Dya Dyanga Dya Malunda 27:1-34
27 Yalungu ni atwameni a jinzo ja jitata ja akwa Izalayele, o atwameni a jimidi, atwameni a jihama ni jifixiyadi exile mubhanga o ikalakalu ya sobha, ni mu ibuka yoso exile mu isokejeka* mbeji joso, kifwa ku jimbeji joso ja muvu, kala kibuka kyexile ni makwinyi ayadi ni kiwana kya midi a mayala.
2 Jokebeyame mon’a Zabidiyele mwéne wexile o kabhitangu ka kibuka kya dyanga mu mbeji ya dyanga. Mu kibuka kyê mwexile makwinyi ayadi ni kiwana kya midi a mayala.
3 Ku an’a Peleji, Jokebeyame mwéne wexile o mutwameni wa jifixiyadi ja ibuka yoso a asolele phala kusidivila mu mbeji ya dyanga.
4 Dodo mukwa Ahohi, mwéne wexile ku pholo mu kibuka kya kayadi mu mbeji ya kayadi, Mikelote mwéne wexile o mutwameni. Mu kibuka kyê mwexile makwinyi ayadi ni kiwana kya midi a mayala.
5 Benaya mon’a mukunji wa dikota Joyada, mwéne wexile o kabhitangu ka katatu mu mbeji ya katatu. Mu kibuka kyê mwexile makwinyi ayadi ni kiwana kya midi a mayala.
6 O Benaya mwenyú wexile mwaxaxi ka makwinyi atatu a mazonda, mwéne wexile o mutwameni wa makwinyi atatu a mazonda. O mon’ê Amizabade mwéne wexile ku pholo mu kibuka kyê.
7 Azayele phange ya Jowabe mwéne wexile o kabhitangu ka kawana mu mbeji ya kawana, ku kwa mukayela mon’ê Zebadiya. Mu kibuka kyê mwexile makwinyi ayadi ni kiwana kya midi a mayala.
8 Samute mukwa Izalayiya mwéne wexile o kabhitangu ka katanu mu mbeji ya katanu. Mu kibuka kyê mwexile makwinyi ayadi ni kiwana kya midi a mayala.
9 Ila mon’a Ikexi mukwa Tekowa, mwéne wexile o kabhitangu ka kasamanu mu mbeji ya kasamanu. Mu kibuka kyê mwexile makwinyi ayadi ni kiwana kya midi a mayala.
10 Heleji mukwa Pelone ya Efalayíme, mwéne wexile o kabhitangu ka kasambwadi mu mbeji ya kasambwadi. Mu kibuka kyê mwexile makwinyi ayadi ni kiwana kya midi a mayala.
11 Sibekayi mukwa Huzata watokalele ku mwiji wa Nzelá, mwéne wexile o kabhitangu ka kanake mu mbeji ya kanake. Mu kibuka kyê mwexile makwinyi ayadi ni kiwana kya midi a mayala.
12 Abiyezele mukwa Anatote ya Bejamí, mwéne wexile o kabhitangu ka kavwa mu mbeji ya kavwa. Mu kibuka kyê mwexile makwinyi ayadi ni kiwana kya midi a mayala.
13 Mahalayi mukwa Notofa ku mwiji wa Nzelá, mwéne wexile o kabhitangu ka kakwinyi mu mbeji ya kakwinyi. Mu kibuka kyê mwexile makwinyi ayadi ni kiwana kya midi a mayala.
14 Benaya mukwa Pilatone ku twana twa Efalayíme, mwéne wexile o kabhitangu ka dikwinyi ni kamoxi mu mbeji ya dikwinyi ni kamoxi. Mu kibuka kyê mwexile makwinyi ayadi ni kiwana kya midi a mayala.
15 Heledayi mukwa Notofa watokalele ku mwiji wa Otiniyele, mwéne wexile o kabhitangu ka dikwinyi ni kayadi mu mbeji ya kakwinyi ni kiyadi. Mu kibuka kyê mwexile makwinyi ayadi ni kiwana kya midi a mayala.
