Dya Kayadi Dya Jisobha 16:1-20
16 Ku muvu wa dikwinyi ni kasambwadi wa utuminu wa Peka, mon’a Lemadiya, Akaji mon’a Jotamu sobha ya Judá, wakituka sobha.
2 Akaji, wexile ni makwinyi ayadi a mivu kyoso kyakituka sobha, yu watumina mu dikwinyi ni samanu dya mivu mu Jeluzaleme. Mwene kexile mubhanga ima yambote bhu pholo ya Jihova, Nzambi yê, kala kyabhangele kuku’ê Davidi.
3 Mwene wende mu jinjila ja jisobha ja Izalayele, kate mwene woha mon’ê mu túbhya,* mu kukayela o ima yayibha yexile mubhanga o ifuxi yakaye Jihova bhu pholo ya akwa Izalayele.
4 Mwene we wexile mubhakula jisata ni kubandesa o dixi dya jisata mu ididi ya kubhezela, ku tumilundu ni bhoxi dya mixi yamakota.
5 Kiki kyene kyabhangesa Lezime sobha ya Sídya ni Peka mon’a Lemadiya sobha ya Izalayele, kuya mubhânga ni akwa Jeluzaleme. Ene akondoloka o mbanza mwexile Akaji, maji katena ku itambula.
6 Mu thembu yenyoyo, Lezime sobha ya Sídya wavutwila o mbanza ya Elate ku akwa Idomo, mu kukaya o Jijudé* ku Elate. Akwa Idomo ayi mu mbanza ya Elate ya atungu kwenyoko kate mu izuwa ya lelu.
7 Kyenyiki, Akaji watumikisa akunji kwa Tigilate-Pilesele sobha ya Asídya phala ku mutangela: “Eme ngi mon’é, ngi selevende yé. Za u ngibhulule bhu maku a sobha ya Sídya ni bhu maku a sobha ya Izalayele, amukwiza mubhânga n’eme.”
8 Akaji wakatula o phalata ni ulu yexile mu inzo ya Jihova, ni ima yexile mu inzo* ya sobha yu wa itumikisa kwa sobha ya Asídya phala ku mubhomba o muxima.
9 O sobha ya Asídya waxikina o kima kya mubhingi, mwene wayi mu mbanza ya Damasku yu wa itambula, wambata o athu atungile-mu phala kukala abhika ku Kili, yu wajibha Lezime.
10 Mukusuluka, sobha Akaji wayi ku Damasku mu disanga ni Tigilate-Pilesele sobha ya Asídya. Kyoso mwene kyamono o kalatódyu kexile ku Damasku, sobha Akaji watumikisa kwa Udiya mukanda wexile mulondekesa kyebhi kyexile o kalatódyu ni kyebhi kya katungu.
11 O mukunji Udiya watungu o kalatódyu kala kya mutendelesa sobha Akaji ku Damasku. O mukunji Udiya watungu o kalatódyu ande mwene dya sobha Akaji kutunda ku Damasku.
12 Kyoso sobha kyavutuka mu kutunda ku Damasku, wamono o kalatódyu, wazukama-ku, yu wabhakula-ku jisata.
13 Mwene woha ku kalatódyu o jisata ja kwoha ni jisata ja jimbutu yu walundulula we o jisata ja mauholwa ni manyinga a jisata ja paze.
14 Kyenyiki, mwene wakatula o kalatódyu ka ngondo kexile bhu pholo ya Jihova ni bhu pholo ya inzo. Kene kexile bhukaxi ka kalatódyu ka ubhe ni inzo ya Jihova, yu wakatula ku mbandu ya thunda bhwexile o kalatódyu kê.
15 Sobha Akaji wambela o mukunji Udiya, wixi: “Oha o jisata ja kwoha ja kamene ni jisata ja jimbutu ja usuku ku kalatódyu kadikota. Oha we o jisata ja kwoha ja sobha ni jisata ja jimbutu, kyene we kimoxi ni jisata ja kwoha ni jisata ja jimbutu ni jisata ja mauholwa jabhana o mundu. Watokala we kuzunzumuna o manyinga a jisata ja kwoha ku kalatódyu ni manyinga a jisata ja kamukwa. Yalungu ni kalatódyu ka ngondo, nganda sota ihi i nganda bhanga.”
16 O mukunji Udiya wabhange yoso kala kya mutendelesa sobha Akaji.
17 Sobha Akaji wabatujula we o jikwadulu jexile mu jimbandu ja tumakalu yu wakatula o jibasiya jexile ku tumakalu, wakatula we o basiya yadikota a ixana musanza, yexile ku thandu a jingombe ja ngondo, yu wa itula ku thandu a matadi exile bhoxi.
18 Mukonda dya sobha ya Asídya, ku inzo ya Jihova mwene wazalula o mbandu ya inzo yatungile ku mbandu ya tembulu mwexile muya mu ji sábhalu, ni mwelu bhwexile mubokwena o sobha.
19 O ima ya mukwa ya musoso wa Akaji ni yoso yabhange, a isoneka mu divulu dya misoso ya izuwa ya jisobha ja Judá.
20 Mukusuka-ku, Akaji wafu ya a mufundila bhwa fundile o jikuku jê mu Mbanza ya Davidi. Mon’ê Hezekiya,* mwéne wa mubhingana ku usobha.
Footnotes
^ Mu Heba.: “wabhangesa mon’ê kubhita mu túbhya.”
^ Mba, “mu kukaya o mayala akwa Judá.”
^ Mba, “mbonge.”
^ Dilombolola, “Jihova ukolokotesa.”
