Dya Kayadi Dya Jisobha 17:1-41
17 Ku muvu wa dikwinyi ni kayadi wa utuminu wa Akaji sobha ya Judá, Ozeya mon’a Elahe wakituka sobha ya Izalayele ku Samadiya, yu watumina mu divwa dya mivu.
2 Mwene wexile mubhanga ima yayibhila Jihova, maji o ima yayibha yabhange ki itúndu yabhangele o jisobha ja Izalayele jatumina ande dya mwene.
3 Salamanazale sobha ya Asídya weza mubhânga-nê, Ozeya anga umateka ku mubhana lubhaku.
4 Maji o sobha ya Asídya weza mukwijiya kwila, Ozeya wa mulungulukila mu kutumikisa mukunji kwa Só, sobha ya Ijitu. Ozeya kexile mufuta dingi o lubhaku kwa sobha ya Asídya kala kyexile mubhanga mu mivu kudima. Mukonda dyakiki, o sobha ya Asídya wa mukutu yu wa mute mu kaleya.
5 O sobha ya Asídya weza ni masoladi mê mu ixi, yu wakondoloka o mbanza ya Samadiya mu mivu itatu.
6 Ku muvu wa kavwa wa utuminu wa Ozeya, o sobha ya Asídya watambula o mbanza ya Samadiya. Mukusuluka, wambata o mundu wa Izalayele ku ubhika ku Asídya yu wa abhangesa kutunga ku Hala ni Habole bhwa zukama ni ngiji ya Ngozane ni mu jimbanza ja akwa Medya.
7 Kiki kyabhiti mukonda akwa Izalayele atele kituxi kwa Jihova Nzambi yâ, wa akatwile mu ixi ya Ijitu, exile mu itumina kwa Falawó, sobha ya Ijitu. Ene abheza* jinzambi jengi.
8 Ene akayela o ima yexile mubhanga o ifuxi yakaye Jihova bhu pholo ya Izalayele ni ima yakexile mubhanga o jisobha ja Izalayele.
9 Akwa Izalayele exile mubhanga ima yayibha bhu pholo ya Jihova, Nzambi yâ. Ene atungu ididi ya kubhezela mu jimbanza joso, tunde ku inzo ya matala ya alangidi, kate mu mbanza yexile ni ilumbu.*
10 Ene abhange jiphiladi ni iteka* phala ku ibheza ku tumilundu twoso twa dileka ni bhoxi dya mixi yoso yamakota.
11 Ene exile mubandesa o dixi dya jisata mu ididi yoso ya kubhezela-mu, kala kyabhangele o ifuxi yakaye Jihova bhu pholo yâ. Exile mubhanga ima yayibha phala kuthathamesa Jihova.
12 Ene asuluka mu kubheza o iteka yafidisile Jihova, mu kwamba: “Kanenu ku ibheza!”
13 Jihova wasuluka mu kudimuna akwa Izalayele ni akwa Judá bhukaxi ka jipolofeta jê ni bhukaxi ka yó akwa kumona o isumwa mu kwamba: “Ehenu o jinjila jenu jayibha. Tumakenu o itumu yami, o jingonge jami ni ijila yoso i ngabhana ku jikuku jenu, i ngamitangela bhukaxi ka jiselevende jami, o jipolofeta.”
14 Maji ene kabhana mátwi, asuluka mwene mu kubhanga o ima yayibha, yabhangele o jikuku jâ, akambele kulondekesa o kixikanu kwa Jihova Nzambi yâ.
15 Ene asuluka mu kubhukumukina o itumu, kakumbidila o kikutu kyatele mwene ni jikuku jâ ni jingonge ja abhanene phala ku adimuna. Ene akayela o iteka yakambe o valolo, akituka wa kala iteka sé valolo. Kyenyiki, ene akayela o ifuxi ya akondolokele, yatangele Jihova phala ka ikayele.
16 Ene kakumbidila o itumu ya Jihova Nzambi yâ, abhange iteka iyadi yafwelu mu ukexilu wa tungombe, abhange we kiteka* kya muxi, afukamena o jithéthembwa joso ku dyulu, ya abheza Bahale.
17 Oha* o twana twâ, twa ahatu ni twa mala mu túbhya, exile muzambula, asoto kwijiya o ima yanda bhita ku hádya bhukaxi ka ijimbwete, ya adibhakula* mu kubhanga ima yayibha bhu pholo ya Jihova, phala ku muthathamesa.
18 Mukonda dyakiki, Jihova ukala ni njinda yavulu ya akwa Izalayele, yu wa asondolola ku mesu mê. Kaxisa-mu muthu mu ixi, kikale ngo o mwiji wa Judá.
19 Kate mwene ni akwa Judá kabelesela o itumu ya Jihova Nzambi yâ. Ene akayela o ukexilu wa akwa Izalayele.
20 Jihova waditunu o mbutu yoso ya Izalayele, wa akwatesa jisonyi, yu wa abhakula bhu maku a jinguma, kate kya akaye bhu pholo yê.
21 Wakatula Izalayele ku dibhata dya Davidi, ene asolo Jelobowamu, mon’a Nebate kala sobha yâ. Kyenyiki, Jelobowamu wafunyisa akwa Izalayele phala kabheze Jihova, wa abhangesa kuta ituxi yamakota.
