Dya Kayadi Dya Jisobha 14:1-29
14 Ku muvu wa kayadi wa utuminu wa Jowaji mon’a Jowakaji sobha ya Izalayele, Amaziya mon’a Jowaji sobha ya Judá, wakituka sobha.
2 Mwene wexile ni makwinyi ayadi ni kitanu kya mivu kyoso kyakituka sobha, yu watumina mu makwinyi ayadi ni divwa dya mivu mu Jeluzaleme. O dijina dya manyâ dyexile Nzwadana, mukwa Jeluzaleme.
3 Mwene wexile mubhanga ima yawabha bhu pholo ya Jihova, maji kexile mu ibhanga kala kuku’ê Davidi. Amaziya wabhange yoso kala kyabhangele tat’ê Jowaji.
4 Maji mwene kabulu o ididi ya kubhezela, o athu exile hanji mubhakula jisata ni kubandesa o dixi dya jisata mu ididi ya kubhezela.
5 Kyoso mwene kyexile ni kutena kwoso kwa kutumina, wajibha o jiselevende jê, ja jibhile tat’ê, o sobha.
6 Maji-phe, mwene kajibha o twana twa ijibhangânga mukonda wabhange kala kyatendelesele o kitumu kya Jihova kyosoneke mu divulu dya Ijila dya Mozé, kyambe: “O jitata katokala ku ajibha mukonda dya twana, o twana katokala ku ajibha mukonda dya jitata, kala muthu watokala kufwa mukonda dya kikuma kyê.”
7 Mwene wajibha dikwinyi dya midi a mayala akwa Idomo mu honga ya Môngwa, yu watambula o mbanza ya Séla kyoso kyayi ni kulwa o ita. Alungulula o dijina dya mbanza adiluku Joketele, kala kyene mu ixana kate mu izuwa ya lelu.
8 Mukusuluka, Amaziya watumikisa mukunji kwa Jowaji mon’a Jowakaji mon’a Jehú sobha ya Izalayele mu kwamba: “Za, tubhânge mu ita.”*
9 Jowaji, sobha ya Izalayele, watumina kutangela Amaziya sobha ya Judá, mu kwamba: “Kwexile muxi wa minya wa Libanu, watumu kutangela ku muxi wa sedulu wa Libanu: ‘Bhana mon’é n’akale muhatu wa mon’ami.’ Maji sayi kyama kya muxitu wa Libanu kyabhitila bhwexile o muxi wa minya yu wa udyota.
10 Mukidi, eye watolola akwa Idomo, mukonda dyakiki eye wa mudizangeleka. Sanguluka ni fuma yé, maji ukala kubhata dyé.* Mukonda dyahi weji dibhekela o divuwa didi, ni kubheka we o divuwa didi mu Judá?”
11 Maji Amaziya kabhana mátwi.
Kyenyiki, Jowaji sobha ya Izalayele wayi, mwene ni Amaziya sobha ya Judá alwu ita ku Beteseme, o mbanza ya Judá.
12 Akwa Judá a atolola ku akwa Izalayele, kala muthu walengela kubhata dyê.*
13 Jowaji sobha ya Izalayele, wakutu Amaziya sobha ya Judá mon’a Jowaji mon’a Akaziya ku Beteseme. Mukusuluka, Jowaji wa mwambata mu Jeluzaleme yu wabhange dibhululu ku ilumbu dya hama ni makwinyi anake a jimetulu,* tunde bhu Mwelu wa Ifalayimi kate bhu Mwelu wa atungi.
14 Mwene wakatula o ulu yoso ni phalata ni ima ya kamukwa yexile mu inzo ya Jihova ni mu inzo* ya sobha, yu wambata-ku we athu. Mukusuluka, wavutuka ku Samadiya.
15 O ima ya mukwa ya musoso wa Jowaji, o ima yabhange, o kutena kwê ni ita yalwu ni Amaziya sobha ya Judá, a isoneka mu divulu dya misoso ya izuwa ya jisobha ja Izalayele.
