Dya Dyanga Dya Malunda 19:1-19
19 Mukubhita thembu, Nahaji sobha ya akwa Amone wafu, mon’ê Hanune mwene wakituka sobha bhu kididi kyê.
2 Kyenyiki, Davidi wambe: “Nganda bhanga mbote* kwa Hanune mon’a Nahaji, mukonda tat’ê wa ngibhange we mbote.” Kyenyiki, Davidi watumikisa o akunji phala kumukonda o malamba mukonda dya kufunda tat’ê. Maji-phe kyoso o akunji a Davidi kyabhixila mu ixi ya akwa Amone phala kukonda o malamba a Hanune,
3 o ilamba ya akwa Amone ambela Hanune, exi: “Eye wa mufika kwila Davidi watumikisa o mayala yá phala kujingisa tat’é ni ku kukonda o malamba? Ene eza phala kulonda o mbanza ni ku ijiya kyambote phala ku ibwika.”
4 Bhenyobho, Hanune wakwata o akunji atumikisa Davidi wa abhutu o myezu, wabatula o izwatu yâ kate mu mbunda, yu wa akaye.
5 Kyoso Davidi kya mutangela yoso yabhitile ni mayala mê, mwene ni lusolo lwoso watumikisa mayala amukwa phala kuya mudisanga-nawu mukonda a akwatesa jisonyi javulu. O sobha wa ambela: “Kalenu hanji ku Jedikó kate o myezu yenu ki yanda kula.”
6 Mukubhita thembu, akwa Amone amono kwila ene akwatesa njinda kwa Davidi. Kyenyiki, Hanune ni akwa Amone atumikisa midi ya jitalendu* ja phalata phala kufuta o makalu a ita ni mayala endela ku jikabalu akwa Mezopotâmya* ni akwa Alá-Mahaka ni akwa Zoba.
7 Kyenyiki, ene afutu makwinyi atatu ni kiyadi kya midi a makalu a ita, afutu we o sobha ya Mahaka ni kifuxi kyê kya masoladi.* Mukusuluka, ene eza ya akexile ku Mendeba. O akwa Amone atundu mu jimbanza jâ, ya adibhongolola phala kulwa o ita.
8 Kyoso Davidi kyevu o maka yá, mwene watumikisa Jowabe ni kifuxi kyoso kya masoladi, kate mwene ni mazonda a ita.
9 O akwa Amone atundu ya emana bhu mwelu wa mbanza, maji o jisobha jakexile mu kwiza, emana ku mbandu yengi, ku mukáwu.
10 Kyoso Jowabe kyamono kwila o jinguma jexile mu kwiza ku pholo ni mu jimbandu phala kubhânga-nawu, mwene wasolo o masoladi a Izalayele exile dingi ni uhete yu wa asokejeka phala kubhânga ni akwa Sídya.
11 O masoladi amukwa mwene wa axisa ni phang’yê Abizayi, phala kwasokejeka n’a bhânge ni akwa Amone.
12 Kyenyiki, Jowabe wambe: “Se akwa Sídya a ngitunda mu nguzu, eye wiza mu ngikwatekesa, maji se akwa Amone akutunda mu nguzu, eme nganda kukwatekesa.
13 Twatokala kukolokota ni kubhânga ni kuswina, mukonda dya mundu wetu ni jimbanza ja tubhana Nzambi yetu. Jihova wanda bhanga o kima kya mu wabhela.”
14 Kyenyiki, Jowabe ni mayala mê ayi mubhânga ni akwa Sídya, o akwa Sídya anga alenga.
15 Kyoso akwa Amone kyamono kwila akwa Sídya alenge, ene alenge we Abizayi phange ya Jowabe, ya avutuka mu mbanza. Kyoso kyabhiti o ima yiyi, Jowabe wavutuka mu Jeluzaleme.
16 Akwa Sídya kyamono kwila a atolola ku akwa Izalayele, ene atumikisa akunji phala kwixana akwa Sídya akexile mu mbambe ya ngiji ya Ewufalate,* exile mu a endesa kwala Sobaki o mutwameni wa kifuxi kya masoladi kya Hadadezele.
17 Kyoso Davidi kyevu o maka ya, wabhongolola Izalayele yoso, wazawuka o ngiji ya Njolodá, wayi muzwela-nawu ya adisokejeka phala o ita. Davidi wadisokejeka phala kulwa ita ni akwa Sídya, ya abhânge ni ene.
18 Kyenyiki, akwa Sídya alenge akwa Izalayele. Davidi wajibha-ku sambwadi dya midi a mayala akwa Sídya endela mu makalu a ita, ni makwinyi awana a midi a masoladi endela bhoxi. Wajibha we Sobaki o mutwameni wa masoladi.
19 Kyoso o jiselevende ja Hadadezele kyamono kwila a atolola ku akwa Izalayele, ene abhange paze ni Davidi ya exile mu mubhikila. Akwa Sídya anga akala ni wôma wa kukwatekesa dingi akwa Amone.
Footnotes
^ O kizwelu kiki mu dimi dya Hebalayiku kilombolola mbote ni henda ya kalelaku. Tala o Dilombolwelu.
^ Talendu imoxi yasokele ni 34.2 a jikilu. Tala o Kiba. B14.
^ Mu Heba.: “ku Alamena-halayimi.”
^ Mba, “mundu.”
^ Mu Heba.: “ku Ngiji.”
