O Mukanda wa Dyanga ku Akwa Tesalonika 1:1-10
1 Eme Phawulu, Sidivanu* ni Timote, twa mu sonekena o kilunga kya akwa Tesalonika kyatokala kwa Nzambi o Tata, ni kwa Ngana yetu Jezú Kidistu:
O ngalasa ya Nzambi ni kutululuka kukale ni enu.
2 Twene musakidila jinga Nzambi mu ku mitumbula enu enyoso mu misambu yetu.
3 Mukonda twene mu lembalala bhu pholo ya Nzambi Tatetu, o kikalakalu kyenu kya fiyele, o nguzu yenu yoso imwene mu londekesa mukonda dya henda yenu, ni kukolokota kwenu mukonda dya kidyelelu kimwala nakyu kwa Ngana yetu Jezú Kidistu.
4 Enu akwetu jiphange jami amizolo kwa Nzambi, etu twejiya kwila mwene wa misolo,
5 mukonda o njimbu yambote itwene muboka ki twa mitudila nayu ngó ni izwelu, maji ni kutena, bhukaxi ka nzumbi ikôla, ni ku ijimbulwila kwila, ya kidi. Enu mwejiya se wendelu webhi u twakexile nawu mwaxaxi kenu phala o mbote yenu.
6 Enu mwa kayela o phangu yetu ni ya Ngana yetu, mukonda mwa xikina o maka ni jiphaxi javulu ni kusanguluka kwijila bhukaxi ka nzumbi ikôla.
7 Kyene ki mwa kitukila mu phangu ya jiphange joso ku Masedonya ni ku Akaya.
8 Mukidi, mukonda dyenu o maka ma Jihova ka evu ngó ku Masedonya ni ku Akaya, maji o kixikanu kyenu kwa Nzambi kya dimwange mu ididi yoso, kyenyiki etu ki tubhingi dingi kuzwela kima.
9 Mukonda o athu ene muzwela jinga kyebhi ki twa mikundu muveji ya dyanga, ni kyebhi ki mwaxikina o maka ma Nzambi, anga mwaxisa o iteka yenu phala mukale mu abhika a Nzambi ya mwenyu ni ya kidi.
10 Ni kukingila monê Jezú wanda tunda ku dyulu, yó a mu fukununa mwaxaxi ka madifundu ni ku tubhulula ku njinda ya Nzambi yanda kwizaku.
Footnotes
^ A mwixana we Sila.
