Dya Kayadi Dya Jisobha 15:1-38
15 Ku muvu wa makwinyi ayadi ni sambwadi wa utuminu wa Jelobowamu* sobha ya Izalayele, Azadiya* mon’a Amaziya wakituka sobha ya Judá.
2 Mwene wexile ni dikwinyi ni samanu dya mivu kyoso kyakituka sobha, yu watumina mu makwinyi atanu a mivu ni kiyadi mu Jeluzaleme. O dijina dya manyâ dyexile Jekodiya, mukwa Jeluzaleme.
3 Mwene wexile mubhanga ima yambote bhu pholo ya Jihova, kala kyabhangele tat’ê Amaziya.
4 Maji-phe mwene kabulu o ididi ya kubhezela, o mundu wexile hanji mubhakula jisata ni kubandesa dixi dya jisata mu ididi ya kubhezela.
5 Jihova wabhangesa kwila o sobha ukala ni uhaxi wa dibhute. Mwene wasuluka ni uhaxi yú kate kyafu. Mwene wakexile mu inzo yengi, kifwa, wa dikexidile. Mu kithangana kyenyokyo, mon’ê Jotamu mwene wexile mutambula konda ya dibhata* ni kufundisa o milonga ya mundu.
6 O ima ya mukwa ya musoso wa Azadiya, ni yoso yabhange, a isoneka mu divulu dya misoso ya izuwa ya jisobha ja Judá.
7 Mukusuka-ku Azadiya wafu, ya a mufundu bhu kididi bhwa fundila o jikuku jê, mu Mbanza ya Davidi. O mon’ê Jotamu, mwéne wakituka sobha bhu kididi kyê.
8 Ku muvu wa makwinyi atatu ni kanake wa utuminu wa Azadiya sobha ya Judá, Zakadiya mon’a Jelobowamu, wakituka sobha ya Izalayele ku Samadiya, yu watumina mu mbeji jisamanu.
9 Mwene wexile mubhanga ima yayibhila Jihova, kala kyabhangele o jikuku jê. Mwene kalenge o ituxi yatele Jelobowamu mon’a Nebate, yabhangesa akwa Izalayele kuta ituxi.
10 Kyenyiki, Salume mon’a Jabeze wa mulungulukila, yu wa mujibha ku Ibelayime. O kyoso kya mujibha, mwene wakituka sobha bhu kididi kyê.
11 O ima ya mukwa ya musoso wa Zakadiya, a isoneka mu divulu dya misoso ya izuwa ya jisobha ja Izalayele.
12 O ima yatangela Jihova kwa Jehú ya dikumbidila, kyoso kyambe: “Ku twana twé, kate ku mwiji wa kawana anda xikama ku kyandu kya ungana mu Izalayele.” Kiki kyene mwene kyabhiti.
13 Ku muvu wa makwinyi atatu ni kavwa wa utuminu wa Uziya sobha ya Judá, Salume mon’a Jabeze wakituka sobha yu watumina mu mbeji imoxi ku Samadiya.
14 Maji Menaheme mon’a Ngádi watundu ku Tidiza, wayi ku Samadiya yu wajibha Salume, mon’a Jabeze ku Samadiya. Mukusuluka, Menaheme wakituka sobha bhu kididi kyê.
15 O ima ya mukwa ya musoso wa Salume ni kyebhi kyalungulukila o sobha, a isoneka mu divulu dya misoso ya izuwa ya jisobha ja Izalayele.
16 Kyoso kyatundu ku Tidiza, Menaheme wayi mulwa ita ni oso atungile mu Tifiza mukonda kamujikwile o dibhitu. Mwene watolola o mbanza yu watandula o mala a ahatu emitine.
17 Ku muvu wa makwinyi atatu ni kavwa wa utuminu wa Azadiya sobha ya Judá, Menaheme mon’a Ngádi wakituka sobha ya Izalayele yu watumina mu dikwinyi dya mivu ku Samadiya.
18 Mwene wexile mubhanga ima yayibhila Jihova. Ku mwenyu wê woso, keha o ituxi yatele Jelobowamu mon’a Nebate, yabhangesa Izalayele kuta ituxi.
19 Pulu, sobha ya Asídya, wayi mubhânga ni sobha ya Izalayele, maji Menaheme wa mubhana midi ya jitalendu* ja phalata, n’a mukwatekese kusuluka ku usobha.
20 Menaheme watambula o phalata ku akwa Izalayele, mu kukobhalala o mayala exile jingenji ni yó abetele-kota mu ixi. Kala muthu mudya wabhana makwinyi atanu a jixikulu* ja phalata, Menaheme anga ujibhana kwa sobha ya Asídya. Mukonda dyakiki, o sobha ya Asídya, watundu mu ixi.
