Divulu Dya Dyanga Dya Samuwele 2:1-36
2 Kyenyiki Ana mu kusamba wambe:
“Muxima wami wasanguluka mukonda Jihova wa ngikwatekesa;Jihova wa ngikolokotesa*
Eme ngitambwijila o jinguma jami ni kuswina.Mukonda o ukexilu wê wakubhulula, u ngisangulukisa.
2 Kana-ku muthu wengi ukôla kala Jihova.Sé-ku Nzambi yengi, kikale eye ngó.Kana-ku ndanji yadisokela ni Nzambi yetu.
3 Kanenu kusuluka kuzwela ni ukumbu;Mukanu dyenu kimutunde izwelu ya kudizangeleka,Mukonda Jihova, Nzambi ya unjimu ni kwijiya,Mwéne ngo utena kuzwela se o kima kya mubhanga o muthu kyawabha mba kyayibha.
4 O mifula ya mazonda a ibukujula,Maji mwene u bhana nguzu kwa yó azoza.
5 O yó ekutile abhingi kukalakala phala kudyaMaji o yó exile ni nzala, kamubhita dingi nzala.
O mbaku wavwala sambwadi dya twana,Maji o yó wexile ni twana twavulu, waxala ubheka.*
6 Jihova wala ni kutena kwa kubwika ni kulanga o mwenyu;*Mwene we wala ni kutena kwa kutulula o athu mu mbila* ni kwa kubheka dingi ku mwenyu.
7 Jihova wala ni kutena kwa kubhangesa o muthu kukala ngadyama mba mvwama;Mwene wala ni kutena kwa kutulula ni kwa kuzangeleka o muthu.
8 O yó ka mu mubhana o kijingu, mwene u mubalumuna mu fufuta;Mwene u katula o ngadyama* ku wadyama wê,Phala ku mubhangesa kuxikama ni ilamba,Mu ku mubhana kididi kya kijingu.
O madisesa a ixi atokala kwa Jihova,Mwene watula-mu o mavu a bhana idima.
9 Mwene u langa o jinjila ja yó a mukala fiyele,Maji o athu ayibha, anda kwabwika mwavundu,Kuma o muthu katena kutolola mu nguzu yê.
10 Jihova wanda bwika oso abhânga-nê;*Mwene wanda londekesa o njinda yê, kala o kinuminu kya nzaji kitunda ku dyulu.
Jihova wanda fundisa kate ku maxokololo a ixi,Wanda bhana o kutena kwa sobha yê,Mwene wanda bandekesa o nguzu* ya yó wa mu undu.
11 Mukusuluka, Elikana wayi kubhata dyê ku Lamá, maji o mon’ê waxala ni mukunji Elí, yu wamateka kusidivila Jihova.
12 O an’â Elí exile athu ayibha, kexile muxila Jihova.
13 O kima kyexile mubhanga ni mbandu ya xitu yasatela, yatokalele kutambula o akunji ku mundu, kyenyiki: Kyoso o muthu kyexile jinga mubhakula o sata, kwexile mukwiza o mukwatekexi wa mukunji ni kinyengenu* kyadikota bhu maku, mu kithangana kyexile mulamba o xitu,
14 mwene wexile muxuka o kinyengenu* mu imbya yakexile mu lambela-mu. O mukunji wexile muxala ni yoso yexile mukatula ni kinyengenu.* Kiki kyene kyakexile mubhanga ku athu oso akwa Izalayele akexile muya ku Silo.
15 Ku mbandu yengi, ande mwene dya muthu wexile mubhakula o jisata kwoha o banya, kwexile mukwiza o mukwatekexi wa mukunji, yu wexile muzwela, wixi: “Bhana o xitu ku mukunji n’a izuze. Mwene kanda xikina kutambula xitu yolambe kya, kikale ngo ya wisu.”
16 Kyoso o muthu kyexile mutambwijila: “Kya dyanga, twehele hanji kwoha o banya, mukusuluka ambata yoso iwamesena.” O mukwatekexi wexile mutambwijila: “Kana, ngibhane mwene o xitu kindala. Se ngwé ku ngibhana, éme mwene nganda ikatula!”
17 Kyenyiki, o kituxi kya a kwatekexi kyadibandekesa dingi ku pholo ya Jihova, mukondao mayala enyá, kexile muxila o jisata ja Jihova.
18 Maji Samuwele wexile musidivila Jihova, wazwatele efodi ya linyu sumbala wexile hanji mona-ndenge.
19 Mivu yoso, man’yâ wexile mu mutungila kadivunga ni ku mwambatela-ku, kyoso kyexile muya ni mwadi wê phala kubhana o sata ya muvu ni muvu.
20 Kyenyiki, Elí wabesowala Elikana ni muhat’wê Ana, yu wambe: “Jihova akubhe mona bhukaxi ka muhat’wé, mu kididi kya yó mwa mubhana* kwa Jihova.” Ene anga avutuka kubhata.
21 Jihova wabesowala Ana phala atene kwimita dingi. Mwene anga uvwala twana tutatu twa mala ni twana tuyadi twa ahatu. O kambonga Samuwele anga uya ni kukula kyoso kyaya ni kusidivila Jihova.
