Dya Dyanga Dya Malunda 16:1-43
16 Kyenyiki, ambata o Álaka ya Nzambi yakidi mu balaka ya yudikile Davidi, ya a itula kwenyoko. Abhakula we jisata ja kwoha ni jisata ja paze bhu pholo ya Nzambi yakidi.
2 Kyoso Davidi kyazubha o kubhakula o jisata ja kwoha ni jisata ja paze, wa besowala o mundu mu dijina dya Jihova.
3 Mwene we wabhana ku akwa Izalayele, mbolo yobhange mu ukexilu wa nela ni jibolo jobhange ni jitamala ni jibolo jobhange ni jiuva jakukuta, kikale ku mayala, kikale ku ahatu.
4 Mukusuluka, wasolo Jilevita phala kusidivila bhu pholo ya Álaka ya Jihova, kujingisa,* kusakidila ni kuximana Jihova o Nzambi ya Izalayele.
5 Azafe mwene wexile o mutwameni wa dyanga, Zakadiya mwene wexile wa kayadi, Jehiyele, Semilamote, Jiyele, Matitiya, Eliyaba, Benaya, Obede-Edomo ni Jehiyele exile muxika o tungoji ni tumbánza, Azafe mwene wexile muxika o misaxi.
6 O akunji Benaya ni Jahasiyele, exile muxika o jikoloneta bhu pholo ya Álaka ya Kikutu kya Nzambi yakidi.
7 Mu kizuwa kyenyokyo, kyene Davidi kyembi muveji ya dyanga o mwimbu wa kusakidila Jihova bhukaxi ka Azafe ni jiphange jê. O mwimbu wenyú:
8 “Sakidilenu Jihova, kolenu o dijina dyê,Ijidisenu o ibhangelu yê mwaxaxi ka mundu!
9 Mwimbilenu, muximanenu ni mwimbu,Xinganekenu* mu ima yoso ya madiwanu yabhange mwene.
10 Dinanzyenu mu kutumbula o dijina dyê dikôla.
Woso usota Jihova, muxima wê usanguluke.
11 Sotenu Jihova, mubhingyenu nguzu.
Sotenu jinga o kikwatekesu kyê.
12 Lembalalenu o ima yoso ya madiwanu yabhange mwene,O madiwanu mê, ni ukexilu wê wa kufundisa.
13 Enu mu mbutu ya Izalayele, selevende ya Nzambi,Enu mu an’a Jakobo a misolo.
14 Jihova mwéne o Nzambi yetu.
Mwene ufundisa o athu oso mu ngongo.
15 Lembalalenu jinga o kikutu kyê,Ni kikanenu kyê kyabhange* phala o midi ya miji,
16 O kikutu kyate ni Mbalahamu,Ni kikanenu kyabhange kwa Izake.
17 O kikanenu kiki mwene wakibhange kala kitumu phala Jakobo,Wakibhange we kikutu ki nangenena phala Izalayele.
18 Mu kwamba: ‘Nganda mibhana o ixi ya Kanana,kala undundu wenu.’
19 Kiki kyabhiti kyoso ki mwatolele hanji,Kyene, mwatolele, enu mwatungile mu ixi yenyoyo kala mu asonyi.
20 Mwexile mutunda ixi anga muya ixi yengi,Utuminu ni utuminu.
21 Mwene kehela muthu ku akwatesa wôma,Maji mukonda dya ene, ni jisobha wa jibazela,
22 mu kwamba: ‘Kanenu kukwata o athu ami u ngasolo,O jipolofeta jami, ki mu abhange kyayibha.’
23 Imbilenu Jihova mu ixi yoso!
Kizuwa ni kizuwa tangelenu akwenu kyebhi mwene kyabhulula o athu!
24 Kolenu o fuma yê mu ifuxi,Mwaxaxi ka mundu woso, kolenu o ima yê ya madiwanu.
25 Kuma Jihova muthu wonene, wafwama ku muximana kyavulu.
Mwene atokala ku mukwatela dingi wôma, o jinzambi joso jamukwa ndenge.