16 Ya ene exile o atwameni a miji ya akwa Izalayele: Eliyezele mon’a Zikidi, mwéne wexile o mutwameni wa akwa Lubene. Sefatiya mon’a Mahaka, mwéne wexile o mutwameni wa mwiji wa Ximinyá.
17 Ku mwiji wa Levi, Hasabiya mon’a Kemwele, ku mwiji wa Alá, Zadoke.
18 Ku mwiji wa Judá, Elihu phange ya Davidi, ku mwiji wa Isakale Omidi mon’a Mingyedi.
19 Ku mwiji wa Nzebulone, Ijimayiya mon’a Obadiya, ku mwiji wa Nafitali Jedimote mon’a Azediyele.
20 Ku mwiji wa Efalayíme Ozeya mon’a Azaziya, ku kaxaxi ka mwiji wa Manasa, Jowele mon’a Pedaya.
21 Ku kaxaxi ka mwiji wa Manasa ku Ngiliyade, kwexile Idu mon’a Zakadiya, ku mwiji wa Bejamí, Jahaziyele mon’a Abinele;
22 Ku mwiji wa Dane, Azaliyele mon’a Jelohamu. Yá ene exile o ilamba ya mwiji wa akwa Izalayele.
23 O yó katenesene luwa makwinyi ayadi a mivu, Davidi ka akondala, mukonda Jihova wakanene kubhangesa akwa Izalayele kuvula kala o jithéthembwa ku dyulu.
24 Jowabe mon’a Zeluya, wamateka kusota kwijiya se kwexile athu akuxi, maji kazubha o kukibhanga. Mukonda dya kusota kwijiya se kwexile athu akuxi, Nzambi wakwatela njinda ya Izalayele. Kyenyiki, o dyalwilu dya athu kadisoneka mu musoso wa izuwa ya sobha Davidi.
25 Azemavete mon’a Adiyele, mwéne wexile ku pholo mu kulangidila o jimbote ja sobha. Jonatá mon’a Uziya, mwéne wexile ku pholo mu kulangidila o ididi yakubhakela o ima ku mabhya, mu jimbanza, mu jisanzala ni mu jisabhalalu.
26 Ezedi mon’a Kilube mwéne wexile ku pholo dya yó exile mukalakala ku mabhya.
27 Ximeyi mukwa Lamá mwéne wexile ku pholo mu kulangidila o dibhya dya mividi. Zabedi mukwa Sifimote, mwéne wexile ku pholo mu kulangidila o kididi bhwexile mubhakela o vinyu.
28 Bahale-Hanana mukwa Njedele, mwéne wexile ku pholo mu kulangidila o mixi ya midiva ni jifiku ku Sefelá. Jowaji mwéne wexile ku pholo mu kulangidila o kididi kya kubhakela o máji.
29 Sitalayi mukwa Salone, mwéne wexile ku pholo dya yó exile mu langidila o jimbudi ku Salone. Safate mon’a Adalayi, mwéne wexile ku pholo dya yó exile mulangidila o jingombe mu honga.
30 Obili mon’a Ijimayele, mwene wexile ku pholo mu kulangidila o jikamelu, Jehediya mukwa Melenote mwene wexile ku pholo mu kulangidila o jijumendu.
31 Jazize mukwa Hangate, mwéne wexile ku pholo mu kulangidila o jimbudi. Enyoso yá ene exile ku pholo mu kulangidila o jimbote ja sobha Davidi.
32 Jonatá mwebhu wa Davidi wexile diyala dya tetuluka, mukwa kubhana jindunge, wexile we musoneki. Jiyele mon’a Hakimone, mwéne wexile mulanga o an’a sobha.
33 Ahitofele mwéne wexile o mukwa kubhana o jindunge kwa sobha, Husayi mukwa Alaki wexile dikamba dya sobha.
34 Ahitofele a mubhingana kwa Joyada mon’a Benaya ni ku Abiyatale, Jowabe mwéne wexile o kabhitangu ka masoladi a sobha.
Footnotes
^ Mu Heba.: “exile mubokona ni kutunda.”
