Dya Dyanga Dya Malunda 18:1-17
18 Mukubhita thembu, Davidi wabhânge ni akwa Fidíxa yu wa atolola, anga utambula bhu maku a akwa Fidíxa o mbanza ya Ngate ni jisanzala jazukamene.*
2 Mukusuluka, mwene watolola akwa Mowabe. Akwa Mowabe anga akala mubhikila Davidi, ni ku mufuta lubhaku.
3 Davidi watolola Hadadezele sobha ya Zoba, bhwa zukama ni Hamati, kyoso Hadadezele kyakexile dingi ni ungana wa kutumina o athu atungile mu mbambe ya ngiji ya Ewufalate.
4 Davidi watambula midi a makalu a ita a Hadadezele, yu wakwata we sambwadi dya midi a mayala endela ku jikabalu, ni makwinyi ayadi a midi a masoladi endela bhoxi. Kyenyiki, Davidi wabatula o mixibha ya jikabalu jisunga o makalu a ita, hé uxisa-ku ngo hama ya jikabalu.
5 Kyoso akwa Sídya atokala ku Damasku kyeza mukwatekesa Hadadezele, sobha ya Zoba, Davidi wajibha-ku makwinyi ayadi ni kiyadi kya midi a masoladi akwa Sídya.
6 Kyenyiki, Davidi wate masoladi ku Sídya ya Damasku, o akwa Sídya akituka jiselevende ja Davidi anga aya ni ku mufuta malubhaku. Jihova wexile mubhulula Davidi kabasa kididi kyakexile muditela.
7 Davidi wakwata we o jingubu ja ulu jatokalele ku jiselevende ja Hadadezele, yu weza na-ju mu Jeluzaleme.
8 Ku Tebate ni ku Kune, o jimbanza ja Hadadezele, Davidi watambula-ku we nzungule ya ngondo. Solomá wakwata o ngondo yiyi, yu wabhange-nayu o mbasiya yadikota ya ngondo a ixana Musanza, jiphiladi ni ima yamukwa ya ngondo.
9 Kyoso Tohu, sobha ya Mahamati, kyevu kwila Davidi watolola o kifuxi kyoso kya masoladi kya Hadadezele sobha ya Zoba,
10 watumikisa mon’ê Hadolamu kwa sobha Davidi phala ku mu menekena ni ku mutanesa mu kutolola Hadadezele, mukonda Hadadezele wakexile mulwa ita ni Tohu ithangana yoso. Hadolamu wabheka ima ya phalata, ya ulu ni ya ngondo kwa Davidi.
11 O ima yoso yiyi, sobha Davidi wa isatela kwa Jihova kumoxi ni phalata ni ulu yakatwile ku ifuxi yiyi: Ya akwa Idomo, ya akwa Mowabe, ya akwa Amone, ya akwa Fidíxa ni ya akwa Amaleke.
12 Abizayi mon’a Zeluya, wajibha dikwinyi ni dinake dya midi a masoladi akwa Idomo mu honga ya Môngwa.
13 Davidi wate masoladi ku Idomo yoso. O akwa Idomo akituka jiselevende ja Davidi. Jihova wexile mubhulula Davidi kabasa kididi kyakexile muditela.
14 Davidi wexile mutumina mu Izalayele yoso. Mwene wexile mutumina ni kuyuka phala o mbote ya mundu wê woso.
15 Jowabe mon’a Zeluya mwéne wexile o mutwameni wa kifuxi kya masoladi. Jozafate mon’a Ahilude mwéne wexile o musoneki wa sobha.
16 Zadoko mon’a Ahitube ni Ahimeleke mon’a Abiyatale éne exile o akunji, Sahuza wexile musoneki.
17 Benaya mon’a Jehoyada mwéne wexile mutumina akwa Makeleti ni akwa Mapelete. O an’â Davidi éne exile o ilamba ya sobha.
Footnotes
^ Mba, “akondolokele.”
