Dya Dyanga Dya Malunda 20:1-8
20 Ku dimatekenu dya muvu, o kithangana kyoso o jisobha kyakexile mutunda phala kulwa o ita, Jowabe wendesa kifuxi kya masoladi kate mu ixi ya akwa Amone, ya abwika akwa Amone. Mwene wayi, wakondoloka o mbanza ya Laba, maji-phe, Davidi waxala mu Jeluzaleme. Jowabe walwu ita ni akwa Laba, yu wa atolola.
2 Kyenyiki, Davidi wakatula o kitundu ku mútwe wa Malakane,* yu wamono kwila kyene kyexile munema talendu* imoxi ya ulu, ni kwila kyexile ni matadi afwama. Bhenyobho o kitundu akitula mu mútwe wa Davidi. Mwene wambata we nzungule ya imbamba yakatula mu mbanza.
3 Wambata o athu exile mu mbanza, wa ate mu kikalakalu kyakubatula matadi ni kukalakala ni jifalamenda ja felu jatu ni makuwa. Kiki kyene kyabhange Davidi ni jimbanza joso ja akwa Amone. Mukusuka-ku, Davidi ni masoladi mê, avutuka mu Jeluzaleme.
4 Mukusuluka, alwu dingi ita ni akwa Fidíxa, ku Ngezele. Mu ita yiyi, Sibekayi mukwa Huzata wajibha Sipayi watokala ku mwiji wa akwa Lafayime, o akwa Fidíxa anga a atolola.
5 Alwu dingi ita ni akwa Fidíxa, Ele-Hanane mon’a Jayile, wajibha Lami phange ya Ngoliya mukwa Ngate, wexile ni sosa yadikota.
6 Kwexile dingi ita, muveji yiyi ku Ngate. Kwenyoko kwexile kidiyala kyadikota, o lukwaku lwê lumoxi, lwexile ni milembu isamanu, o lwamukwa we milembu isamanu, mu inama kyene we kimoxi, kifwa, wexile ni makwinyi ayadi ni kiwana kya milembu. Mwene watokalele we ku mwiji wa akwa Lafayime.
7 Mwene wexile muxongwena akwa Izalayele, mukonda dya kiki, Jonatá mon’a Ximeya, phang’yâ Davidi wa mujibha.
8 O kiwana kiki, atokalele ku mwiji wa Lafayime atungile ku Ngate. Davidi ni mayala mê ene a ajibha.
Footnotes
^ Nange, “kiteka kya nzambi kya akwa Amone; a kixana we Moloke mba Milikome.
^ Talendu imoxi yasokele ni 34.2 ya jikilu. Tala o Kiba. B14.
