Dya Dyanga Dya Malunda 5:1-26
5 Yá ene o an’a Lubene, o mona wa dyanga wa Izalayele. (Mwene wexile o mona wa dyanga, maji mukonda dya kuzeka ni muhatu wa tat’ê, o ujitu yú a mukatula-wu ya a ubhana ku twana twa Zuze mon’a Izalayele. Kyenyiki, kamutumbula kala mona wa dyanga mu maka osoneke a lungu ni miji.
2 Sumbala Judá mwene wexile o dikota dya jiphange jê, ni kwila kwa mwéne kwene kwejila yó wakituka o mutwameni, maji o ujitu wa kukala o mona wa phande-kumbi watokalele kwa Zuze.)
3 O an’a Lubene, o mona wa dyanga wa Izalayele, enya: Henoko, Palu, Hezelone ni Kalumi.
4 O mbutu ya Jowele yenyiyi: Jowele wexile tata ya Semaya, Semaya wexile tata ya Ngongo, Ngongo wexile tata ya Ximeyi.
5 Ximeyi wexile tata ya Mika, Mika wexile tata ya Lehaya, Lehaya wexile tata ya Bahale.
6 Bahale wexile tata ya Behela, a mwambatele ku ubhika kwa Tilikate-Pilinezele sobha ya Asídya. Behela wexile o mutwameni wa mwiji wa Lubene.
7 O majina a jiphange jê, a asoneka kala kyatokala ku miji yâ, enya: Jehiyele o mutwameni, Zakadiya
8 ni Bela (mon’a Azaze, Azaze wexile tata ya Sema, Sema wexile tata ya Jowele) watungile ku jimbandu ja Alowele kate ku Nebu ni Bahale-Mehone.
9 Ku mbandu ku tundila o dikumbi, atungile ku mbambe yamatekene mu kikangalakata* kyazukama ni ngiji ya Ewufalate, mukonda o ibhaku yâ ya dibandekesele kyavulu mu ixi ya Ngiliyade.
10 Mu izuwa ya Sawulu, ene ayi mulwa ita ni akwa Hangate, a atolola ya atungu mu jibalaka jâ mu ixi yoso yakexile ku mbandu kutundila o dikumbi ya mbanza ya Ngiliyade.
11 O mbutu ya Ngade, yatungile bhu mbandu yâ, mu ixi ya Basane ku mbambe yayile kate ku Sálaka.
12 Ku Basane, Jowele mwéne wexile o mutwameni, Safane wexile o mutwameni wa kayadi. Kwakexile we Janeyi ni Safate.
13 O jiphange jâ jamala kudibhata dya tat’ê jenyiji: Mingyedi, Melulane, Sabá, Jolayi, Jakane, Ziya ni Hebele. Ene exile sambwadi dya jiphange.
14 Yá ene exile o twana twa Abiyale, mon’a Hudi, Hudi mon’a Jalowa, Jalowa mon’a Ngiliyade, Ngiliyade mon’a Mingyedi, Mingyedi mon’a Jezisayi, Jezisayi mon’a Jadu, Jadu, mon’a Buze.
15 Hayi mon’a Abidiyele, Abidiyele mon’a Nguni, Nguni mwéne wexile o mutwameni wa dibhata dya tat’ê.
16 Ene atungile ku Ngiliyade, ku Basane ni jisanzala ja azukamene ni ku ibhela yoso ya kwingila-mu o ibhaku yakexile ku Salone.
17 Mu izuwa ya Jotamu sobha ya Judá ni mu izuwa ya Jelobowamu* sobha ya Izalayele, enyoso a asoneka o majina mâ, kala kyatokalele ku miji yâ.
18 O akwa Lubene ni akwa Ngade ni kaxaxi ka mwiji wa Manasa, exile ni makwinyi awana ni kiwana kya midi ni hama asambwadi ni makwinyi asamanu a mazonda a ita. O mayala yá, exile mukwambata jingubu ni jixibhata, ni mifula, ene a alongele kulwa ita.
19 Ene abhânge ni akwa Hangate ni akwa Jetule ni akwa Nafixe ni akwa Nodabe.
20 Kuma ene adyondela kwa Nzambi mu kubhinga kikwatekesu, ya a mudyelela, mwene watambwijila o misambu yâ, yu wa akwatekesa mu ita. Kyenyiki, o akwa Hangate ni oso akexile-nawu kumoxi a abhakula bhu maku mâ.
21 Ene ambata we o ibhaku yâ, kifwa, makwinyi atanu a midi a jikamelu, hama jiyadi ni makwinyi atanu a midi a jimbudi ni midi jiyadi ja jijumendu. Ene akwata we hama ya midi a athu ya a ambata.
22 Ene ajibha athu avulu, mukonda o ita yexile ya Nzambi yakidi. Ku pholo dya kwenda, ene ayi mutunga mu ixi yatokalele ku kifuxi kyenyokyo, kate kya ambata ku ubhika.
23 O mbutu ya kaxaxi ka mwiji wa Manasa atungile tunde ku Basane kate ku Bahale-Helemone ndu ku Senile ni ku mulundu wa Helemone. Ene exile mundu wavulu.
24 Yá ene exile o atwameni a miji: Efele, Izi, Ediyele, Azediyele, Jelemiya, Hodaviya ni Jadyele. Ene exile mazonda a ita, mayala afuma, atwameni a miji yâ.
25 Maji ene abhukumukina o Nzambi ya jikuku jâ. Abhange undumbu mu kubheza o jinzambi ja akwa ixi yenyoyo, a abwikile kwa Nzambi.
26 Mukonda dya kiki, o Nzambi ya Izalayele wabhangesa kwila, Pulu sobha ya Asídya, (kifwa, Tilikate-Pilinezele sobha ya Asídya), wambata akwa Lubene, akwa Ngade ni kaxaxi ka mwiji wa Manasa ku ubhika. Wa ambata mu ixi ya Hala, ya Habole, ya Hale ni bhu mbandu bhwa zukamene o ngiji ya Ngozane. Kwene kwatungu kate mu izuwa ya lelu.
