Dya Dyanga Dya Malunda 28:1-21
28 Davidi wongeka o ilamba yoso ya Izalayele mu Jeluzaleme. Wongeka o ilamba yoso ya miji, o jikabhitangu ja ibuka, exile mubhanga o ikalakalu ya sobha, o atwameni a jimidi, o atwameni a jihama, yó exile ku pholo mu kulanga o jimbote ni ibhaku ya sobha ni an’a sobha, o jikabhitangu ja mbonge ya sobha ni mayala oso a nguzu aswinine.
2 Mukusuluka, sobha Davidi wemana, yu wambe:
“Ngivwidilyenu phange jami, mu mundu wami. Eme ngamesenene kyavulu kutunga inzo phala kutula-mu o Álaka ya Kikutu kya Jihova, phala kukala dixamenenu dya inama ya Nzambi yetu, eme ngasokejeka o ima phala ku itunga.
3 Maji o Nzambi yakidi wa ngambela, wixi: ‘Eye kiwanda tunga o inzo phala o dijina dyami, mukonda eye walwu ita, wajibha athu avulu.’
4 Maji Jihova o Nzambi ya Izalayele, wa ngisolo eme mu dibhata dya tat’etu phala ngikale ngi sobha ya Izalayele kate ku hádya ni hádya. Kuma mwene wasolo Judá phala kukala mutwameni, o ku dibhata dya Judá, wasolo o dibhata dya tat’etu, ku dibhata dya tat’etu wa ngisolo eme phala ngikale ngi sobha ya Izalayele.
5 Jihova wa ngibhana ana avulu. Ku an’ami, wasolo-bho mon’ami Solomá phala kuxikama ku kyandu kya ungana kya Jihova phala kutumina Izalayele.
6 “Mwene wa ngambela, wixi: ‘Mon’ê Solomá mwéne wanda tunga o inzo yami ni jimbalanda, mukonda nga musolo kala mon’ami, eme nganda kala ngi tat’ê.
7 Nganda bhangesa kwila o utuminu wê unangenena kate ku hádya ni hádya, se mwene ubelesela o itumu yami ni jingonge jami kala kya mubhanga kindala.’
8 Kyenyiki, nga mu mitangela ku pholo ya Izalayele yoso, o mundu wa Jihova ni bhu pholo ya Nzambi yetu. Sotenu kwijiya ni kubelesela o itumu yoso ya Jihova Nzambi yenu phala mu nangenene mu ixi yiyi yambote ni mu ibhane ku an’enu kala undundu.
9 “Eye mon’ami Solomá, sota kwijiya o Nzambi ya tat’é, mubheze ni muxima wé woso ni mwenyu wé woso, mukonda Jihova usolokota o mixima yoso, wejiya o ibanzelu yoso ya muthu. Se u musota wanda musanga, maji se u muxisa, mwene wanda kudituna kate ku hádya.
10 Ijiya kyambote kwila, Jihova wa kusolo phala u mutungile inzo kala kididi kikôla. Swina, mateka o kutunga.”
11 Kyenyiki, Davidi wabhana kwa mon’ê Solomá o mukanda mwexile o itendelesu yalungu ni kyebhi kyatokalele kutunga o mbalanda ni jinzo ni kididi kya kubhakela o ima ni maxilu a thunda ni kididi bhweji loloka Nzambi o ituxi.
12 Mwene wa mubhana o mukanda mwakexile o itendelesu ya mubhana bhukaxi ka nzumbi ikôla phala kutunga o kithádi kya inzo ya Jihova, o ididi yoso yakudila-mu yejikala mu jimbandu ni ima yoso yavalolo phala o inzo ya Nzambi yakidi ni ima yoso yavalolo yakitwile ima ikôla.*
13 Wa mubhana we o itendelesu ya ibuka ya akunji ni Jilevita, yalungu ni ikalakalu yeji bhanga mu inzo ya Jihova ni itutu yoso yeji kalakala-nayu mu inzo ya Jihova.
14 Mwene wazwela se o ulu yatokalele kunema kikuxi, (o ulu phala o itutu ya ikalakalu yoso,) wazwela we se itutu yoso ya phalata yeji kalakala-nayu yatokalele kunema kikuxi,
15 ni ditudilu dya tundeya twa ulu ni tundeya twê, kala ditudilu ni tundeya twê, ni ditudilu dya tundeya twa phalata, kala ditudilu ni tundeya twê.
16 O kunema kwa ulu phala o jimeza ja jimbolo jikôla, kifwa meza ni meza ni kunema kwa phalata phala o jimeza ja phalata.
17 O kunema kwa jingalufu, kwa matijela ni masanga a ulu ni kunema kwa matijela a ulu ni kunema kwa matijela a phalata.
18 Wabhana we o itendelesu yalungu ni kunema kwa ulu phala o kalatódyu ka wasu wa dizumba, o dikalu dya Nzambi, kifwa o jikelubini ja ulu jazale o mabhabha ku thandu a Álaka ya Kikutu kya Jihova.
19 Davidi wambe: “O lukwaku lwa Jihova lwexile ku thandu dyami, wa ngibhana o kutetuluka* phala kusoneka se kyebhi kyatokalele kutunga o inzo.”
20 Mukusuluka, Davidi wambela mon’ê Solomá, wixi: “Swina, kana kukala ni wôma, mateka o kutunga. Kana kukala ni hele, kana kubhuwama, mukonda Jihova Nzambi, o Nzambi yami wala n’eye. Mwene kanda kwehelela, kanda kuxisa, maji wanda kala n’eye kate ki uzubha o kikalakalu kyoso kya kutunga o inzo ya Jihova.
21 O akunji ni Jilevita, ya bhabha phala kubhanga o ikalakalu yoso ya inzo ya Nzambi yakidi. Kwala we o akalakadi ala jihete, ala polondo phala kubhanga o ikalakalu yoso, ku kwadite we o ilamba ni mundu woso. Ene anda kayela o itendelesu yoso i wanda ku abhana.”