26 O jinzambi joso mu ixi, jinzambi jakambe valolo,Maji Jihova mwene wabhange o dyulu.
27 Bhu pholo yê kwala kutena ni kubhenya,Bhu kididi bhu watungu bhwala nguzu ni kusanguluka.
28 Enu mu miji mu ngongo, bhanenu kwa Jihova yoso ya mutokala,Bhanenu kwa Jihova yoso ya mutokala mukonda dya fuma yê ni nguzu yê.
29 Bhanenu kwa Jihova o fuma ni kijingu kyatokala ku dijina dyê.Bhekenu maujitu he mubhixile bhu pholo yê.
Fukamenu bhu pholo ya* Jihova ni izwatu ikôla.*
30 Enu mwatungu mu ngongo, teketenu bhu pholo yê,
Kuma mwene wafikidila o ixi* phala yene ki itekete.
31 O dyulu disanguluke, o ixi isanguluke,Kolenu mwaxaxi ka ifuxi kwila ‘Jihova wakituka Sobha!’
32 O kalunga ni ima yoso yala-mu idikole,O mikáwu ni yoso yala-mu isanguluke.
33 O mixi ya mixitu idikole ni kisangu-sangu bhu pholo ya Jihova,Kuma mwene yu wiza* phala kufundisa o ixi.
34 Sakidilenu Jihova kuma mwene muthu wambote,O henda yê, inangenena kate ku hádya ni hádya.
35 Phala ni mwambe: ‘Tubhulule eye o Nzambi ya kubhuluka kwetu,Tubhongolole ni utubhulule ku ifuxi,Phala tujingise o dijina dyé dikôla,Ni tusanguluke mu ku kuximana.
36 Jihova o Nzambi ya Izalayele a muximane kate ku hádya ni hádya.’”
O mundu woso watambwijila, exi: “Kyene!” Anga aximana Jihova.
37 Mukusuluka, Davidi waxisa Azafe ni jiphange jê bhu pholo ya Álaka ya Kikutu kya Jihova phala asidivile jinga bhu pholo ya Álaka, kala kyatokala kubhanga kizuwa ni kizuwa.
38 Obede-Edomo ni jiphange jê atenesene makwinyi asamanu ni dinake, ku kwadite dingi Obede-Edomo mon’a Jedutune ni Hoza, o alangidi.
39 O mukunji Zadoke ni yó exile mukalakala-nê kumoxi kala akunji, exile bhu pholo ya balaka ya Jihova mu kididi kya kubhezela kyexile ku Ngibiyone.
40 Phala abhakule jisata jakwoha kwa Jihova, ku kalatódyu ka jisata ja kwoha mukamene ni mu usuku, ni kubhanga yoso yosoneke mu kitumu kya Jihova kya tendelesele ku akwa Izalayele.
41 Kwexile we Hemane ni Jedutune ni mayala amukwa a asolele phala kusakidila Jihova mukonda “o henda yê inangenena kate ku hádya ni hádya.”
42 Hemane ni Jedutune exile kumoxi ni ene phala kuxika o jikoloneta ni misaxi ni iselekete yamukwa ya kuximana-nayu o Nzambi yakidi. O an’a Jedutune ene exile ku pholo ya alangidi a mabhitu.
43 Kyabhiti o ima yiyi, o mundu woso wa mwangana kala muthu wayi mu inzo yê. Davidi anga uya mubesowala akwa dibhata dyê.
Footnotes
^ Mu Heba.: “phala kulembalala.”
^ Mba nange, “zwelenu yalungu ni.”
^ Mu Heba.: “o izwelu yatange.”
^ Mba, “bhezenu.”
^ Mba nange “mukonda mwene ukôla.”
^ Mba, “o mavu.”
^ Mba, “mwene wabhixila.”
