Dya Dyanga Dya Malunda 4:1-43
4 O an’a Judá enya: Peleji, Hezelone, Kalumi, Hule ni Sobalo.
2 Lehaya mon’a Sobalo wexile tata ya Jahate, Jahate wexile tata ya Ahumayi ni ya Lahade. Yú wene o mwiji wa akwa Zola.
3 O ana a diyala wadyangele kutunga ku Etamu* enya: Jezelele, Ijima, Idiba, (o phang’yâ ya muhatu dijina dyê Hazeleleponi.)
4 Penuwele wexile tata ya Ngedole, Ezele wexile tata ya Huzata. Yá ene o an’a Hule o mona wa dyanga wa Efalata wexile we tata ya Beleme.
5 Asule tata ya Tekowa wexile ni ahatu ayadi. Umoxi dijina dyê Hela, o mukwa dijina dyê Nahalate.
6 Nahalate wavwala-nê o twana tutu: Awuzame, Hefele, Temeni ni Hasatadi. Yá ene o an’a Nahalate.
7 O an’a Hela enya: Zelete, Izahale ni Etane.
8 Koji wexile tata ya Anube ni Zobeba, ni ya mwiji wa akwa Ahalele mon’a Halume.
9 Jabezi exile mu mujingisa dingi o jiphange jê ndenge. O manyâ wa mubhana o dijina dya Jabezi* mu kwamba: “Mwene nga muvwala ni jindolo.”
10 Jabezi wadyondela kwa Nzambi ya Izalayele mu kwamba: “Ngibesowale, kudisa o mbambe ya ixi yami! O lukwaku lwê lukale n’eme, lu ngilange ku dibhebhu phala dyene kidingibhange kyayibha.” Kyenyiki, Nzambi wa mubhana yabhingi.
11 Kilube phange ya Suwa wexile tata ya Mehele, Mehele wexile tata ya Exitone.
12 Exitone wexile tata ya Betelafa, Pezeya ni ya Teyina. Teyina wexile tata ya Ilenahase. Yá ene o mayala atungile mu mbanza ya Leká.
13 O an’a Kenaji enya: Otiniyele ni Selayiya. Otiniyele wexile tata ya Hatate.
14 Meyonotayi wexile tata ya Ofila. Selayiya wexile tata ya Jowabe, Jowabe wexile tata ya Jehalazime.* Ene a aluku o majina yá mukonda exile asongi a mabaya.
15 O an’a Kalebe mon’a Jefune, enya: Ilu, Elahe ni Nahame. O mon’a* Elahe wexile Kenaji.
16 O an’a Jehalele enya: Zife, Zifa, Tiliya ni Azaliyele.
17 O an’a Ezala enya: Jetéle, Melede, Efele ni Jalone. Mwene* wemitine yu wavwala Midiyana, Samayi ni Izibá tata ya Xitimowa.
18 (O muhat’wê mukwa Juda wavwala-nê Jelede tata ya Ngedole, Ebele tata ya Soko ni Jekutiyele tata ya Zanowa.) Yá ene o an’a Bitiya mon’a Falawó wakazalele ni Melede.
19 O an’a muhatu wa Hodiya phange ya Nahami ene exile o jitata ja akwa Keyila, o mukwa Ngalamita ni tata ya Xitimowa, o mukwa Makata.
20 O an’a Ximá enya: Aminone, Dina, Bene-Hanane ni Tilone. O an’a Izi enya: Zowete ni Bene-Zowete.
21 O an’a Selá mon’a Judá enya: Hele tata ya Leka ni Lada tata ya Malesá ni ya mwiji wa akalakadi a linyu ku dibhata dya Azebeya,
22 kumoxi we ni Jokine ni mayala akwa Kozeba, Jowaji, Salafe (wa kazalele ni ahatu akwa Mowabe) ni Jasubi-Leme. O maka ya osoneke kya ukulu.