16 Mukusuka-ku, Jowaji wafu ya a mufundu ku Samadiya, bhwa fundile o jisobha ja Izalayele. Mon’ê Jelobowamu* mwéne wa mubhingana ku usobha.
17 Amaziya mon’a Jowaji sobha ya Judá, wexile hanji ku mwenyu mu dikwinyi ni kitanu kya mivu, kyoso kyafu Jowaji mon’a Jowakaji, sobha ya Izalayele.
18 O ima ya mukwa ya musoso wa Amaziya, a isoneka mu divulu dya misoso ya izuwa ya jisobha ja Judá.
19 Ku pholo dya kwenda, Amaziya a mulungulukila mu Jeluzaleme, yu walengela ku Lakiji. Maji atumikisa mayala phala ku mukayela kate ku Lakiji ya a mujibhila kwenyoko.
20 Kyenyiki, o kimbi kyê a kyambatela ku jikabalu ya eza-nakyu, a mufundu bhwa fundile o jikuku jê mu Jeluzaleme, mu Mbanza ya Davidi.
21 Mundu wa Judá wakwata Azadiya* wexile ni dikwinyi ni samanu dya mivu, ya amute ku usobha bhu kididi kya tat’ê Amaziya.
22 Mwene watungulula o mbanza ya Elate, yu wa ivutwila ku akwa Judá kyoso sobha* kyafu.
23 Ku muvu wa dikwinyi ni katanu wa utuminu wa Amaziya, mon’a Jowaji sobha ya Judá, Jelobowamu mon’a Jowaji sobha ya Izalayele, wakituka sobha ku Samadiya, yu watumina mu makwinyi awana a mivu ni umoxi.
24 Mwene wexile mubhanga ima yayibha bhu pholo ya Jihova. Mwene keha o ituxi yatele Jelobowamu mon’a Nebate, yabhangesele akwa Izalayele kuta ituxi.
25 Jelobowamu mon’a Jowaji watambula dingi o jimbambe ja Izalayele, tunde ku Lebo-Hamati* kate ku musanza wa Halabá,* kala kyambele Jihova Nzambi ya Izalayele bhukaxi ka selevende yê Jona mon’a Amitayi, o polofeta ya Ngate-Hefele.
26 Kuma Jihova wamono kwila, o akwa Izalayele exile mutala hadi yavulu. Kikusubhukile muthu phala kukwatekesa akwa Izalayele, né ngo yó wakambele valolo ni yó kexile ni nguzu yasoko.
27 Maji Jihova wakanene kwila, keji jima o dijina dya Izalayele mu ixi. Kyenyiki, mwene wa abhulula bhukaxi ka Jelobowamu mon’a Jowaji.
28 O ima ya mukwa ya musoso wa Jelobowamu, yoso yabhange ni kutena kwê, kyebhi kyabhânge ni kyebhi kyatambula o mbanza ya Damasku ni ya Hamati phala akwa Judá ni akwa Izalayele, a isoneka mu divulu dya misoso ya izuwa ya jisobha ja Izalayele.
29 Mukusuka-ku, Jelobowamu wafu a mufundu bhwa fundile o jisobha ja Izalayele. Mon’ê Zakadiya mwene wakituka sobha bhu kididi kyê.
Footnotes
^ Mba, “ni tudisange.”
^ Mba, “mu mbonge yé.”
^ Mu Heba.: “mu balaka.”
^ Mu Heba.: “hama jiwana ja jikovadu.” Tala o Kiba. B14.
^ Mba, “mbonge.”
^ Kifwa, Jelobowamu ya kayadi.
^ Dilombolola “Jihova wakwatekesa.” Mwene amwixana Uziya mu divulu dya 2 Jisobha 15:13; 2 Malunda 26:1-23; Izaya 6:1; Zakadiya 14:5.
^ Kifwa, tat’ê Amaziya.
^ Mba, “kudibokwenu dya Hamate.”
^ Kifwa, o musanza wa Mongwa.