21 O ima ya mukwa ya musoso wa Menaheme ni yoso yabhange, a isoneka mu divulu dya misoso ya izuwa ya jisobha ja Izalayele.
22 Mukusuka-ku, Menaheme wafu, mon’ê Pekaya mwene wa mubhingana ku usobha.
23 Ku muvu wa makwinyi atanu wa utuminu wa Azadiya sobha ya Judá, Pekaya, mon’a Menaheme wakituka sobha ya Izalayele ku Samadiya, yu watumina mu mivu iyadi.
24 Mwene wabhange ima yayibha ku pholo ya Jihova. Kalenge o ituxi yatele Jelobowamu mon’a Nebate, yabhangesa Izalayele kuta ituxi.
25 Maji, o kabhitangu kê, Peka, mon’a Lemadiya, wa mulungulukila kumoxi ni makwinyi atanu a mayala a Ngiliyade, ajibha Pekaya, ya ajibha we Alekobe ni Adiyé ku Samadiya mu inzo* ya sobha. O kyoso kya mujibha, Peka wakituka sobha bhu kididi kyê.
26 O ima ya mukwa ya musoso wa Pekaya ni yoso yabhange, a isoneka mu divulu ya izuwa ya jisobha ja Izalayele.
27 Ku muvu wa makwinyi atanu ni kiyadi wa utuminu wa Azadiya sobha ya Judá, Peka mon’a Lemadiya, wakituka sobha ya Izalayele ku Samadiya, yu watumina mu makwinyi ayadi a mivu.
28 Mwene wexile mubhanga ima yayibhila Jihova. Ku mwenyu wê woso, wasuluka mukuta o ituxi yatele Jelobowamu, mon’a Nebate yabhangesa we Izalayele kuta ituxi.
29 Mu izuwa ya Peka sobha ya Izalayele, Tigilate-Pilesele sobha ya Asídya walwu ita, yu watambula o jimbanza ja Ijone, Abele-Bete-Mahaka, Janowa, Kadexi, Hazole, Ngiliyade, Ngalileya ni ixi yoso ya Nafitali, yu wambata o athu ku ubhika ku Asídya.
30 Maji, Ozeya mon’a Elahe, walungulukila Peka, mon’a Lemadiya. Wa mujibha yu wakituka sobha bhu kididi kyê, ku muvu wa makwinyi ayadi wa utuminu wa Jotamu, mon’a Uziya.
31 O ima ya mukwa ya musoso wa Peka ni yoso yabhange, a isoneka mu divulu dya misoso ya izuwa ya jisobha ja Izalayele.
32 Ku muvu wa kayadi wa utuminu wa Peka mon’a Lemadiya sobha ya Izalayele, Jotamu mon’a Uziya sobha ya Judá wakituka sobha.
33 Mwene wexile ni makwinyi ayadi ni kitanu kya mivu kyoso kyakituka sobha, yu watumina mu dikwinyi ni samanu dya mivu mu Jeluzaleme. O dijina dya manyâ, dyexile Jeluza, mon’a Zadoke.
34 Mwene wexile mubhanga ima yayuka ku pholo ya Jihova, kala kyabhangele tat’ê Uziya.
35 Maji, mwene kabulu o ididi ya kubhezela, o mundu wexile hanji mu bhakula jisata, ni kubandesa dixi dya jisata mu ididi ya kubhezela. Mwéne watungu o dibhitu ku mbandu ya thunda ya inzo ya Jihova.
36 O ima ya mukwa ya musoso wa Jotamu ni yoso yabhange, a isoneka mu divulu dya misoso ya izuwa ya jisobha ja Judá.
37 Mu izuwa yenyoyo, Jihova wakexile mutumikisa Lezime, sobha ya Sídya ni Peka mon’a Lemadiya phala kubhânga ni akwa Judá.
38 Mukusuka-ku Jotamu wafu, ya a mufundu bhu kididi bhwa fundile o jikuku jê mu Mbanza ya Davidi, kukwê. Mon’ê Akaji mwene wakituka sobha bhu kididi kyê.
Footnotes
^ Kifwa, “Jelobowamu ya kayadi.”
^ Dilombolola “Jihova wakwatekesa.” Mwene amwixana Uziya mu divulu dya 2 Jisobha 15:13; 2 Malunda 26:1-23; Izaya 6:1; Zakadiya 14:5.
^ Mba, “mbonge.”
^ Talendu imoxi yasokele 34.2 ya jikilu.Tala o Kiba. B14.
^ Xikulu imoxi yasokele 11.4 ya jikilu. Tala o Kiba. B14
^ Mba, “mbonge.”
