Dya Kayadi Dya Jisobha 10:1-36
10 Akabe wexile ni makwinyi asambwadi a ana ku Samadiya. Kyenyiki, Jehú wasoneka mikanda, yu wa itumikisa ku Samadiya, ku ilamba ya Jezelele, ku adyakime ni yó exile mulanga o twana twa Akabe. O mukanda wexile muzwela kiki:
2 “Kyoso kimwanda tambula o mukanda yú, o twana twa ngana yenu twanda kala bhwamoxi n’enu. Mwanda kala we ni makalu a ita, jikabalu, mauta mu mbanza yofikidile ni ilumbu.
3 Kyenyiki, solenu muthu wala ni uhete* ku twana twa ngana yenu, mu mutumbike ku kyandu kya tat’ê, he muzokele o dibhata dya ngana yenu.”
4 Maji, o wôma wa akwata, ya ambe: “Se o jisobha jiyadi alembwa kubhânga-nê, kyebhi-phe, ki twanda tena kubhânga ni mwene?”
5 Kyenyiki, o yó wexile ku pholo ya ikalakalu mu inzo ya sobha, o nguvulu ya mbanza, o adyakime ni yó exile mulanga o twana twa Akabe, atumina kutangela Jehú, mu kwamba: “Etu tu jiselevende jé, twanda bhanga yoso i uzwela. Kitwanda tumbika muthu ku usobha, bhanga yoso ya kuwabhela ku mesu mé.”
6 Kyenyiki, Jehú wa asonekena o mukanda wa kayadi, mu kwamba: “Se mwala ku mbandu yami ni kwila mwamesena ku ngibelesela, mungu zenu ku Jezelele, mu ola kala yiyi. Mwiza ni mítwe ya ana a ngana yenu.”
O makwinyi asambwadi a an’a sobha exile mu asasa ku mayala afuma a mbanza.
7 Kyenyiki, kyoso kyatambula o mukanda, akwata o makwinyi asambwadi a an’a sobha, ya a ajibha. O mítwe yâ a itula mu isambu*, ya a itumikisa ku Jezelele.
8 O mukunji weza yu wambe, wixi: “Abheka kya o mítwe ya an’a sobha.” Jehú wambe: “Bhangenu-nayu matumbu ayadi bhu dibhitu dya mbanza anga mu axa bhenyobho kate mungu mu kamene.”
9 Mu kamene mwene wemana bhu pholo ya mundu, yu wambe: “Enu kimwala ni kikuma.* Éme ngala ni kikuma, ngalungulukila o sobha anga nga mujibha, maji nanyi wajibha o athu oso yá?
10 Ejiyenu-kyu kwila, yoso yakanena Jihova, kifwa, yoso yazwela Jihova ku dibhata dya Akabe, yanda dikumbidila mwene. Jihova wa mukumbidila yoso yazwela bhukaxi ka selevende yê Elija.”
11 Jehú wajibha we o athu oso asubhukile ku dibhata dya Akabe ku Jezelele. Ni mayala oso afuma, ni makamba mê moso ni akunji, kikusubhuka muthu.
12 Mukusuluka, mwene waditela mu njila iya ku Samadiya. O inzo mwakexile mukutila o jimbudi* yexile mu njila.
13 Kwenyoko, Jehú wasange o jiphange ja Akaziya sobha ya Judá yu wa ebhwidisa, wixi: “Enu nanyi?” Ene atambwijila: “Etu tu jiphange ja Akaziya, twamuya mukwijiya se o an’â sobha ni ana a mam’a sobha ala kyambote.”
14 Mu kithangana kyenyokyo, mwene wambe: “kwatenu-u!” Kyenyiki, a akwata ya a ajibha bhwa zukama o kixima kyexile bhu mbandu a inzo bhwexile mukutila o jimbudi. Ajibha-ku makwinyi awana ni kiyadi kya mayala, kaxisa-ku ne ngo muthu umoxi ni mwenyu.
15 Kyoso kyayi ni kwenda, Jehú wadisange ni Jonadabe mon’a Lekabe, wexile mukwiza mudisanga-nê. Jehú wa mumenekena* yu wa mwibhwidisa: “O kwila eye wa ngidyelela ni muxima woso, kala ki nga kudyelela ni muxima wami woso?”
Jonadabe wa mutambwijila, wixi: “Xe!”
“Se kyene, kwata o lukwaku lwami.”
Mwene wakwata ku lukwaku lwa Jehú, Jehú anga u musunga mu dikalu dyê dya ita.
16 Mukusuluka, Jehú wambe: “Zá n’eme, phala umone ihi i ngibhanga kwa yó abhukumukina o itumu ya Jihova.” Kyenyiki, Jehú wa mwambata mu dikalu dyê dya ita.
17 Mukusuka-ku, Jehú wabhixila ku Samadiya yu wajibha o athu oso asubhukile mu dibhata dya Akabe ku Samadiya. Enyoso wa ajibha kala kyazwelele Jihova kwa Elija.
