Dya Dyanga Dya Malunda 29:1-30
29 Sobha Davidi wambela o mundu woso wa Izalayele, wixi: “Nzambi wasolo mon’ami Solomá, maji mwene munzangala hanji, kale luwa ni unjimu wasoko. O kikalakalu kiki kyavulu, mukonda o tembulu ki phala muthu, maji phala Jihova Nzambi.
2 Eme-phe ni nguzu yami yoso, ngasokejeka kya, o ulu phala o ikalakalu ya ulu, phalata phala o ikalakalu ya phalata, ngondo phala o ikalakalu ya ngondo, felu phala o ikalakalu ya felu ni mabaya phala o ikalakalu ya mabaya, phala kutunga o inzo ya Nzambi yami. Ni matadi a onixi ni matadi osete kyambote, tumatadi phala kufwamesa ni matadi oso afwama ni nzungule a matadi a alabasa.
3 Kuma ngazolo o inzo ya Nzambi yami, ku ima yoso i ngasokejeka kya phala o inzo ikôla, ngibhana we o ulu yami yoso ni phalata, phala o inzo ya Nzambi yami,
4 ni midi jitatu ja jitalendu* ja ulu ya Ofile ni sambwadi dya midi ya jitalendu ya phalata phala kufwamesa o jipalelu ja maxilu,
5 phala o ikalakalu yoso ya ulu ni ikalakalu yoso ya phalata, ni ikalakalu yoso yene mubhanga o asongi a mabaya. Kyenyiki-phe, nanyi we mudyenu wamesena kubheka ujitu kwa Jihova lelu?”
6 Mukyenyiki, o atwameni a miji, ni ilamba ya Izalayele, ni atwameni a jimidi ni atwameni a jihama ni yó exile ku pholo mu kubhanga o ikalakalu ya sobha, adibhakula mu vondadi yâ.
7 Anga abhana midi jitanu ja jitalendu ja ulu, dikwinyi dya midi a mabele a daliku,* dikwinyi dya midi dya jitalendu ja phalata, kwinyi ni dinake dya midi dya jitalendu ja ngondo, ni hama a midi a jitalendu ja felu. Abhakula o ima yiyi phala kutunga o inzo ya Nzambi yakidi.
8 Woso wexile ni matadi afwama, wa abhana phala ku ata mu kididi mwexile mubhaka o ima yavalolo ya inzo ya Jihova, exile mu kilanga kwa Jiyele, o mukwa Ngelexone.
9 O mundu wasanguluka mu kubhakula jisata mu vondadi yâ, akexile mubhakula jisata kwa Jihova ni muxima woso. Sobha Davidi wasanguluka we kyavulu.
10 Mukusuluka, Davidi waximana Jihova, bhu pholo ya mundu woso. Mwene wambe: “Jihova o Nzambi ya Izalayele, tat’etu, akuximane kate ku hádya ni hádya.
11 O unene ni kutena ni fuma ni kijingu ni kubhenya ni ungana, wakutokala eye u Jihova, mukonda yoso yala ku dyulu ni mu ixi, yakutokala. O utuminu wakutokala eye u Jihova. Eye wala kuthandu dya ima yoso.
12 O umvwama woso ni fuma itunda kokwê. Eye wala ku thandu dya ima yoso, bhu maku mê bhwala o nguzu ni kutena. O bhu lukwaku lwê, bhwala kutena kwa kuzangeleka o muthu ni kwa kubhana nguzu ku athu oso.
13 Kyenyiki-phe, eye u Nzambi yetu, twa kusakidila, tuximana o dijina dyé dyafwama.
14 “Maji-phe, eme nanyi? O mundu wami we ananyi phala tukale ni ujitu yú wa ku kubhakwila o jisata jiji? Mukonda yoso itunda kokwê, etu twa kubhana ngo o ima yatundu kokwê.
