Divulu Dya Dyanga Dya Samuwele 8:1-22
8 Kyoso Samuwele kya kuka, mwene wasolo an’ê kala afundixi mu Izalayele.
2 O mon’ê wa dyanga a mwixanene Jowele, o mon’ê wa kayadi a mwixanene Abiya, éne exile o afundixi ku Beleseba.
3 Maji o twana twê kitwexile mukayela o phangu yê. Exile akwa lwimbi ni kutambula kitadi kya mangonya, ene kexile mufundisa ni kuyuka.
4 Mukubhita thembu, o adyakime oso a Izalayele a dyongeka, ya ayi kate kwa Samuwele ku Lamá.
5 Ene a mwambela, exi: “Ngana, eye wakuka kya. O twana twé kene mukwendela mu jinjila jé. Tubhane sobha phala kutufundisa, kala kyala o ifuxi yamukwa.”
6 Maji kyoso kya mwambela kwila, “tubhane sobha phala kutufundisa,” Samuwele waluwala* kyavulu. Kyenyiki, mwene wasambe kwa Jihova.
7 Jihova wa mwambela, wixi: “Bhanga yoso yakubhingi o mundu, mukonda ene kakuditunu eye, maji a ngiditunu eme kala ngi sobha.
8 Ene a musuluka ni kubhanga o ima yene mubhanga kya tunde o kizuwa ki nga akatula ku Ijitu kate lelu. A ngibhana dikunda, a sidivila jinzambi jengi, kyene kya mubhanga n’eye.
9 Kindala bhanga ya mukubhinga ene. Maji kana kweha ku atendelesa ni kidi kyoso, mu kwa jimbulula ihi yanda kwabhinga o sobha yanda kwatumina.”
10 Kyenyiki, Samuwele watangela o izwelu yoso ya Jihova, ku mundu wa mubhingile o sobha.
11 Mwene wambe: “O sobha wanda mitumina wala ni kutena kwa ku mibhinga o ima kala yiyi: Mwene wanda bhangesa an’enu kusidivila ku makalu mê a ita ni ku jikabalu jê, amoxi anda kala mulenga ku pholo a makalu mê.
12 Mwene wanda sola amoxi kala jikabhitangu phala kutumina midi ya athu ni jikabhitangu phala kutumina makwinyi atanu a athu, amukwa anda dima ku mabhya mê, kubhongolola o idima yê ni kubhanga mawuta phala kubhânga mu ita ni jifalamenda phala o makalu mê.
13 Mwene wanda tuma o an’enu a ahatu kubhanga ngwendu* ya dizumba, kulamba ni kubhanga jimbolo.
14 Mwene wanda tambula o mabhya menu a mividi ni midiva ni ku abhana ku jiselevende jê.
15 Mwene wanda tambula mbandu ya kakwinyi ya jimbutu ni mividi yenu, wanda jibhana ku jikabhitangu ja inzo ya sobha ni ku jiselevende jê.
16 Mwene wanda mitambula o abhik’enu a mala ni a ahatu, o jingombe jenu janete ni jijumendu jenu phala kubhanga o ikalakalu yê.
17 Mwene wanda tambula mbandu ya kakwinyi ya jimbudi jenu, enu mwanda kituka mu abhik’ê.
18 Kwanda bhixila o kizuwa kimwanda dikola mukonda dya sobha i mwasolo, maji Jihova kanda mitambwijila.”
19 Maji o mundu kabhana mátwi mu izwelu ya Samuwele, ya ambe: “Kibhwalé maka! Etu twamesena mwene kukala ni sobha phala ku tutumina.
20 Kyenyiki, twanda difwangana ni ifuxi yamukwa. O sobha yetu wanda tufundisa, wanda twendesa ni kubhânga mu ita yetu.”
21 Kyazubha kwivwa yoso yazwela o mundu, Samuwele wabhitulula yoso kwa Jihova.
22 Jihova wambela Samuwele wixi: “Ivwa o mundu! Sola sobha yanda kwatumina.” Kyenyiki, Samuwele wambela o mayala akwa Izalayele: “Kala muthu a vutuke mu mbanza yê.”
