Mukanda wa Phetele 1:1-25
1 Eme Phetele, ngi poxolo ya Jezú Kidistu, nga mu sonekena yó ala kala asonyi a mwanganena mu jixi ja Pondu, Ngalásya, Kapadósya, Azya ni Bitinya.
2 Enu amisolo bhukaxi ka kwijiya kwa Nzambi o Tata, kwalungu ni ima yanda kwizaku a mizelesa bhukaxi ka nzumbi phala mutumake n’a mizunzumune o manyinga a Jezú Kidistu.
O ngalasa ni kutululuka kwa Nzambi kukale ni enu.
3 Tu ximane Nzambi, Tata ya Ngana yetu Jezú Kidistu, mukonda bhukaxi ka henda yê yadikota watubhana uvwalukilu wa ubhe, phala tukale ni kidyelelu kya kidi bhukaxi ka difukunukinu dya Jezú Kidistu mwaxaxi ka madifundu.
4 O undundu wanda mibhana Nzambi katena ku ubwikisa, wene kiwala ni dixaka, ki ujimuka. O undundu wenyú a ubhake ku dyulu phala enu,
5 a mu milanga mukutena kwa Nzambi bhukaxi ka kixikanu, phala mutambule o kubhuluka kwanda tukuluka mu kithangana kya sukinaku.
6 Mukonda dya kyenyiki enu mwa sanguluka, sumbala mu kakithangana kofele mukala ni malamba mukonda dya izukutisu.
7 Phala o kixikanu kyenu kyafwama kyopolovale* kyabetakota kukala ni valolo, o ulu udibota ndenge, sumbala a kipolovala bhukaxi ka túbhya, kyene kibhana fuma ni ujitu ni kijingu, kyoso Jezú Kidistu kyanda tukuluka.
8 Sumbala nuka mwa mu mwene maji mwa muzolo, sumbala ki mwa mu mumona kindala maji mwa muxikana, anga mulondekesa kisangusangu kyadikota katena kukitanga,
9 kyoso kimuya ni kukumbidila o mbambe ya kixikanu kyenu, o kubhuluka kwenu.
10 Yalungu ni kubhuluka kuku ku mwanda tambula, o jipolofeta ja zwelele yalungu ni ngalasa yiyi ya Nzambi, asoto kwijiya kyambote o ima ni kutokwesa ni mwanyu woso.
11 Bhukaxi ka nzumbi yê Nzambi watangela kwila Kidistu wejitala hadi, mu kusuluka eji muzangeleka. Mukonda dya kyenyiki, ene asoto o kwijiya se ihi yeji bhita ni Kidistu, ni thembu kuxi yeji bhita o ima yiyi.
12 A atangela kwila o kikalakalu kyakexile mubhanga ki phala o mbote yâ, maji phala o mbote yenu, yalungu ni ima kindala imwevu kwa yó amibokela o njimbu yambote bhukaxi ka nzumbi ikôla yatundu ku dyulu. O ima yenyiyi katé mwene ni jianju amesena o ku ijiya.
13 Kalenu polondo phala o ikalakalu, kalenu kumesu azele, kalenu ni kidyelelu mu ngalasa yanda milondekesa Nzambi kyoso kyanda tukuluka Kidistu.
14 Kuma mu ana atumaka, ki mwehele dingi ku mi funyisa ku jihânji jenu jayibha ji mwakexile naju mukulu ande dya kukala ni kwijiya kwa Nzambi.
15 Kuma o Nzambi wamixana, wazele, enu wenu kalenu mu athu azele mu wendelu wenu woso.
16 Mukonda kyosoneke mu Mikanda Ikôla, exi: “Kalenu mu athu azele mukonda eme we ngazele.”
17 Se musamba kwa Tata, yó ufundisa sé katombo o ibhangelu ya muthu ni muthu, kalenu ni wôma mu kithangana ki mwala kala mu asonyi.
18 Mukonda enu mwejiya kwila ka mibhulula* bhukaxi ka ima ibola, kala o phalata ni ulu ku ukexilu wa mwenyu wenu wayibha u mwakexile nawu u mwalundula ku jikuku jenu.*
19 Maji amibhulula ni manyinga a Kidistu abetakota kukala ni valolo, edi kala o manyinga a kambudi kayuka sé dixaka.
20 Mukidi, a mwijidile kyá ande dya kubhanga o ngongo, maji mukonda dyenu mwene watukuluka kudisukilu dya jithembu.
21 Bhukaxi ka mwene enu mwaxikana Nzambi yó wa mu fukununa mwaxaxi ka madifundu, anga umubhana fuma phala mukale ni kixikanu ni kidyelelu kwa Nzambi.
22 Kuma mwazelesa kyá o mwenyu wenu mu kutumaka o kidi, o henda yenu ku jiphange ikale sé mangonya, dizolyenu mudyenu ni kufulujuka kwoso ni muxima woso.
23 Mukonda bhukaxi ka maka a Nzambi ya mwenyu, amibhana uvwalukilu wa ubhe ki bhukaxi ka mbutu ibola maji bhukaxi ka mbutu ikamba kubola* inangenena katé ku hádya ni hádya.
24 Mukonda “o athu ala kala o yangu, o kubhenya kwâ kwadifu ni kubhenya kwa ithulu ya mukawu. O yangu ilela, o ithulu ilawuka.
25 Maji o maka ma Jihova ma nangenena katé ku hádya ni hádya.” O “maka” enyá o njimbu yambote yamitudila.
Footnotes
^ Mba, “kyoyukise.”
^ Mu Ngel.: “kamikula.”
^ Mba, “bhukaxi ka ijila.”
^ Kiki kilombolola mbutu ibhana ibundu.