22 O mundu wa Izalayele wate o ituxi yatele Jelobowamu, ene keha o ituxi,
23 kate Jihova kyakatula akwa Izalayele mu ixi, kala kyazwelele bhukaxi ka jipolofeta jê. Kyenyiki, akwa Izalayele a ambata ku ubhika ku Asídya. Ene ala kwenyoko kate mu izuwa ya lelu.
24 Mukusuluka, sobha ya Asídya wabheka athu engi akwa Babilonya ni akwa Kute, ni akwa Hava, ni akwa Hamati, ni akwa Sefalavayime, yu wa atumina kutunga mu jimbonge ja akwa Samadiya mu ididi mwatungile akwa Izalayele. Athu enya anga alundula Samadiya ya atungu mu jimbanza jiji.
25 Kyoso kyayi mutunga kwenyoko, ene kakexile muxila* Jihova. Mukonda dyakiki, Jihova wa atumikisa jihoji jajibha o athu.
26 Akitangela sobha ya Asídya, mu kwamba: “Ngana, o athu u wambata ku ubhika, u watula mu jimbanza ja Samadiya, kejiya kubheza o Nzambi ya ixi yenyoyo. Kyenyiki, mwene wa mu atumikisa jihoji ja mu ajibha, mukonda séku muthu mudya, wejiya kubheza o Nzambi ya ixi yenyoyo.”
27 Bhenyobho, o sobha ya Asídya wa ambela, wixi: “Bhangesenu kwila, ku athu u mwambata ku ubhika, kuvutuke mukunji umoxi phala atunge ku Samadiya n’a longe o athu kubheza o Nzambi ya ixi yenyoyo.”
28 Sayi mukunji watungile ku Samadiya a mwambatele ku ubhika, wavutuka ku Betele, yu wamateka ku alonga kyebhi kyeji bheza Jihova.
29 Kyenyiki, kala kifuxi kyabhange kiteka phala ku kibheza kala nzambi yâ, ya akitula bhu kididi kya kubhezela kyabhangele akwa Samadiya. Kala kifuxi kyabhange kiki mu jimbanza mwa tungile.
30 Kyenyiki, o mayala akwa Babilonya abhange kiteka, akixana Sukote-Benote, o mayala akwa Kute abhange kiteka akixana Nengale, o mayala akwa Hamati abhange kiteka akixana Asima.
31 O akwa Hava, abhange iteka a ixana Nibaji ni Talatake. O akwa Sefalavayime exile mu kwoha o twana twâ mu túbhya phala ku tubhakula kwa Adameleke ni Anameleke, o jinzambi ja akwa Sefalavayime.
32 Sumbala exile ni wôma wa Jihova, maji asolo mayala bhukaxi ka mundu phala kukala akunji mu ididi ya kubhezela. O mayala yá exile mubhanga o ikalakalu phala ene mu ididi ya kubhezela.
33 Kyenyiki, ene exile ni wôma wa Jihova maji exile mubheza o jinzambi jâ, kala kyexile o kifwa kyâ kya kubheza mu ifuxi mwa akatwile.
34 Kate mu izuwa ya lelu, ene asuluka ni ubhezelu wâ kala kyexile mubhanga mu ukulu. Bhukaxi kâ séku muthu wene mubheza* Jihova, séku muthu wa mubelesela o itendelesu yê, o jingonge jê, o Ijila ni itumu yabhana Jihova ku twana twa Jakobo, wa mulukile o dijina dya Izalayele.
35 Kyoso Jihova kyabhange o kikutu ni ene, mwene wa atendelesa mu kwamba: “Kanenu kubheza jinzambi jengi, né ku jifukamena, né ku jisidivila mba ku jibhakwila jisata.
36 Maji mwatokala kukala ngo ni wôma wa Jihova, yó wa mikatula mu ixi ya Ijitu ni kutena kwê, ni lukwaku lwê lwosunune, mwéne ngo mwatokala ku mufukamena ni ku mubhakwila jisata.
37 Mwenda jinga ni kukumbidila o jingonge ni itendelesu, ijila ni itumu ya misonekena. Kanenu kubheza jinzambi jengi.
38 Kanenu kujimba o kikutu ki ngate ni enu, kanenu kubheza jinzambi jengi.
39 Mwatokala kubheza ngo Jihova Nzambi yenu, mukonda mwene wanda mibhulula bhu maku a jinguma jenu joso.”
40 Maji-phe ene kabelesela, ya asuluka ni ukexilu wâ wokulu wa kubheza.
41 Kyenyiki, o ifuxi yiyi yakexile ni wôma wa Jihova maji exile mubheza o iteka yâ. Kate mu izuwa ya lelu, o twana twâ ni alawul’â asuluka ni kubhanga kyenyiki kala kyexile mubhanga o jikuku jâ.
Footnotes
^ Mu Heba. “akwatela wôma ku.”
^ Kifwa, mu ididi yoso, kikale o ididi mwala athu avulu mba athu ofele.
^ Tala o Dilombolwelu.
^ Tala, o Dilombwelu.
^ Mu Heba.: “abhitisa o twana twâ, twa ahatu ni twa mala mu túbhya.”
^ Mu Heba.: “adisumbisa.”
^ Mba, “kubheza.”
^ Mu Heba.: “ni wôma wa.”