15 Bhu pholo yé twedi kala tu jinzwangiza, tu asonyi kala kyexile o jitata jetu. Kuma o izuwa yetu mu ixi yadibhange kala kilembeketa, séku kidyelelu.
16 Jihova Nzambi yetu, o umvwama woso yú u twaphopheka phala kutunga inzo phala o dijina dyê dikôla, watundu kokwê, yoso yakutokala.
17 Ngejiya kyambote kwila, eye usolokota o muxima ni kwila, usanguluka ni muthu wala ni muxima wayuka. Ngabhakula o jisata joso jiji mu vondadi yami ni muxima wami woso, ngisanguluka mu kumona o mundu we bhabha kubhakula jisata mu vondadi yâ.
18 Jihova o Nzambi ya Mbalahamu, ya Izake ni ya kukwetu Izalayele , kwatekesa o mundu kusuluka mu kukala ni ukexilu yú ni ku kusidivila ni muxima woso.
19 Bhana muxima watenena kwa mon’ami Solomá, phala mwene abelesele o itumu yé, o jingonge jé ni ijila yé n’a bhange yoso ni kutunga o tembulu, mukonda ngasokejeka kya o ima yoso.”
20 Mukusuluka, Davidi wambela o mundu woso, wixi: “Kindala, ximanenu Jihova Nzambi yenu.” O mundu woso anga uximana Jihova, o Nzambi ya jikuku jâ, afukama bhu pholo ya Jihova ni ya sobha.
21 Mu kizuwa kyakayela, abhakula jisata kwa Jihova, oha we jisata phala Jihova. Ene abhakula midi ya tungombe, midi ya jimbudi ja ndumbe, midi ya tumbudi twa ndumbe ni jisata ja uholwa. Abhakula jisata javulu phala o Izalayele yoso.
22 Mu kizuwa kyenyokyo, ene adi, anu ni kusanguluka kwoso bhu pholo ya Jihova. Solomá mon’a Davidi anga a mujingisa kala sobha muveji ya kayadi, a mu undu bhu pholo ya Jihova kala mutwameni, a undu we Zadoke kala mukunji.
23 Solomá anga uxikama bhu kyandu kya Jihova mu kukala sobha mu kididi kya tat’ê Davidi, anga uzediwa. O Izalayele yoso a mu belesela.
24 Kikale o ilamba, o mazonda oso a ita, o an’a oso a sobha Davidi, exile mubelesela sobha Solomá.
25 Jihova anga u zangeleka Solomá mu ukexilu wakatunda bhu pholo ya Izalayele yoso, yu wa mubhana kijingu kyadikota kibhinga kwila séku sobha mu Izalayele wakexile-nakyu hanji.
26 Kyenyiki, Davidi mon’a Jesé watumina mu Izalayele yoso.
27 Mwene watumina mu Izalayele mu makwinyi awana a mivu. Ku Hebolone watumina mu sambwadi dya mivu, mu Jeluzaleme watumina mu makwinyi atatu ni kitatu kya mivu.
28 Davidi wasangulukile mukonda wakexile ku mwenyu mu mivu yavulu, wexile ni ndumba ya jimbote ni kijingu. Ku pholo dya kwenda, mwene wafu, mon’ê Solomá mwéne wa mubhingana ku usobha.
29 O musoso wa sobha Davidi tunde ku dimatekenu ndu ku disukilu, a usoneka kwa Samuwele, o mukwa kumona o isumwa,* kwa polofeta Natane ni kwa polofeta Ngade, o mukwa kumona o isumwa.*
30 O ima yosoneke, izwela yalungu ni utuminu wê, o kutena kwê ni ima ya mubhitile ni ima yabhiti ni Izalayele yoso ni ku mautuminu oso a mukondolokele.
Footnotes
^ Talendu imoxi yasokele ni 34.2 ya jikilu. Tala o Kiba. B14.
^ Daliku dyexile dibele dya ulu dya akwa Pélesa. Tala o Kiba. B14.
^ Tala o Dilombolwelu.
^ Tala o Dilombolwelu.