18 O kyamukwa, Jehú wexana o mundu woso, yu wa ambela wixi: “Akabe wabheza ngo Bahale bhofele, maji eme nganda mubheza kyavulu.
19 Kyenyiki, exanenu o jipolofeta joso ja Bahale ni abhezi’ê oso ni akunji’ê oso. Ki muxise-ku muthu, mukonda nganda bhakula sata yadikota kwa Bahale. Woso ukamba kuya-ku, wanda fwa.” Maji yiyi yexile ngo ndunge ya Jehú phala kujibha o abhezi a Bahale.
20 Jehú wambe dingi, wixi: “Bhanenu ngolokela ya kwila kwanda kala kyônge kyonene phala Bahale.” Kyenyiki, abhana o ngolokela.
21 Mukusuluka, Jehú watumikisa njimbu mu Izalayele yoso, o abhezi oso a Bahale eza. Ki kukambe-ku muthu. Ene abokona mu tembulu ya Bahale, o tembulu anga izala kyavulu ni athu.
22 Mwene wambela kwa mukwa kubhaka o izwatu ya abhezi a Bahale, wixi: “Bheka izwatu phala o abhezi oso a Bahale.” Mwene wabheka o izwatu.
23 Mukusuluka, Jehú ni Jonadabe mon’a Lekabe, abokona mu tembulu ya Bahale. Jehú wambela o abhezi a Bahale: “Tongininenu kyambote phala kibhukale abhezi a Jihova, maji bhukala ngo o abhezi a Bahale.”
24 Mukusuka-ku, ene abokona phala kubhakula jisata ja kwoha. Jehú watudile makwinyi anake a masoladi mê bhu kanga, yu wa ambela: “Woso wehela diyala dimoxi ku mayala yá u nga abhakula bhu maku menu kulenga, mwéne wanda fwa bhu kididi kyê.”
25 Kyoso Jehú kyazubha kubhakula o jisata ja kwoha, wambela o alangidi* ni jikabhitangu, wixi: “Bokonenu ni mu ajibhe! Kanenu kwehela-ku muthu kulenga.” O alangidi ni jikabhitangu abokona, ajibha o abhezi a Bahale ni xibhata, ya atakula o imbi yâ bhu kanga. Ayi ni ku ajibha kate bhu mbandu ya tembulu ya Bahale a ixana Mbanza.
26 Mukusuluka, ene abheka o iteka ya Bahale bhu kanga ya a ite túbhya.
27 O kiteka kya Bahale a kibulu, o inzo yê a ilundumuna, a ikitula inzo ya dixidixilu kate mu izuwa ya lelu.
28 Kyenyiki, Jehú wazubha o ubhezelu wa Bahale mu Izalayele.
29 Maji Jehú kalenge o ituxi yatele Jelobowamu mon’â Nebate, ya bhangesele akwa Izalayele kuta kituxi kyalungu ni tungombe twa ulu, twexile ku Betele ni ku Dane.
30 Kyenyiki, Jihova wambela Jehú, wixi: “Eye wabhange ima yambote bhu pholo yami, yoso yakexile ku muxima wami yalungu ni dibhata dya Akabe, yene i wabhange. Kyenyiki-phe, o an’ê a mala kate ku mwiji wa kawana ene anda xikama ku kyandu kya ungana wa Izalayele.”
31 Maji Jehú kasuluka mu kubelesela o itumu ya Jihova, o Nzambi ya Izalayele ni muxima wê woso. Mwene wasuluka mu kuta o ituxi yatele Jelobowamu yabhangesele we akwa Izalayele kuta ituxi.
32 Mu izuwa yenyoyo, Jihova wamateka kutambula* o ixi ya Izalayele mbandu ni mbandu. Hazayele wasuluka ni kulwa ita mu mbambe yoso ya Izalayele.
33 Tunde ku Njolodá ku mbandu ku tundila o dikumbi, o ixi yoso ya Ngiliyade, o ixi ya akwa Ngade, ya akwa Lubene, ya akwa Manasa, itunda ku Alowele yala ku mbandu ya honga yala ku Anone, kate ku Ngiliyade ni ku Basane.
34 O ima ya mukwa ya mu musoso wa Jehú, o kutena kwê ni ima yoso yabhange, a isoneka mu divulu dya misoso ya izuwa ya jisobha ja Izalayele.
35 Mukusuka-ku, Jehú wafu ya a mufundu mu Samadiya. O mon’ê Jowakaji mwene wa mubhingana ku usobha.
36 Jehú watumina mu makwinyi ayadi ni dinake dya mivu mu Izalayele, tunde ku Samadiya.
Footnotes
^ Mba, “muthu wayuka.”
^ Mba, “inda.”
^ Mba, “mu athu ayuka.”
^ Nange o kididi bhwexile mu kutila o jimbudi phala ku jibhuta.
^ Mba, “wa mu besowala.”
^ Mu Heba.: “Akwa kulanga.”
^ Mba, “kusosolola o akwa Izalayele.”
