekete ya kwimba, kala: Tungoji, tumbánza ni misaxi.
17 Kyenyiki, O Jilevita asolo Hemane, mon’a Jowele. O ku jiphange jê, asolo Azafe mon’a Belekiya. O ku jiphange jâ, ku akwa Meladi, asolo-ku Etane mon’a Kuzaya.
18 Kumoxi ni ene kwexile o jiphange jâ jatokalele ku kibuka kya kayadi: Zakadiya, Bene, Jaziyele, Semilamote, Jiyele, Uni, Eliyaba, Benaya, Mahaseya, Matitiya, Elifelewu, Mikineya ni alangidi a mabhitu, Obede-Edomo ni Jehiyele.
19 O jingimbidi Hemane, Azafe ni Etane ejixika o misaxi ya ngondo.
20 Zakadiya, Aziyele, Semilamote, Jiyele, Uni, Eliyaba, Mahaseya ni Benaya exile muxika o tungoji mu ukexilu wa alamote.*
21 Matitiya, Elifelewu, Mikineya, Obede-Edomo, Jehiyele ni Azaziya exile muxika o tumbánza mu ukexilu wa seminite,* éne exile mukwendesa o jingimbidi.
22 Kenaniya o mutwameni wa Jilevita, mwéne wexile ku pholo dya yó exile mu kwambata o Álaka, mukonda mwene wexile ni uhete wa kubhanga kiki.
23 Belekiya ni Elikana ene exile mulangidila o Álaka.
24 O akunji Sebaniya, Jozafate, Netanayele, Amazayi, Zakadiya, Benaya ni Eliyezele, exile muxika o jikoloneta ni kuswina kwoso bhu pholo ya Álaka ya Nzambi yakidi. O alangidi Obede-Edomo ni Jehiya exile we bhu mbandu ya Álaka.
25 Kyenyiki, Davidi ni adyakime a Izalayele ni atwameni a jimidi, ayi ni kusanguluka ku inzo ya Obede-Edomo, mutakana o Álaka ya Kikutu kya Jihova.
26 Kuma o Nzambi yakidi wexile mukwatekesa o Jilevita jexile mu kwambata o Álaka ya Kikutu kya Jihova, ene asatela sambwadi dya tungombe ni sambwadi dya tumbudi.
27 Davidi ni Jilevita joso jexile mu kwambata o Álaka azwatele divunga dya linyu. O jingimbidi ni mutwameni wâ Kenaniya, azwatele we divunga dya linyu. Davidi wazwatele we éfode ya linyu.
28 Mu kwambata o Álaka ya Kikutu kya Jihova, akwa Izalayele exile mudikola ni kisangusangu ni kuxika jibuzina, jikoloneta, misaxi ni iselekete yoso ya tungoji ni tumbánza.
29 Maji kyoso o Álaka ya Kikutu kya Jihova ki yabhixila mu Mbanza ya Davidi, Mikala mon’a Sawulu, watalela mu njanena yu wamono sobha Davidi kutuka-tuka ni kukina. Mikala wamateka ku musebhulula ku muxima wê.
