Wakayadi wa Nzwá 1:1-13
1 Eme ngi mwadyakime,* nga mu sonekena o muhatu amusolo kwa Nzambi, ni an’ê. Eme ngamizolo kyavulu. K’eme ngó, maji ni athu oso we ejiya o kidi.
2 Eme ngamizolo kyavulu mukonda dya kidi ki nangenena momwetu, kyanda kala ku muxima wetu katé ku hádya ni hádya.
3 O Nzambi, o Tata, ni Mon’ê Jezú Kidistu, anda tubhana o kwijiya kwa kidi, ni ku tu londekesa henda. Mwene wanda tu besowala, ku tu londekesa o ngalasa, ni ku tubhana o kutululuka.
4 Nga sanguluka mu kwijiya kwila amoxi ku twana twê, a mukwenda mu kidi, mu ku kumbidila o kitumu ki twatambula kwa Tata.
5 Eye u muhatu akusolo kwa Nzambi, kindala nga mu kubhinga kwila, tudizole mudyetu. (Ki nga mu kusonekena kitumu kya ubhe, maji kitumu kitwala nakyu kyá tundé kudimatekenu.)
6 O henda ilombolola kusuluka mu kwenda kala ki tutendelesa o itumu ya Nzambi. O kitumu kitwevu tundé kudimatekenu, kyenyiki: Tu suluke mu kulondekesa o henda yê.
7 Mukonda mu ngongo mwala athu avulu akwa kunganala, yó kaxikina kwila Jezú Kidistu weza mu mukutu wa xitu. Mwéne o mukwa kunganala, mwéne o kidistu ya makutu.
8 Dilangyenu phala ki mutexi o ima i mwakalakala kyavulu phala ku itambula. Se mubhanga kiki, mwanda tambula o mabesá a mibhakela Nzambi.
9 Woso kakolokota mu ulongelu wa Kidistu, anga ulonga ima yayibha, mwene kalé ni Nzambi. Maji woso ukolokota mu ulongelu wa Kidistu, wala ni Tata ni Mona.
10 Woso wiza kokwenu, anga ukamba kubheka o ulongelu yú, kanenu ku mutambulula ku mabhata menu, né ku mu menekena.
11 Mukonda woso u mu menekena, wa mu mukwatekesa mu ibhangelu yê yayibha.
12 Ngala ni ima yavulu phala ku mitangela, maji ki ngamesena ku mi sonekena-yu mu mikanda. Ngandala ku mikunda ni kuzwela ni enu pholo ni pholo, phala musanguluke kyavulu.
13 O an’â phang’yé ya muhatu, amusolo kwa Nzambi, a kutumikisa o umenekenu.
Footnotes
^ Mba, “kafunga.”