22 Elí wakukile kya kyavulu, mwene wevu yoso yexile mubhanga o twana twê ku Izalayele yoso, ni kwila o twana twê exile muzeka ni ahatu akexile mukalakala bhu mwelu wa balaka ya kudyongekela-mu.
23 Mwene wexile mutangela an’ê, wixi: “Mukonda dyahi mwa musuluka ni kubhanga o ima yiyi? O ima i ngamukwivwa yalungu ni enu, ima yayibha.
24 An’ami tata! O ima i ngamukwivwa bhukaxi ka mundu wa Jihova, ki ima yambote.
25 Se o muthu uta kituxi kwa mukwa, o muthu wengi utena kubhinga kwa Jihova phala ku muloloka.* Maji se o muthu uta kituxi kwa Jihova, nanyi utena ku musambela?” Maji ene kamesenene kwivwa o tata yâ, kuma Jihova wamesenene kwabhakula phala kufwa.
26 Maji o kambonga Samuwele wasuluka ni kukula. Mwene exile mu muwabhela dingi kwa Jihova ni ku athu.
27 Sayi diyala dya Nzambi weza kate kwa Elí, yu wa mwambela: “Kiki kyene kyambe Jihova: ‘O kwila kingidilondekesa mu inzo ya tat’enu, kyoso kimwatungile mu Ijitu kala mu abhika mu inzo ya Falawó?
28 Mwene a musolo bhukaxi ka miji ya akwa Izalayele, phala kusidivila kala mukunji wami ni kubanda ku kalatódyu kami ni kubhana jisata ni kwoha wasu wadizumba* ni kuta efodi ku pholo yami. Eme ngabhana ku jikuku jenu jisata ja kwoha mu tubhya, jexile mubhana akwa Izalayele.
29 Mukonda dyahi kimwene muxila* o jisata jami, jingatumu kubhana mu inzo yami? Mukonda dyahi eye wamuxila dingi o an’ê, eme ndenge, mu kudinetesa ni jitumba ja xitu jene mubhana o mundu wami wa Izalayele?
30 “‘Kyenyiki, Jihova Nzambi ya Izalayele wambe kiki: “Mukidi eme ngambela o dibhata dyé ni dibhata dya jikuku jé kwila, mweji ngisidivila jinga.” Maji kindala Jihova wambe, wixi: “Kiki kikyanda bhita dingi, mukonda nganda jingisa yó a ngijingisa, o yó a kambe kungixila, kinganda kwa suwa.”
31 O izuwa phala kuzubha o kutena kwé ni kutena* kwa tat’é yamubhixila, mukondakana-ku diyala mu inzo yé, wanda bhixila ku ukukilu.
32 Kumbote yoso yene mubhanga mu Izalayele, eye wanda mona o nguma yé mu inzo yami. Mu inzo yé nuka dingi mwanda kala muthu wanda kuka.
33 O muthu watokala ku mwiji wé, u ngikamba ku mukatula musidivisu yami mu kalatódyu, wanda bhangesa kwila, o mesu mé kamone dingi kyambote ni ku kubhangesa kukala ni kikote. Maji athu avulu mu inzo yé, anda fwila ku xibhata.
34 O kima kyanda bhita ni twana twé tuyadi, Hofini ni Fineya kyanda kala kijimbwete phala eye. Kiyadi kya anda fwa mu kizuwa kimoxi.
35 Mukusuluka nganda bheka mukunji wami wafiyele. Mwene wanda bhanga yoso i sangulukisa o muxima wami. Nganda mutungila dibhata dinangenena, mwene wanda kwenda ku pholo ya selevende yami i ngasolo.
36 Woso u subhuka mu inzo ya Elí, wanda kwiza ku pholo yê ni ku mufukamena phala mwene kutambula kitadi ni mbolo ni kwamba: “Ngakudyondo ngite ngo kala ngi mukunji phala ngitene kutambula kakibhesu* ka mbolo ni ngidye.”’”
Footnotes
^ Mu Heba.: “Jihova wangibhana nguzu.”
^ Mu Heba.: “wabhele.”
^ Mba, “kubheka ku mwenyu.”
^ Mba, “Seol.” Tala o Dilombolwelu.
^ Mba nange, “mwene u balumuna o ngadyama mu dixita.”
^ Mba nange, “o yó azoka ni Jihova anda teketa ni woma.”
^ Mu Heba.: “lungela.” Tala o Dilombolwelu.
^ Mba, “kinyangenu, ngalufu.”
^ Mba, “kinyangenu, ngalufu.”
^ Mba, “kinyangenu, ngalufu.”
^ Mu Heba.: “mwa musobhesa.”
^ Mba nange, “Nzambi u mufundisa.”
^ Mba nange, “kuhabesa o dixi dya sata.”
^ Mu Heba.: “mukonda dyahi mwene mudyota.”
^ Mu Heba.: “nganda batula o lukwaku lwê ni lukwaku lwa.”
^ Mba, “kadibhesu.”
