Dya Kayadi Dya Jisobha 13:1-25
13 Ku muvu wa makwinyi ayadi ni kitatu kya utuminu wa Jowaji mon’a Akaziya, sobha ya Judá, Jowakaji mon’a Jehú, wakituka sobha ya Izalayele ku Samadiya, yu watumina mu dikwinyi ni sambwadi dya mivu.
2 Mwene wexile mubhanga ima yayibhila Jihova, wate o ituxi yatele Jelobowamu, mon’a Nebate, yabhangesa we akwa Izalayele kuta ituxi. Mwene keha o kukayela o jinjila ja Jelobowamu.
3 Kyenyiki, mu izuwa yenyoyo o njinda ya Jihova yeza ku thandu dya Izalayele, yu wa abhakula bhu maku a Hazayele, sobha ya Sídya, ni bhu maku a Bene-Hadade mon’a Hazayele.
4 Mukubhita thembu, Jowakaji wadyondela Jihova, Jihova wamwivu mukonda wamono kwila akwa Izalayele exile mu atatesa ku akwa Sídya.
5 Kyenyiki, Jihova wabhana mubhuludi ku akwa Izalayele phala ku abhulula bhu maku a akwa Sídya. O akwa Izalayele atenene dingi kutunga ku mabhata mâ kala kyexile mubhanga mukulu.*
6 (Maji ene keha o ituxi yatele o dibhata dya Jelobowamu yabhangesa akwa Izalayele kuta ituxi. Asuluka ni kuta o ituxi yenyiyi, o kiteka* kyexile ku Samadiya kakibulu.)
7 Jowakaji wakexile ngo ni makwinyi atanu a masoladi endela mu jikabalu, dikwinyi dya makalu a ita ni dikwinyi dya midi a masoladi endela bhoxi, mukonda o sobha ya Sídya wa ajibhile, wa atutujula kala fufuta bhu kididi bhwene mu bhyatela o idima.
8 O ima ya mukwa ya musoso wa Jowakaji, o ima yabhange ni kutena kwê, a isoneka mu divulu dya misoso ya izuwa ya jisobha ja Izalayele.
9 Mukusuka-ku, Jowakaji wafu ya a mufundila ku Samadiya. Mon’ê Jowaji mwene wa mubhingana bhu kididi kyê kya ungana.
10 Ku muvu wa makwinyi atatu ni sambwadi wa utuminu wa Jowaji, sobha ya Judá, Jowaji mon’a Jowakaji wakituka sobha ya Izalayele ku Samadiya yu watumina mu dikwinyi ni samanu dya mivu.
11 Mwene wasuluka mu kubhanga ima yayibhila Jihova, kalenge o ituxi yoso yatele Jelobowamu mon’a Nebate, yabhangesa akwa Izalayele kuta ituxi. Mwene wasuluka ni kuta o ituxi yenyiyi.
12 O ima ya mukwa ya musoso wa Jowaji, yoso yabhange ni kutena kwê, o ita yalwu ni Amaziya sobha ya Judá, a isoneka mu divulu dya misoso ya izuwa ya jisobha ja Izalayele.
13 Mukusuka-ku Jowaji wafu, Jelobowamu* mwéne wa mubhingana ku utuminu. Jowaji a mufundu ku Samadiya bhwa fundile o jisobha ja Izalayele.
14 Kyoso Elizewu kyakexile mukata, o uhaxi wenyo wene weji mujibha, Jowaji sobha ya Izalayele wayi kwa mwene, wabhetama yu wamateka o kudila mu kwamba: “Tat’etu, tat’etu! O dikalu dya Izalayele ni akwa kwendela ku jikabalu!”
15 Elizewu wa mwambela wixi: “Kwata mifula ni misongo.” Mwene wakwata o mifula ni misongo.
16 Elizewu wambela o sobha ya Izalayele, wixi: “Kala polondo phala ku itakula.” Kyenyiki, mwene wadisokejeka phala ku itakula, Elizewu watula o lukwaku lwê ku thandu dya lukwaku lwa sobha.
17 Mukusuluka, mwene wa mwambela, wixi: “Jikula o njanena yalungila ku mbandu kutundila o dikumbi.” Mwene wa ijikula. Elizewu wa mwambela, wixi: “Takula o mufula!” Mwene wa utakula. Elizewu wa mwambela dingi: “O mufula wa kikowe* kya Jihova, o mufula wanda tolola akwa Sídya! Eye ngana, wanda tolola akwa Sídya ku Afeke kate ki wanda kwabwika.”
18 Elizewu wa mwambela we, wixi: “Kwata o mifula.” Mwene wa ikwata. Mwene wambela o sobha ya Izalayele, wixi: “Takula bhoxi.” Mwene wa itakula lutatu yu wemana.
19 Kyenyiki-phe, o diyala dya Nzambi yakidi, njinda ya mukwata yu wa mwambela, wixi: “Ngana, eye weji itakula bhoxi lutanu mba lusamanu. Mu kiki-phe, weji tolola akwa Sídya kate kiweji kwa jikinisa. Maji akwa Sídya wanda ku atolola ngo lutatu.”
20 Kyabhiti o ima yiyi, Elizewu wafu ya a mufundu. Kwakexile kibuka kya miyi akwa Mowabe, exile mukwiza mu ixi, ku dimatekenu dya muvu.
21 Kyabhiti kuma kyoso athu kyexile muya mu funda muthu, adisange ni kibuka kya miyi. Kyenyiki, atakula o kimbi kya diyala dyenyidi mu mbila ya Elizewu, ya atundu ni kulenga. Kyoso o kimbi kyabwila ku thandu dya ifuba ya Elizewu, o diyala dya fukunuka yu wemana.
22 Hazayele sobha ya Sídya, watatesa akwa Izalayele mu izuwa yoso ya utuminu wa Jowakaji.
23 Maji Jihova wa alondekesa henda, mukonda dya kikutu kyabhangele ni Mbalahamu, Izake ni Jakobo. Mwene kamesenene ku abwika, ka akaye bhu pholo yê kate mu izuwa ya lelu.
24 Kyoso Hazayele, sobha ya Sídya kyafu, o mon’ê Bene-Hadade wakituka sobha bhu kididi kyê.
25 Jowaji mon’a Jowakaji, watambula we kwa Bene-Hadade mon’a Hazayele, o jimbanza ja tambwile mwene kwa tat’ê Jowakaji mu ita. Jowaji wa mutolola mu lutatu yu watambula dingi o jimbanza joso ja Izalayele.
Footnotes
^ Kifwa, ni kukondama ni kutululuka.
^ Tala o Kibandekesu.
^ Kifwa, Jelobowamu ya kayadi.
^ Mba, “wa ubhulukilu wa.”
