Dya Dyanga Dya Malunda 26:1-32
26 Yiyi yene yexile o ibuka ya alangidi. Ku mwiji wa Kolá kwakexile Mezelamiya mon’a Kole, watokala ku an’a Azafe.
2 O an’a Mezelamiya, enya: Zakadiya mwéne wexile o mon’a wa dyanga, o wa kayadi Jediyale, o wa katatu Zebadiya, o wa kawana Jatiniyele,
3 o wa katanu Elame, o wa kasamanu Jowanane, o wa kasambwadi Elyehonayi.
4 O an’a Obede-Edomo, enya: Semaya mwéne wexile o mon’a wa dyanga, o wa kayadi Jehozabade, o wa katatu Jowa, o wa kawana Sakala, o wa katanu Netanayele,
5 o wa kasamanu Amiyele, wa kasambwadi Isakale, o wa kanake Pewuletayi, mukonda Nzambi wa mubesowala.
6 O mon’ê Semaya wakexile ni twana akexile we atwameni a miji yâ, mukonda ene exile mayala a nguzu, aswinine kyavulu.
7 O an’a Semaya enya: Otini, Lafayele, Obede ni Elizabade. O jiphange jê, Elihu ni Semakiya exile we mayala aswina.
8 Enyoso yá, exile an’a Obede-Edomo. Ene ni twana twâ ni jiphange jâ exile mayala aswina, akexile ni uhete wa kubhanga o ikalakalu. Kwa Obede-Edomo kwakexile makwinyi asamanu ni kiyadi kya mayala.
9 Kwa Mezelamiya, kwexile o twana ni jiphange jê, enyoso atenesa dikwinyi ni dinake dya mayala aswina.
10 O an’a Hoza, ku an’a Meladi, enya: Nzidi, o mutwameni, (sumbala mwene kexile o mon’a wa dyanga, maji tat’ê wamusolo kala mutwameni.)
11 O mon’a wa kayadi Hilikiya, o wa katatu Tebadiya, o wa kawana Zakadiya. O an’a Hoza ni jiphange jê atenesene dikwinyi ni kitatu.
12 Kala kyexile mubhanga o jiphange jâ, o atwameni a ibuka yiyi ya alangidi a mabhitu, exile ni ikalakalu mu inzo ya Jihova.
13 Kyenyiki, miji yoso kikale yamakota, kikale yofele, ate jisólote phala kwijiya se kala mwiji weji langidila dibhitu dyebhi.
14 O sólote yalungu ni mbandu kutundila o dikumbi, yabwila kwa Selemiya, mukusuluka ate jisólote phala mon’ê Zakadiya, diyala wexile njimu, mukwa kubhana jindunge jambote. Mwene watambula o mbandu ya thunda.
15 Obede-Edomo waxala ni mbandu ya lwiji, o an’ê a asolo phala kulangidila o kididi kya kubhakela o ima.
16 Sufami ni Hoza akexile ku mbandu kufwila o dikumbi, bhwa zukama ni dibhitu dya Salekete, yazukama we ni njila ibanda ku mulundu. Kibuka kimoxi kya alangidi kyazukamene ni kibuka kyamukwa kya alangidi.
17 Ku mbandu kutundila o dikumbi kwexile Jilevita jisamanu. Izuwa yoso, ku mbandu ya thunda kwexile Jilevita jiwana, o ku mbandu ya lwiji kwexile we jiwana. Mu ididi ya kubhakela o ima kwexile alangidi ayadi exile bhwa zukama o alangidi ayadi amukwa.
18 Ku mbalanda yexile ku mbandu kufwila o dikumbi, kwakexile kiwana kya Jilevita bhwa zukama ni kikoka. O Jilevita jiyadi jamukwa jexile bhwa zukama o mbalanda.
19 Yiyi yene yexile o ibuka ya alangidi ku mwiji wa Kolá ni wa Meladi.
20 Ku Jilevita, Ahiya mwéne wexile ku pholo mu kulanga o ima yavalolo mu inzo ya Nzambi yakidi ni ima yokitule ima ikôla.*
21 Ku an’a Ladane, kifwa o mbutu ya Ngelexone, kwexile Jeyeli wexile o mutwameni watokala ku mwiji wa Ladane.
22 Ku an’a Jeyeli, Zetame ni phang’yê Jowele, ene exile ku pholo mu kulanga o ima yavalolo mu inzo ya Jihova.
23 Mwaxaxi ka akwa Halane ni akwa Izahale ni akwa Hebolone ni mwiji wa Uziyele,
24 Sebuwele mon’a Ngelexone mon’a Mozé mwéne wexile ku pholo mu kulangidila o kididi kya kulanga o ima.
25 O jiphange jê atokalele ku mwiji wa Eliyezele, enya: Lahabiya, Jesaya, Jolamu, mona Zikidi ni Selomote.
26 Selomote ni jiphange jê, ene exile ku pholo mu kulanga o ima yoso yavalolo yokitule ima ikôla kwa sobha Davidi, o atwameni a jinzo ja jitata, o atwameni a midi, o atwameni a jihama ni atwameni a kifuxi kya masoladi.
27 Sayi ima a itambula mu ita, a ikitula ima ikôla phala kuyudika-nayu o inzo ya Jihova.
28 Kwakexile we o ima yoso yokitule ikôla kwa Samuwele, o mukwa kumona o isumwa, kwa Sawulu mon’a Kiji, kwa Abinele mon’a Nele, ni kwa Jowabe mon’a Zeluya. Selomite ni jiphange jê ene exile mulanga o ima yoso yokitule ikôla.
29 Kwa Izahale, Kenaniya ni an’ê a asolo phala kubhanga ikalakalu yengi. Ene a asolo phala kukala atwameni ni afundixi a Izalayele.
30 Ku akwa Hebolone kwexile Hasabiya ni jiphange jê, kifwa midi ni hama asambwadi a mayala aswina. Ene exile mukalakala ku mbandu kufwila o dikumbi dya ixi ya Izalayele ku Njolodá, mu kubhanga o ikalakalu yoso ya Jihova ni ya sobha.
31 Ku akwa Hebolone, Jedija mwéne wexile o mutwameni, kala kyafwamene ku miji ya jitata jâ. Ku muvu wa makwinyi awana a utuminu wa sobha Davidi, atokwesa ya asange Jazele mwaxaxi ka mayala a nguzu exile ni uhete, mu ixi ya Ngiliyade.
32 O jiphange jê atenesene midi jiyadi ni makwinyi asambwadi a mayala aswina. Enyoso exile atwameni a miji a mabhata a jitata. Kyenyiki, o sobha Davidi wa abhana kutena kwa kutumina o akwa Lubene, akwa Ngade ni kaxaxi ka mwiji wa Manasa ni kubhanga o ikalakalu yoso ya Nzambi yakidi ni ikalakalu yoso ya sobha.
Footnotes
^ Mba, “ima yobhakule.”
