O Mukanda wa Dyanga ku Akwa Tesalonika 3:1-13
3 Kyoso ki twa kambele kwivwa njimbu yalungu ni enu, anga twamono kwila kitweji tena kukinga dingi, twasolo kuxala ubheka wetu ku Atena,
2 ni ku mitumikisa Timote phangyetu o mukunji* wa Nzambi ni wa njimbu yambote yalungu ni Kidistu phala ku mikonda o malamba* ni kukolokotesa o kixikanu kyenu,
3 phala kana muthu ubhwila mukonda dya izukutisu yiyi, mukonda kala kimwejiya o izukutisu yiyi yanda bhita mwene n’etu.*
4 Kyoso ki twakexile kumoxi ni enu, twexile mu midimuna kwila, tweji bhita mu jiphaxi jiji. Kala ki mwejiya, kindala kiki kyene kyá kya mubhita.
5 Mu kiki, kyoso ki nga kambele kwivwa njimbu yalungu ni enu, nga mi tumikisa Timote phala kwijiya kyebhi kyala o ufiyele wenu. Mukonda ngexile ni hele ya kwila o Mukwa Kutendala u mi bhangesa kuta kituxi, anga o kikalakalu kyetu kiye ngó mu kingoho.
6 Maji Timote wabhixila kindala bhabha, yu watubhekela njimbu yambote yalungu ni ufiyele wenu ni henda yenu. Mwene wambe kwila, enu mwene mu tu lembalala jinga ni henda, ni kwila mwa mesena kyavulu ku tumona, kala etu twamesena we ku mimona.
7 Mukonda dya kiki jiphange, mu jiphaxi* ni mu izukutisu, twatambula kiswinisu mukonda dyenu ni mukonda dya ufiyele u mwene mulondekesa.
8 Mukonda se mukolokota mu ukamba wenu ni Ngana, etu wetu tuswina.*
9 Kyebhi kitutena kusakidila Nzambi mukonda dyenu, ni mukonda dya kusanguluka kwadikota kutwene naku bhu pholo ya Nzambi yetu mukonda dyenu?
10 Twene mu dyondela jinga Nzambi usuku ni mwanya phala tutene kudimona ni enu pholo ni pholo, phala kukolesa we o kixikanu kyenu.
11 Twa mukinga kwila, Nzambi Tata yetu ni Ngana yetu Jezú ajikule o njila phala tuye ku misanga ku mwaloko.
12 Kyenyiki, Ngana a mi bandekese, a mivudise dingi o henda yenu mudyenu ni ku athu oso, kala etu ki twa bandekesa o henda yetu kokwenu.
13 Mwene wanda bhangesa o mixima yenu kuswina ni kuzela bhu pholo ya Nzambi yetu ni Tata, mu kithangana kya kutukuluka kya Ngana Jezú ni yó osole.*
Footnotes
^ Mba nange, “o mukalakadi.”
^ Mba, “ku mi swinisa.”
^ Mba, “atuxindila o ima yiyi.”
^ Mu Ngel.: “mu ibhindamu.”
^ Mba, “tulaya.”
^ Mu Ngel.: “Athu akôla.”
