Dya Dyanga Dya Malunda 22:1-19
22 Mukiki, Davidi wambe: “Bhabha bhwene bhwanda kala o inzo ya Jihova, o Nzambi yakidi, bhwene we bhwanda kala o kalatódyu ka jisata ja kwoha ja Izalayele.”
2 Mukusuluka, Davidi watumu kwongeka o athu akwa jixi jengi atungile mu ixi ya akwa Izalayele, yu wa abhana o kikalakalu kya kubatula o matadi ni kwasokejeka, phala kutunga o inzo ya Nzambi yakidi.
3 Davidi wabhana we nzungule ya jifelu phala kubhanga jipheleku phala o mabhitu ni jibalasadela ni ngondo yavulu katenene ku ikwata konda.
4 Wabhana we mabaya avulu a mixi a misédulu, mukonda akwa Sidónya ni akwa Tilu, abhekele mabaya avulu kwa Davidi.
5 Davidi wambe: “Mon’ami Solomá munzangala hanji, kala ni uhete. O inzo yanda tunga phala Jihova yatokala ifwama mwene kyavulu, phala o fuma ya inzo ni kuwabha kwê a kwijiye mu jixi joso. Kyenyiki, nganda sokejeka o ima yoso phala mwene.” Ande-phe dya Davidi kufwa, mwene wasokejeka nzungule ya ima phala kutunga-nayu o inzo.
6 Mukusuluka, wexana mon’ê Solomá yu wa mutumina kutunga inzo phala Jihova, o Nzambi ya Izalayele.
7 Davidi wambela mon’ê Solomá, wixi: “Eme ngamesenene kyavulu kutunga inzo phala o dijina dya Jihova, Nzambi yami.
8 Maji Jihova wa ngambela, wixi: ‘Eye wabhubhisa manyinga avulu, walwu ita yavulu. Kyenyiki, k’eye wanda ngitungila inzo phala o dijina dyami, mukonda wabhubhisa manyinga avulu bhu pholo yami.
9 Eye wanda vwala mona, mwene wanda kala diyala dya tululuka,* nganda mubhana dinyohenu ku jinguma jê joso ja mukondoloka. Mwene anda mwixana Solomá,* o mu izuwa yê, nganda bhana kutululuka ni kukondama mu Izalayele.
10 Mwéne wanda tunga o inzo phala o dijina dyami. Mwene wanda kala mon’ami, eme nganda kala ngi tat’ê. Nganda bhangesa kwila o utuminu wê unangenene kate ku hádya ni hádya.’
11 “Mon’ami, Jihova akale n’eye, uzediwe mu yoso i ubhanga, he utunge o inzo ya Jihova Nzambi yé.
12 Kyoso Jihova kyanda kubhana o ungana wa kutumina Izalayele, akubhane we o unjimu ni kutongoloka, phala utumake o ijila ya Jihova Nzambi yé.
13 Kyenyiki, se ubelesela o itendelesu ni jingonge jabhana Jihova kwa Mozé phala kujitangela akwa Izalayele, wanda zediwa ku mwenyu. Swina, kolokota. Kana kuthandanganya, kana kukala ni wôma.
14 Ngabhange nguzu yavulu mu kusokejeka o ima phala o inzo ya Jihova. Ngasokejeka hama ya midi ya jitalendu* ja ulu ni kazunda kamoxi ka jitalendu ja phalata ni ngondo ni felu, séku muthu utena ku ipezala. Ngasokejeka we mabaya ni matadi, maji eye wanda bandekesa-ku dingi.
15 Wala ni akalakadi avulu: Akwa kubatula o matadi, akwa kutunga o jinzo ni asongi a mabaya ni akalakadi a maufunu oso.
16 O ulu ni phalata ni ngondo ni felu, ya nzungule. Mukyenyiki, mateka kutunga o inzo, Jihova wanda kala n’eye.”
17 Mukusuluka, Davidi watumina o ilamba yoso ya Izalayele kukwatekesa mon’ê Solomá. Mwene wambe:
18 “Jihova Nzambi yenu kala n’enu? Mwene kaminyohesa ku jinguma jenu joso ja mikondoloka? Mwene wabhakula o athu a ixi yiyi bhu mak’wami. O ixi yenyiyi a itolola kwa Jihova ni ku mundu wê.
19 Dibhakulenu-phe kindala, ni muxima wenu woso ni mwenyu wenu woso mu kusota Jihova Nzambi yenu, he mutunge o kididi kikôla kya Jihova, o Nzambi yakidi, phala kwambata o Álaka ya Kikutu kya Jihova ni itutu ikôla ya Nzambi yakidi mu inzo yanda tunga phala o dijina dya Jihova.”
Footnotes
^ Mu Heba.: “dinyohenu.”
^ Mu Heba.: “dyokatule mu kizwelu kya Hebalayiku kilombolola kutululuka.”
^ Talendu imoxi yasokele ni 34,2 ya jikilu. Tala o Kiba. B14.