23 Ene exile jingumbi, atungile ku Netayime ni ku Ngedela. Ene atungile kwenyoko ya exile mukalakalela o sobha.
24 O an’a Ximinyá enya: Nemuwele, Jamine, Jadibe, Nzelá ni Sawulu.
25 Sawulu wexile tata ya Salume, Salume wexile tata ya Mibizame, Mibizame wexile tata ya Mixima.
26 Mixima wexile tata ya Hamuwele, Hamuwele wexile tata ya Zakule, Zakule wexile tata ya Ximeyi.
27 Ximeyi wexile ni dikwinyi ni samanu a ana a mala ni ana samanu a ahatu. Maji o jiphange jê kavwala twana twavulu. Ku mwiji wê, séku muthu wavwala twana twavulu kala o mayala amukwa a Judá.
28 Ene atungile ku Beleseba, ku Molada ni ku Hazale-Suwale,
29 ku Bila, ku Ezeme ni ku Tolade,
30 ku Betuwele, ku Holoma ni ku Zikilake,
31 ku Bete-Makabote, ku Hazale-Suzine, ku Bete-Bili ni ku Sahalayime. Jiji jene jexile o jimbanza jâ kate ku utuminu wa sobha Davidi.
32 Ene atungile we ku Etamu, ku Ayime, ku Limone, ku Tokeme ni ku Azane, kifwa mbanza jitanu,
33 ni jisanzala jakondolokele o jimbanza jiji kate ku Bahale. Yiyi yene o ima yasoneka yalungu ni miji ni ididi mwatungile ene.
34 O mbutu yamukwa ya Ximinyá yeniyi: Mezobabe, Jamileke, Joza mon’a Amaziya,
35 Jowele, Jehú mon’a Josibiya mon’a Selayiya mon’a Aziyele,
36 Elonayi, Jakoba, Jesowaya, Azayiya, Adiyele, Jesimiyele, Benaya ni
37 Ziza mon’a Sifi, mon’a Alone, mon’a Jadaya, mon’a Nzidi, mon’a Semaya.
38 yá a asonekene o majina mâ, ene exile o atwameni a miji yâ, o miji yâ yasuluka ni kudibandekesa.
39 Ene ayi kate bhwa zukama ni Ngedole, ku mbandu kutundila o dikumbi mu honga, mu kusota o kudya phala o ibhaku yâ.
40 Mukusuka-ku, asange kudya kwavulu, kudya kwambote, o ixi yexile ixi yadikota, kwexile kutululuka. M’ukulu, atungile kwenyoko exile o akwa Kalumita.
41 Mu izuwa ya Hezekiya sobha ya Judá, o mayala yá a asoneka o majina mâ, ayi, ya atolola o akwa Kalumita ni akwa Mewunime atungile mwenyomo. Ene a abwika* kala kitutena kumona kate mu izuwa ya lelu. Amateka kutunga kwenyoko mukonda kwexile ididi yavulu phala kudisa o ibhaku yâ.
42 Sayi mayala atokalele ku mwiji wa Ximinyá, ayi ku milundu ya Seyile. Ene atenesa hama jitanu ja mayala. O atwameni yâ, exile Pelatiya, Nehaliya, Lefaya ni Uziyele o twana twa Izi.
43 Ene ajibha o akwa Amaleke asubhukile, atungu kwenyoko kate mu izuwa ya lelu.
Footnotes
^ Sayi majina mu kibatulu kiki alombolola ididi, ki majina a athu kana. Mukyenyiki, sayi bhabha o dijina “tata” dilombolola yó wadyangela kutunga mu mbanza.
^ O dijina Jabezi nange dyalungu ni kizwelu mu dimi dya Hebalayiku, dilombolola “ndolo.”
^ Dilombolola “honga ya asongi a mabaya.”
^ Mu Heba.: “o ana.”
^ Nange, dya mulombolola Bitiya a mutumbula mu velusu ya 18.
^ Tala o Dilombolwelu.
